Allanik ajoqersuinissamut pilersorneqarneq sapinnginnerlu
1 Moses Jehova sinnerlugu sassartartussatut toqqarneqarsimavoq misigisimallunili Faraomut Guutip oqaasianik tusarliussisussatut piukkunnarani. (2 Mos. 4:10; 6:12) Jeremias Guutimut oqarami qanoq oqalunnissaminik nalulluni ersersippaa Jehovap pruffiitiatut kiffartornissaminut piginnaaneqarnissani qularalugu. (Jer. 1:6) Naak aallaqqaammut saperlutik misigigaluarlutik pruffiitit taakkua marluullutik takutippaat Jehovamut nalunaajaasuullutik qunusuitsut. Suup piukkunnarsisippai? Jehovap suliassiissutiminik naammassinnissinnaanngortillugit ikiorpai!
2 Jehovap pisariaqartitatsinnik isumassormatigut kiffartuussinerput naammassisinnaavarput. (2 Kor. 3:4, 5; 2 Tim. 3:17) Mekanikeritut piginnaaneqartutut sakkussalersorluarsimasutut kiffartuussinitsinnik naammassinninnissatsinnut sakkulersorluarsimavugut. Januaarimi atuakkat 192-inik quppernillit 1984 sioqqullugu saqqummersinneqarsimasut tamaasa neqeroorutigissavavut. „Sakkut“ taakkua nutaajunngillat Biibililersaarutinilli imaqaramik suli atorluarsinnaapput inuillu sallusuissummik ilisarsinissaannik ikiorsinnaavaat. Atuakkamut neqeroorutiginiakkamut siunnersuutit tulliuttut naleqqussarneqarsinnaapput.
3 Ilinniagaqarneq eqqartussallugu immaqa Guutip oqaasianut soqutiginnilersitsisinnaavoq. Oqaloqatigiinneq aallarnerlugu ima oqarsinnaavutit:
◼ „Ullumikkut ilinniagaqarluartuunissaq pingaartinneqarpoq. Pilluarneq annerpaaq aammalu inuunermi iluatsilluarneq qulakkeerniarlugu ilinniagaqarneq sorleq tigusariaqarnersoq qanoq isumaqarfigaajuk? [Pulaakkat akili.] Guutimik ilisarsinermik pigiliussisut naassaanngitsumik iluaqutigisinnaavaat. [Ussatit 9:10, 11-lu atuakkit.] Una atuagaq [atuakkap qulequtaa eqqaajuk] Biibili tunngavigalugu allanneqarsimavoq. Ilisarsinermut inuunermut naassaanngitsumut sammisutuamut tikkuussisuuvoq.“ Atuakkamiittumik immikkut takutitaqarit. Pulaakkat soqutiginnippat atuagaq pisinnaavaa pulaaqqinnissaanillu isumaqatigiissuteqarfigineqarsinnaavoq.
4 Tullianik naapikkukku ima oqarsinnaavutit:
◼ „Kingullermik oqaloqatigiissutigaarput naassaanngitsumik siunissaqarnitsinnik qulakkeerisumik Biibilip ajoqersorsinnaagaatigut. Soorunami tamakkuninnga paasiniaassagaanni iliuuseqartariaqarpoq. [Ussatit 2:1-5 atuakkit.] Inuppassuit isumaqarput Biibilimi allassimasut ilaat paasiuminaatsuusut. Periaatsimik Biibilip tunngaviusumik ajoqersuutaanik inuppassuit ilinniarnerusimanerannut iluaqutaasimasumik takutitsiffigerusuppakkit.“ Atuakkamit pulaakkavit pisimasaanit toqqagaqarit naatsumillu takutillugu Biibilimik atuaqqissaartarneq qanoq ingerlanneqartartoq. Pulaakkat Biibilimik atuaqqissaarnissamik soqutiginnippat Biibilimik atuaqqissaarutigisartagarput Ilisarsineq inuunermut naassaanngitsumut sammisoq nassarlugu aggeqqikkumaarlutit nassuiaassinnaavat.
