Ikiorti-pioneriorusuppit?
1. Sooq kiffartornerunissamut eqqaaniaalluni nalliuttorsiornissap nalaa piffissaalluartuua?
1 Eqqaaniaalluni nalliuttorsiornissap nalaa kiffartornerunissamut piffissaalluartuuvoq. Jehovap asanningaarnermigut ernerminik utertitsissutitut tunniussisimaneranik eqqarsaatiginninnissatsinnut piffissanngorpoq. (Joh 3:16) Tamatumunnga qujamasungaarnitta allanut Jehova pillugu aamma inuiannut qanoq iliorsimanera pillugu oqaluussinissatsinnik killippaatigut. (Es 12:4, 5; Luk 6:45) Aamma taamaalinerani ilisarisimasatsinnik inunnillu angalaarfigisartakkatsinniittunik eqqaaniaalluta nalliuttorsiornissatsinnut qaaqqusilluta immikkut suliniuteqarnissamut piffissaavoq. Tamatuma kingornatigut najuuttut soqutiginninnerat ineriartorteqqinniarlugu ilungersussaagut. Marsimi, apriilimi maajimiluunniit ikiorti-pioneriullutit kiffartornerulerusuppit?
2. Sooq marsip qaammataa ikiorti-pioneriunissamut pitsaassava?
2 Marsip qaammataa immikkut ittuutiguk: Marsip qaammataa ikiorti-pioneriunissamut pitsaalluinnassaaq. Qinnuteqarniartut namminneq aalajangersinnaavaat nalunaaqquttap akunneri 30-t imaluunniit 50-it anguniarusunnerlugit. Nakkutilliisoq angalasartoq marsimi ilagiinni tikeraartorineqarpat ikiorti-pionerit, pionerit specialpionerillu ilagalugit ataatsimiinneq tamakkerlugu peqataaffigisinnaavaat. Eqqaaniaalluni nalliuttorsiornermut qaaqqusinissamut, marlunngorneq marsip 26-anni 2013-imi pisussamut, immikkut suliniuteqarneq ukiut siuliinut naleqqiullugu sivisunerussaaq marsillu 1-iani aallartinneqassalluni. Aamma marsip qaammataani sapaatip akunnerisa naaneri tallimaapput. Soormi ukiup ingerlanerani qaammat taanna immikkuullarissunngortinnianngiliuk?
3. Angalaarnerunissamut qanoq pilersaarusiorsinnaavugut?
3 Pilersaarusiulereerit: Ikiorti-pioneriunissamut pisariaqartunik allannguinissannik pilersaarusiulereerit. Ilaqutariittut suleqatigiinneq pingaaruteqarpoq, taamaattumik qanoq anguniagaqarnerlusi ilaqutariittut atuaqqissaaqatigiinnermi oqaloqatigiissutigisiuk pilersaarusiorlusilu. (Uss 15:22) Ikiorti-pioneriusinnaanngikkuit nikalloqinak. Ulluni oqaluussiffiusuni sivisunerusumik angalaarsinnaanerlutit pilersaarusiorsinnaavit? Sapaatip akunnerani ullut angalaarfigisartakkatit ilasinnaavigit?
4. Marsimi, apriilimi maajimilu suliniuteqarnerput qanoq kinguneqarluassava?
4 Marsimi, apriilimi maajimilu suliniuteqarnerunitsigut nuannaarneq nalerisimaarnerlu, Jehovamut kiffartornitsigut allanullu ingerlatitseqqinnitsigut pigiligaarput, misigissavavut. (Joh 4:34; ApS 20:35) Pingaarnerusumilli imminut pilliutigeriaannaanerput Jehovamut nuannaarutaassaaq. — Uss 27:11.