Guutip oqaasia eqqortumik atorpiuk?
1 Jesus Kristus tassaavoq nunami inuusimasuni tamani ajoqersuisoq annerpaaq. Inuit uummataannik attuisarpoq, inuit misigissusii attortarpai ajunngitsumillu iliulernissaannik kajumilersittarlugit. (Mat. 7:28, 29) Ajoqersuinini tamatigut Guutip oqaasiinut tunngaveqartittarpaa. (Lúk. 24:44, 45) Ilisimasani ajoqersuisinnaaninilu pillugit Jehova Guutimut ataqqinaat pisittarpaa. (Juá. 7:16) Jesus Guutip oqaasianik eqqortumik atuinermigut ajoqersukkaminut maligassaalluarpoq. — 2 Tim. 2:15, NV.
2 Apustili Paulus maligassaasimavortaaq Guutip oqaasianik eqqortumik atuisarnermigut. Allanut Allakkat atuffassissutigiinnartanngilai; atuakkani nassuiartarpai, tusarnaartiminullu eqqarsalersitsiniartarluni Guutip oqaasia ikiortigalugu nassuiaaffigisarlugit Jesus Mesiassiusoq. (ap. sul. 17:2-4) Ajoqersugarlu oqallorissoq Apollos aammattaaq ’allakkani allassimasunik ilisimasaqangaartoq’ allakkanik eqqortumik atuilluarpoq sallusuissut sunniuteqarluartumik oqaluussissutigigamiuk. — ap. sul. 18:24, 28.
3 Guutip oqaasia tunngavigalugu ajoqersuineq: Ullumikkut oqaluussisartut inuit ilumoorusuttut ajoqersoraangamikkik Biibilimut innersuussisaramik tunngavigalugulu eqqarsalersitsisaramik angusaqarluartarput. Ilaanni qatanngutip Hesekiel 18:4 allassimaffiillu allat atorlugit palasi allallu pingasut palaseqarfimmut ilaasortaasut ajortut ilumoortullu toqunissaat pillugu apeqqut sammivaat. Tamatuma kinguneraa oqaluffimmi ilaasortat ilaasa atuaqqissaaqatigineqartalernerat ataatsillu sallusuissummik ilassinninneranik. Pisumi allami qatanngutip arnap arnaq soqutiginnittoq pulaaqqippaa sallusuissummut akerliulaartumik uilik. Arnap qatanngut arnaq qinnuigaa uini nassuiaatilaaqqullugu sooq Jehovamut nalunaajaasut juulli inuuissiornerlu nalliuttorsiutigineq ajorneraat. ’Ræsonnerebog’-imiit toqqaannartumik akissutit Biibilimeersut atuarpai, angutillu oqaluussisartoq isumaqatigalugu ersersippaa. Nuliata uimi qisuariarnera nuannaajallaatiginermik oqarpoq: „Ataatsimiittarnissinnut maannakkut aggertalissaagut.“ Uiata tamanna akueraa.
4 Ikiuutissat pineqarsinnaasut atukkit: Naalagaaffimmut Kiffartorneq Kiffartornermut tunngasumik ataatsimiinnermi saqqummiunneqartartut sallusuissutsip oqaasiinik eqqortumik atuinissatsinnik pitsaasunik siunnersuuteqartarput. Oqaluussisartorpassuit siunnersuutit assigiinngitsut atuarsinnaasavut saqqummiusseriaatsillu takusinnaasavut pillugit pingaartitsinertik ersersissimavaat; sunniuteqarluartarsimapput. ’Ræsonnerebog’-imi siunnersuuterpassuaqarpoq Guutip oqaasiani sammineqartunik allaatigisat pingaarnerusut 70-init amerlanerusut qanoq ililluni eqqortumik nassuiarneqarsinnaanerannik. Atuagaq ’Ilisarsineq’ Biibilip ajoqersuutaanik tunngavianik nutaat paasisariaqagaannik naatsumik allaatiginnippoq. Atuakkami ’Skolehåndbog’-imi Ilinniagassaq 24-mi 25-milu takutinneqarpoq ilinniartitsisoq pikkorissoq qanoq Biibilimut innersuussisarsinnaasoq, qanorlu atuffassisarsinnaasoq allassimaffiillu qanoq atortarsinnaagai. Ikiuutaasinnaasunik atuilluartariaqarpugut.
5 Guutip oqaasia eqqortumik atorutsigu paasissavarput nalunaajaaffigisatsinnut ’Guutip oqaasia uumasoq killinnartorsuullunilu . . . uummatillu eqqarsaatai isumaalu killisiorsinnaallugit’. (Epr. 4:12) Biibilip atorneratigut angusaqarluaraangatta suli nakimaannerulluta oqalunnissatsinnut ikiussavaatigut. — ap. sul. 4:31.