Guutimik ilumoortumik ilisarsineq inuunermut naassaanngitsumut sammivoq
1 Ataataminut qinunermini Jesus ima oqarpoq: ’Tassaavorli inuuneq naassaanngitsoq: illit ilisaralutit kisivit ilumut Guutiusutit.’ (Juá. 17:3) Akissarsiassap angissusia! Atuakkap Ilisarsineq inuunermut naassaanngitsumut sammisoq-p atortarneratigut allat takutissinnaavavut qanoq iliorunik inuuneq naassaanngitsoq angusinnaagaat. Qanoq oqarsinnaavugut soqutiginnilersitsiniarluta, atuakkamillu ’Ilisarsineq’-mik atuarusulersitsiniarluta?
2 Allassimaffik Matîuse 7:12 qupperuk, imminut angalaaqatigisallu ilisaritigit, imalu oqarlutit:
◼ „Ullumikkut inuit amerlanerusut Biibilimik atuartalissappata qanoq iliortoqarsinnaanersoq pillugu oqaloqatigaavut. Illit qanoq isumaqarpit? [Tusarnaarluarit oqaasiinullu akissuteqarlutit.] Amerlanerit Biibilimik atuartartuuppata tassanilu najoqqutassat maleruartuuppatigik ullumikkut silarsuaq inuuffigisarput allaanerulluinnassagaluarpoq. Piviusoq manna assersuutigilaarlara. [Matîuse 7:12-p ilaa siulleq atuaruk.] Tamanna ilumuunnginnerluni? Najoqqutassaq taannaannarluunniit malinneqartuuppat silarsuaq manna ajunnginnerussanngikkaluarnerpa? [Pulaagaq isummaminik ersersitsisinnaavoq.] Massakkut immaqa oqartoqarsinnaagaluarpoq Biibili atuarnissaanut piffissaqarfiginagu, assersuulli manna tusariassagit. [Qupperneq 12-imi immikkoortoq 3 atuaruk. Assersuut naatsumik oqaaseqarfigiuk.] Kapitalimi eqqartorneqarpoq sooq inuit qaammarsagaalluartut upperigaat Biibili atuagaasoq tatigisassaalluartoq ilumooruttariaqartorlu. Atuagaq tigusinnaavat kapitalimilu eqqartorneqartut nammineq atuarsinnaavatit. Piumaguit atuagaq pisinnaavat, perusunngikkukku tulliani aggeqqikkuma tunniutiinnarumaarpat.“
3 Periarfissaq alla:
◼ „Apeqqummik immaqa eqqumiiginarsinnaagaluartumik aperilaarniarpakkit: „Isumaqarpit ilisarsinermik inunnik inuunermik naassaanngitsumik tunisisinnaasumik nassaassaqartoq? [Pulaakkat akili.] Jesus oqarsimavoq ilisarsinermik taama ittumik nassaassaqartoq. [Juánase 17:3 atuaruk versilu nassuarlugu.] Tamanna qanoq isumaqarfigaajuk? [Pulaakkat tusarnaarluaruk. Atuagarlu ’Ilisarsineq’ takutillugu.] Kapitali 4-imi eqqartorneqarpoq maannakkut Jesus qanoq inissisimaffeqartoq. [Qupperneq 41-imi immikkoortoq 18-imi oqaaseqatigiit kingulliit tallimat atuakkit.] Kapitalimi aamma eqqartorneqarpoq tamanna siunissatsinnut qanoq pingaaruteqartoq. [Qupperneq 42-imi immikkoortoq 20-mi oqaaseqatigiit siulliit atuakkit.] Pissutsit taamaattut qanoq isumaqarfigaagit? [Pulaakkat akili.] Pissutsit taamaattut misigissagutsigik Guutimik erneranillu ilisarsisariaqarpugut. Atuakkap uuma tamatuminnga ikiorsinnaavaatigut. Kapitali tamaat atuarsinnaavat, taava immaqa ullualuit qaangiuppata eqqartugarput nangillugu misissuataarsinnaavarput.“
4 Torrutiinnarlugu atuaqqissaaqatiginnilernissaq misilikkusuppiuk? Siunnersuut aana immaqa atorsinnaasoq:
◼ „Akeqanngitsumik Biibilimik atuaqqissaaqatiginninnissaq neqeroorutigaarput. Siornatigut tamanna misilissimaviuk? [Pulaakkat akili.] Atuaqqissaaraangatta atortakkatsinnik takutilaarlakkit.“ Atuagaq ’Ilisarsineq’ takutiguk quppernerlu 3 qupperlugu, pulaakkap imaasa allattorsimaffiat takuniassammagu. Aperiuk: „Biibilimi tamakku qanoq oqaatigineqarnersut eqqarsaatigisimaviuk?“ Kapitali pulaakkap soqutiginartinnerusaa qupperuk, qulequtaalu atuarlugu. Atuaqqissaarnermi qanoq immikkoortoq sammisarnerlutigu nassuiaaguk. Atuaqqissaaqatigineqartalissagaluaruni imaluunniit naami, pulaakkap atuagaq atuassaguniuk pisinnaavaa.
5 Ullumikkut inuppassuit Guutimut ilumoortumut eqqorluartumik ilisarsilerlutik ajunngitsumik iliuuseqalersimapput. (Jes. 2:2-4) Uagut pisinnaatitaaffigaarput allat sapinngisamik amerlasuut ikiornissaat Jehovamik ilisarsisinnaaqqullugit taamaalillutik naassaanngitsumik inuusinnaaqqullugit. 1 Tim. 2:4. (kmD 3/96 Kundskab om den sande Gud fører til liv)