Meeqqannut suut anguniagaritippigit?
1 Inuunermi iluatsitsissagaanni pitsaasunik anguniagaqartariaqarpoq angusariaqarlugillu. ’Inuuneq piviusoq tiguniaraanni’ ilisimassuteqarnissaq pisariaqarpoq. (1 Tim. 6:19) Jehovap oqaatsimigut peqatigiissortamigullu aqqutikkut eqqorluartukkut sukkut ingerlanissarput ilitsersuussutigisarpaa. — Jes. 30:21.
2 Taamaaliornermigut Jehova angajoqqaanut maligassiuilluarpoq. Angajoqqaat silatusaartut meeqqatik aqqutikkut sukkut ingerlanissaat ajoqersuussutigisarpaat, meeqqallu utoqqaligunik ’tamanna nigussanngilaat’. (Uss. 22:6) Angajoqqaat kristumiuusut misilittakkat tunngavigalugit nalunngilaat nammineq silaqassuseq tatigisassaanngitsuusoq. — Uss. 3:5, 6.
3 Angajoqqaat meeqqaminnut naleqaqisumik anguniagaqartitsisinnaapput. Meeqqat kaammattorneqarsinnaapput ilaqutariilluni atuaqqissaartarnerup pingaaruteqassusianik. Meeqqat ataatsimiinnissanut piareersaraangamik namminnerlu oqaatsitik atorlugit akigaangamik iluaqutigisarpaat. Akuttunngitsumik oqaluussiartornermut peqataasarnerat pingaaruteqarportaaq. Meeqqat mikinerusut naqitaaqqanik neqeroorutiginnissinnaapput, allassimaffinnik atuarsinnaallutik atuagassiamilluunniit saqqummiisinnaallutik. Atuarsinnaanngorunik anersaakkullu siumukariartornissaminnut teokratiimut ilinniarfimmut peqataalersinnapput. Alloriarnerussaaq annertooq kuisimanngitsutut oqaluussisartunngorunik imaluunniit kuisinnissaminnut piukkunnarsigunik.
4 Meeqqat inuussuttuaranngoriartulerpata, siusinnerusukkulluunnit, angajoqqaat meeqqatik apersortariaqarpaat inuunerminni sumik anguniagaqarnersut. Angajoqqaat meeqqatik ikorsinnaavaat atuarfimmi ilinniagassat atoriaannaasut namminnerlu pilersuinissamut periarfissiortut qineqqullugit, Naalagaaffiup soqutigisai akiginagit. (1 Tim. 6:6-10) Kaammattorneqarsinnaapput Aappaqaratik kiffartuussinissaannut kajumissaarneqarsinnaapput, kingusinnerusukkullu aalajangerunik aappaqalerniarlutik aappariittut akisussaaffik naammassisinnaassagamikku. (Mat. 19:10, 11; 1 Kor. 7:36-38) Pioneeritut kiffartuuteqarsinnaaneq, annertunerusumik pisariaqartitsiffiusuni kiffartuussinissamut, Betelimi ajoqersuiartortitatulluunniit kiffartuussineq ajunngitsumik eqqartorneqarpata, meeqqat siusissumik kissaateqalersinneqarsinnaapput Jehovap iluarisaanik kiffartuusserusussuseqalernermik, allanut iluaqutaallutik imminnullu iluaqutigissallugu.
5 Peqatigiiffitsinni inuusuttorpassuatta kristumiutut ileqqussanik qutsissunik ileqqoqarnerat teokratiimillu anguniagaqarlutik ilungersuussinerat piaarinaatsornerunngilaq. Angajoqqaat asannittut inuusuttut ajunngitsumik ingerlanerannut pissutaaqataapput. Illit meeqqavit inooriaaseq suna qinersimavaat? Naalagaaffiup soqutigisaanut samminerusut inuunerminni sulissutigaat? Eqqaamajuk pitsaanerpaamik tunisinissaq tassaammat sallussuissutip meeqqannut pigiliutsinnissaa. Kinguneqarsinnaavoq ilaqutariit tamarmik aalajaallutik Jehovamik kiffartuunnissaat. — 5 Mos. 6:6, 7; Jos. 24:15. (kmD 9/95 Hvilke mål har du sat for dine børn?)