5 Inuppassuit eqqissiunnaarutigaat meeqqat millionilippassuit silarsuarmi naalliuuteqarnerat. Immaqa pulaakkat takutissinnaavat Guutip tamatuminnga qanoq isiginninnera. Ima oqarsinnaavutit:
◼ „Qularnanngitsumik nutaarsiassanik aallakaatitani takusimassavatit meeqqat kaattut, napparsimasut isumagineqanngitsullu. Sooruna ikiuiniaqatigiit assigiinngitsut pissutsit pitsaanerulersissinnaasimanngikkaat? [Pulaakkat akili.] Guutip ajunnginnerpaamik kissaappaatigut. Malugiuk meeqqanut inersimasunullu neriorsuutigisaa. [sarĸúmersitat 21:4 atuaruk versilu oqaaseqarfigalugu.] Uuma atuakkap [qulequtaa eqqaajuk] silarsuassaq nutaaq atuariigarput pillugu annertunerusumik paasissutissaqartippaatigut.“ Ajornanngippat Paratiisimik assiliaq takutiguk oqaaseqarfigalugulu. Atuagaq neqeroorutigiuk aggeqqinnissannillu isumaqatigiissuteqarfigalugu.
6 Pulaarninni siullermi meeqqat naalliuuteqartarnerat eqqartorsimagussiuk tullianik oqaloqatigiinneq nangillugu ima oqarsinnaavutit:
◼ „Kingullermik maaniikkama malugisinnaavara angerlarsimaffinni avissaartuunnerit, kaannersuit, nappaatit nakuusernerillu pissutigalugit meeqqat naalliuuteqartut isumakuluutigigitit. Tuppallernaqaaq Biibilimi silarsuaq nappaateqanngitsoq, anniartoqarfiunngitsoq toqumillu aliasuffiusoqanngitsoq atuarsinnaallugit. Pruffiitip Jesajap allagaani allaatigineqarpoq qanoq ilillutik pissutsit qanittukkut nunarsuarmi pitsaanerulerumaartut.“ Jesaja 65:20-25 atuakkit oqaaseqarfigalugillu. Atuagaq ’Ilisarsineq’ atorlugu Biibilimik atuaqqissaaqatigilerniaruk.
7 Inuit upperisarsiortut amerlanerit qinuneq atortarmassuk oqaloqatigiinneq ima aallarnersinnaavat:
◼ „Amerlanerusugut arlaatigut ajornartorsiorsimassagunarpugut ikioqqulluta Guutimut qinutitsisumik. Amerlanerilli misigisarput qinnutitik akineqarneq ajortut. Aammattaaq upperisarsiornikkut siuttut eqqissinissamik qinusut tusarneqannginnguatsiarput. Sorsunnerit nakuusernerillu inuit nalaattuartarpaat. Ilumut Guuti qinnutinik tusarnaartarnerpa? Taamaaliortarsimassappallu sooq qinnutigineqartorpassuit akineq ajorpai? [Pulaakkat akili. Tussiaat 145:18-ip eqqartorpaa qinnutivut akineqassappata sumik piumasaqaateqartoq. [Allassimaffik atuaruk.] Guutimut qinnutit ilumoorluni qinnutigineqartariaqarput sallusuissummullu Biibilimiittumut naapertuuttariaqarlutik.“ Atuagaq neqeroorutiginiakkat takutiguk qinnutillu naleqassusianik qanoq oqaaseqarnersoq erseqqissarlugu.
8 Qinnut pillugu oqaloqatigisimasannut pulaaqqiiguit ima oqarsinnaavutit:
◼ „Qinnut pillugu oqaloqatigiissimanerput nuannarisimavara. Tassunga atatillugu eqqarsaatigaara suut qinnutigineqarsinnaasut pillugit Jesusip unnersuussutaa.“ Matîuse 6:9, 10 atuaruk erseqqissarullu siullermik pingaarnerusumillu qinnummi Jesusip suna eqqarsaatigineraa. ’Ilisarsinermi’ kapitali 16 takutiguk, „Qanoq ilillutit Guutimut palligussinnaasutit“, neqeroorfigiuk takutikkumallugu kapitali qanoq atuaqqissaarneqarsinnaasoq.
9 Allat Guutimik ilisarsinissaannik ikiornissaat eqqarsaatigalugu ima aperisinnaavugut: ’Kia tamakku sapinngilai?’ Biibili ima akissuteqarpoq: ’Uagut.’ — 2 Kor. 2:16, 17, NV.