Ilagiit atuakkamik atuaqqissaaqatigiittarnerannik aaqqissuussaq
Imm. 5: Kiffartornermik nakkutilliisumit pulaarneqarneq
1 Kiffartornermik nakkutilliisoq iivangkiiliumik oqaluussisartuussaaq ilinniartitsisuussallunilu. Ilagiit oqaluussinerminni oqaluussiffissaminnilu ajoqersuinerminni ikiorneqarnerannut kiffartornermik nakkutilliisoq pingaaruteqartorujussuuvoq. (Mák. 13:10) Suliassani ilumooruppagu tamarmillu suleqatigippassuk, oqaluussisartut oqaluussinermut pikkorinnerulissapput oqaluussiffissallu peqqissaarnerusumik suliffigineqassallutik.
2 Kiffartornermik nakkutilliisup annertunerusumik oqaluussinissamut kaammattuinissani ingammik pingaartissavaa. Taamaaliorsinnaavorlu siullerpaamik ilagiit atuakkamik atuaqqissaaqatigiittarnerannik aaqqissuussaq aqqutigalugu. Nalinginnaasumik nammineq atuaqqissaarnermut aqutsisuussaaq, qaammammulli ataasiarluni atuaqqissaaqatigiinnut allanut pulaarnermini ikiortiminit taarserneqartarpoq. — km 10/81, q. 1, 3.
3 Pulaarnissap piareersarnera: Sapaatip-akunnera atuaqqissaaqatigiinnut allanut pulaarfiusussaq sioqqullugu kiffartornermik nakkutilliisup pulaarfigisassami oqaluussisartutut nalunaarsorneqarneri misissuataartariaqarpai. Aammattaaq atuaqqissaarnermik aqutsisoq naapeqatiginiartariaqarpaa oqaluussisartut oqaluussinermut peqataasarnerat oqaloqatigiissutigiumallugu. Atuaqqissaarnermik aqutsisup kiffartornermik nakkutilliisoq ajornartorsiutaasinnaasunik imaluunniit pisariaqartitanik kiffartornermut attuumassuteqartunik nalunaarsukkani allattugaanngitsunik ilisimatissinnaavaa. Atuaqqissaarnermik aqutsisoq eqqaasinneqassaaq atuaqqissaarneq minuttinik 45-innarnik sivisussuseqassammat, kiffartornermik nakkutilliisoq minuttini 15-ini oqaluussinermut tunngasumik oqalugiaateqarniassammat.
4 Oqalugiaammi tamatumani oqaluussinermik pingaartitsinerulernissaq siunertarineqassaaq. Oqaluussisartoqarpat oqaluussinerup immikkoortortaani aalajangersimasuni ikiorneqartariaqartunik, qanoq ilillutik siuariaateqarnissaannik kiffartornermik nakkutilliisoq atoriaannaasunik siunnersuuteqarsinnaavoq. Oqaasii isumalluarpalullutillu qiimmassaasuusariaqarput, peqqusiileqisoqaqqunagu nikallortoqaqqunagulu. Taamaanngippat pulaarnerup siunertaa uniorneqaannassaaq. Oqalugiaatikkut kikkut tamarmik siuariaateqarnissaannik kajumissaarneqassapput.
5 Angusinnaasani naapertorlugit kiffartornermik nakkutilliisup qatanngutit angutit arnallu inuttut soqutiginninnermik ersersitsiviginissaat ilungersuutigisariaqarpaa. Oqaluussiartoqatiginissaannik isumaqatigiissuteqarfigisinnaavai. Oqaluussisartut illumiit illumut oqaluusseqatigigaangamigit siunnersorsinnaavai saqqummiussisarnertik qanoq ilillutik pitsanngorsarsinnaagaat. Siunnersuinermini isornartorsiuerpalaassanngilaq, ilumoorlunili ikiuerusussuseqarpalaartariaqarpoq. Aammattaaq pulaaqittakkamut imaluunniit Bibelimik atuaqqissaaqatigisartakkamut ilaanissani neqeroorutigisinnaavaa. Malunnarpat atuaqqissaaqatigiinni inuttut ikiorneqarnissamik pisariaqartitsisoqartoq, sapaatip-akunnerata ingerlanerani paarsisutut pulaarsinnaavai. Tamatumalu kingorna atuaqqissaarnermik aqutsisoq oqaluttuussinnaavaa pulaakkani qanoq siunnersorsimagini. Oqaluussisarnerminnik ilanngartuilersimagaluartut taamatut asannittumik inuttut soqutiginninnermik ersersitsivigineqarnertik nutaamik suliniuteqaqqilernissaminnut iluaqutigisimavaat.
6 Katersuunnerit: Sapaatip-akunnerani pulaarfiusumi kiffartornermik nakkutilliisoq katersuunnernik aqutsissaaq. Katersuunnerit piffissaq eqqorlugu aallartinneqassapput, aamma ikittuinnaat najuukkaluarpataluunniit. Katersuunneq minuttit 10-nit 15-t sinnernagit sivisussuseqassaaq, kiffartornermillu nakkutilliisup aalajangissavaa ullormut-allassimaffik eqqartorneqassanersoq. Oqaluussisartut oqaluussiartulersinnatik ilisimassavaat sumunnarsinnaallutik kinalu oqaluussiartoqatigisinnaallugu. (1 Kor. 14:33, 40) Kiffartornermik nakkutilliisup kikkut tamaasa kajumissaarsinnaavai nangaanatik oqaluussiartornissaannik.
7 Kiffartornermik nakkutilliisup atuakkamik atuaqqissaaqatigiikkuutaanut pulaartarneri ilagiinnut assorsuaq iluaqutaapput. Pulaarnerani suleqatigisarutsigu oqaluussinerput aaqqissuulluagaanerussaaq sunniuteqarluarnerussallunilu. Aamma suleqatigilluartarutsigu kiffartornermik nakkutilliisup suliani nuannaarutiginerussavaa (Epr. 13:17), savat assersuutaasut katersorneqassapput, aammalu uagut nammineq tamanut tusarumasunut oqaluussinissamik naammassinninnerput nuannaarutigissavarput. — Jes. 61:1, 2; Hes. 9:11; Juán. 17:26. (km 91/11 Menighedsbogstudieordningen, 5. del)