Jehova nakussatsitsisarpoq
1 Jehovap innuttaatut nutaarsiassap nuannersup oqaluussissutiginissaanik suliassaqartinneqarpugut ’Guutimik nalusut akornanni iluartumik saqitilluta’. (1 Pît. 2:12; Mat. 24:14) Ullut artornartut inuuffigisavut namminerlu sanngiissutivullu eqqarsaatigalugit akuerisariaqarparput nammineerniarluta suliassaq tamanna naammassisinnaanngivillugu. (2 Tim. 3:1-6) Nuannaarutigingaarparput Jehova ikiortigisinnaallugu.
2 Apustili Paulusip misilinneqarnerpassuit atorlugit nikallujuittuarsimavoq. (2 Kor. 11:23-27) Qanoq ililluni tamakku naammagalugit atorsinnaavai suliassanilu naammassisinnaallugu? Taamaaliorsinnaavoq Jehovap ’pissaanermik angingaartumik’ tunimmani. (2 Kor. 4:7) Paulusip Jehovamit ikorneqarnini paasillugu ima allassimavoq: ’Tamaasa pissatsitsisikkut sapinngilakka.’ (Fil. 4:13) Jehovap uaguttaaq ikiussavaatigut. Qanoq ililluta taassumannga ikiorneqarsinnaavugut?
3 Kipisuitsumik qinusariaqarpugut: Jesusip kajumissaarsimavaatigut kipisuitsumik ’qinoqqulluta, ujarleqqulluta kasuttoqqullutalu’. (Lúk. 11:5-10) Kipisuitsumik qinusarutta Jehovamut takutissavarput soqutiginninnitta, kissaateqarnitta pissutiginiakkattalu annertussusiat piviussusiallu. (Tuss. 55:18; 88:2, 14; Rûm. 1:9-11) Paulus tamanna akueralugu ima kajumissaarisimavoq: ’Kipisuitsumik qinugitsi.’ (1 Tás. 5:17) Qinuneq tassaavoq Jehovamit ikiorneqaatissarsiffissat ilaat pingaarnerusut.
4 Teokratiimit aqunneqarneq maleruartariaqarparput: Teokratii tassaavoq Guutip aqutsinera, Guutilu asassutaavoq. Guutimit aqunneqassagutta taassuma asannittumik oqartussaanera akuerisariaqarparput tamatigullu taassuma najoqqutassiai maleruartariaqarlugit. ’Inussiaq aalajaallunilu silatooq’ nunarsuarmi Guutip aqutsineranut sinniisuuvoq. (Mat. 24:45-47) Jehovamit pilluaqquneqassagutta peqatigiiffik ’inussiap’ atortagai suleqatigisariaqarpavut. (Naleqqiuguk Epr. 13:17.) Ilumoorluta kajumikkutta Jehovap akilissavaatigut pisariaqartitatsinnik nakussatsissalluta. — Epr. 4:16.
5 Qatanngutivut qanittuartariaqarpavut: Jesusip ajoqersugaasa asanninneq ilisarnaatigaat. (Juá. 13:34, 35) Inuttulli assigiinngitsuugatta isumaqatigiinngissuteqalersinnaavugut. Taamaattumik misiginneqataalluta isumakkeerfigeqatigiittariaqarpugut. (Evf. 4:32) Taamaalilluta uppernikkut qatanngutivut qanittuarsinnaavavut taakkualu misilinneqarnikkut naammagittarnerannit kaammattorneqarluta. ’Ilisimagatsigu silarsuarmi qatanngutigisavut taamaaqataannik naalliutsitaasartut’ uagut Jehovamit assingusumik misilinneqarnissamut nakussatsinneqarpugut. — 1 Pît. 5:9.
6 Nammineerluta atuaqqissaartarnermut pilersaaruteqarluartariaqarpugut: Isumakkut uummatikkullu anersaakkut pissatsinneqarutta Satanip saassussineri assortorsinnaavavut. (1 Pît. 5:8) Nammineerluta atuaqqissaartarnermut pilersaaruteqarluarutta Guutimik ilisarsinerput alliartuinnassaaq. Ilisarsineq tamanna iluaqutigisinnaavarput ulluinnarni ajornartorsiuteqaleraangatta. Paulusip erseqqissarsimavaa eqqortumik ’ilisarsineq’ annannissatsinnut pingaaruteqartorujussuusoq. (1 Tim. 2:3, 4) Aalajangersimasumik anersaakkut nerisarnerput pisariaqavippoq.
7 Nakussatsinneqarnissatsinnut atorfissaqartitavut tamaasa ilagiinnit pisarpavut. Tassani suliniutissat sammisassallu tamaasa uummatikkut iluunngarluta tapersersortarutsigik ’nukillaarnata arpassaagut qasussanatalu ingerlassalluta’. — Jes. 40:29-31. (kmD 95/6 Jehova giver kraft)