Piffissaq tamaat kiffartornerup nuannersortai
1 Inuusuttuuguit qularnanngitsumik siunissat eqqarsaatigereersimassavat. Ussatit 21:5-imi allassimavoq „Eqiasuitsup pilersaarusiai iluanaarutissarsisitsisarput.“ Imminermut pitsaanerpaajussaaq inuunermi sunik anguniagaqassanerluni eqqarsaatigeqqissaaraanni. Siunissat pilersaarusiulerukku piffissaq tamaat kiffartornissaq eqqarssaatigiuk. Sooq tamanna pitsaassava?
2 Inersimassut ilaat inuusuttuunerminni pioneriusimasut aperikkit tamanna nuannarisimaneraat, tamarmillu akissagunarput: „Ukiut taakku inuuninni nuannernerpaajupput.“ Qatanngut angut inuusuttuunermini piffissaq tamaat kiffartornerminik nuannaarutiginnissimasoq kingusinnerusukkut oqarpoq: „Inuusuttuunermut kingumut qiviarluni nalerisimaarnaqaaq oqarsinnaalluni siunnersuut silatooq tassa, „pinngortitsisit eqqaamaniaruk inuusuttuunerpit ulluini,“ malissimallugu.“ (Uss 12:1) Nuannaarneq tamanna inuusuttuutillutit misigisinnaassagukku angajoqqaatillu siumut pilersaarusiorluartariaqarpusi.
3 Angajoqqaat, piffissaq taamaat kiffartornissamut kajumissaarigitsi: Jehovap, Ataatatut isumassuisutut, aqqusinikkut sukkut ingerlassanersutit ajoqersorsimavaatit. (Es 30:21) Asannittumik siunnersuutini maligassiuilluarninilu angajoqqaanut takutippaa. Meeqqat nammineq aqqutip sorliup pitsaanerpaaneranik aalajangiisiinnarnagit aqqummik ingerlavissaannik ajoqersorsigit Jehovamit pilluaqqusaaqqullugit. Inersimanerulerunik ilinniartitsinersi iluaqutigissavaat „ajunngitsumik ajortumillu immikkoortitsisinnaalerlutik.“ (Hebr 5:14) Angajoqqaat misilittakkaminnit nalunngilaat namminneq paasisimasaqassusertik tatigisinaanagu; Jehovap aqqutitik nalimmatserumaarai tatigisariaqarpaat. (Uss 3:5, 6) Ingammik inuusuttunut inuunermi misilittagaqarpallaanngitsunut taamaattariaqarpoq.
4 Meeqqat inuusuttuaranngorpata siusinnerusukkulluunniit, ilissi angajoqqaat piviusorsiortumik inuunermi suliassaat anguniagassaallu pillugit oqaloqatigisariaqarpasi. Atuarfimmi siunnersortip, ilinniartitsisut atuaqataasalu pigisatigut silamiullu anguniagaannik anguniagaqanissaannut sunnerniarsinnaavaat. Meeqqatit Naalagaaffiup soqutigisaanut akornutaanngitsumik pisariaqartitaannik matussusiisinnaasumik ilinniagassamik ilisimassuseqalersitsisumik misilittagaqalersitsisumillu toqqaanisssannik ikiukit. (1 Tim 6:6-11) Pioneritut kiffartornermi aallartinnissamut pisariaqartitat matussusernissaanut tunngaviusumik atuarsimaneq ilinniagaqarsimanerlu naammakkaluarput.
5 Inuusuttut kajumissaarsigit kisimiittuuginnarnissartik „periarfisseqqullugu.“ Kingusinnerusukkulli katiinnarniarlutik aalajangerunik, aappariinnermi angingaartunik akisussaaffeqarnissamut piareeqqanerussapput. (Naalagaaffimmik kiffartorneq-mi 2001-mi juunimootumi allaaserisaq „Kiffartornissamut piareersimavit“-mi immikkoortoq 19 takuuk) Pioneritut kiffartorneq, Betelimi kiffartorneq, ajoqersuiartortitatut kiffartorneq pisariaqartitsiffiusunilu kiffartorneq isumalluartumik oqaluuserisarsigit.
6 Inuusuttut, piffissaq tamaat kiffartorneq salliutissiuk: Inuusuttuuguit, pioneriuluni qanoq innersoq takorluuinnartariaqanngilat. Atuarninni ilinniagaqarninnilu pioneriuneq qanoq innersoq paasiniarsinnaavat periarfissaqalerpat ikiorti-pioneriullutit. Taava paasissavat pioneritut kiffartorneq qanoq nalerisimaarnartigisoq. Aasaanerani ikiorti-pioneriunissat pilersaarutigisinnaaviuk?
7 Qatanngutaaguit angut inuusuttoq, ilagiinni kiffartortutut piukkunnarsarnissannut suut pisariaqarnersut eqqaasaatigilluaruk. (1 Tim 3:8-10, 12) Betelimi kiffartornissaq Kiffartortulluunniit Atuarfiat soqutiginartikkukku aalajangersinnaavutit ukiutit naammalerniariartut qinnuteqarniarlutit. Pioneritut kiffartornerup tunuliaqutaqarlualersissavaatit. Pilersaarummik malittarisaqarneq, aaqqissuilluarsinnaalerneq, allanik peqateqarluarsinnaaneq akisussaassuseqanerlu ilikkassavatit. Tamakku tamarmik kingusinnerusukkut kiffartornermi immikkut pisinnaatitaaffinnut piukkunnarsisissavaatsit.
8 Piffissaq tamaat kiffartornermi iluatsilluassagaanni teokratiimut tunngasunut tamakkiisumik tunniusimanissaq pingaaruteqarpoq. Apustili Paulusip taamannak isiginnittaaseqarnissatsinnut kajumissaarpaatigut pilluaqqussutissallu erseqqissarlugit: „Qanorluunniit iliorussi taamaaliortaritsi uummammit pisumik, [Jehovamut]. Ilisimassavarsimi taamaaliorussi taarsiullugu [Jehovamit] kingornussassaqartitaassasusi.“ (Kol 3:23, 24) Qanortoq Jehovap piffissaq tamaat kiffartorninni nuannaarutissingaarlisit.