Meeqqasi oqaluussisartunngornissaannut ilinniartissigit
1. Tussiaat 148:12, 13-imi angajoqqaat kristumiut qanoq peqquneqarpat?
1 Jehovap inuusuttut meeqqallu unnersiutigeqqulluni kajumissaarpai. (Tuss 148:12, 13) Taamaattumik angajoqqaat kristumiut meeqqatik Biibilip sallusuissutaanik Guutillu najoqqutassiaanik ilinniartitsiinnarneq naammagiinnassanngilaat, aamma nutaarsiassamik nuannersumik oqaluussisartunngornissaannut ilinniartittariaqarpaat. Qanoq siuariartortumik taamaaliortoqarsinnaava?
2. Angajoqqaat maligassiuilluarneratigut meeqqatik qanoq sunnersinnaavaat?
2 Maligassaalluartoq: Eqqartuussisoq Gideoni angutinut 300-inut oqarpoq: “Isigisinga issuarlungalu.” (Eqq 7:17) Meeqqat angajoqqaatit isigalugillu ilaartarpaat. Ataataasup unnuarsiortartup arfininngornikkut ullaakkut angerlaraangami qasungaaraluarluni innaannarnani meeqqani angalaaqatigisarpai. Oqaaseqanngikkaluarluni oqaluussinerup salliutinneqartariaqarneranik ilinniartippai. (Matt 6:33) Meeqqassi pallorfiginneriaatsinut assigiinngitsunut nuannaarlusi iliuuseqartusi, assersuutigalugu qinususi, Biibilimik atuartusi, ataatsimiinnermi akisusi oqaluussisusilu takusarpaasi? Soorunami naammalluinnartumik maligassiuinavianngilasi. Meeqqasi Jehovamik pallorfiginninnissaannik ilinniartinniarlugit ilungersornisi ajunngitsumik qisuariarfigeqqajaanerussavaat eqiasuillusi Jehovamut kiffartortusi takugunikku. — 5 Mos 6:6, 7; Rom 2:21, 22.
3. Siuariartortumik anersaakkut anguniakkat suut anguniagareqqullugit angunissaannullu angajoqqaat meeqqatik ikiortariaqarpaat?
3 Siuariartortumik anguniagaqarneq: Angajoqqaat qasusuillutik meeqqatik pisuttalernissaannik, oqaluttalernissaannik, atisalersortalernissaannik allanillu ilinniartittarpaat. Meeqqat peroriartornerminni taakku angugaangamikkit nutaanik anguniagaqartittarpaat. Angajoqqaat kristumiuuppata meeqqatik, ukiui piginnaasaallu naapertorlugit, anersaakkut anguniagaqarnissaannik angusinissaannillu ikiortarpaat. (1 Kor 9:26) Meeqqasi namminneq oqaatsiminnik akisarnissaannik Teokratiimillu Ilinniarfimmi pisassaqaraangata namminneq sanasarnissaannik ilinniartittarpisigit? (Tuss 35:18) Oqaluusseriaatsinut assigiinngitsunut peqataasarnissaannut ilinniartittarpisigit? Kuisinnissaq piffissarlu tamaat kiffartornissaq anguniagareqqullugit ikiortarpisigit? Iivangkiiliumik oqaluussisartut nuannaartut angorniortullu meeqqasinnut kajumissaarisinnaasut attaveqatigiittarnissaannut periarfissarsiortarpisi? — Uss 13:20.
4. Meeqqat mikineraniilli angajoqqaat oqaluussinermut ilinniartitsinerat meeqqat qanoq iluaqutigissavaat?
4 Tussiaasiortoq ima oqarpoq: “Guuti, inuusunninnilli ajoqersorparma, tupinnartuliatillu oqaluttuariuarpakka.” (Tuss 71:17) Meeqqasi mikineraniilli oqaluussisartunngornissaannut ilinniartilersigit. Qularnanngitsumik, anersaakkut toqqammavissaq ineriartortissimasarsi inersimasunngorunik iluaqutigissavaat. — Uss 22:6.