Atuaqqissaaqatigisartakkavut Jehovap peqatigiissortaanut siulersorpavut
1 „Tusarliussaq oqaatsini 200-ini oqaluussissutigaat. Tusarliussaq nunani 210-ini tusarliunneqarpoq — sumiluunniit inunilinni. Oqaluussiniarnerit annersaraat, tusarliussaq nunarsuaq tamakkerlugu inunnik millionilikkuutaanik ataasiussuseqalersitsisoq. Jehovap Nalunaajaasui suliamut tamatumunnga naammassinninnissamut ukiut hundredellit matuma siornali aaqqissugaasimapput.“
2 Videofilmip Jehovas Vidner og deres organisation taama aallaqqaasiuteqarpoq. Kingusinnerusukkut filmimi apeqqutit makkua akineqarput: „Jehovap nalunaajaasui kikkuuppat? Sulinerat qanoq aaqqissugaava? Qanoq aqunneqarpa aningaasalersorneqarlunilu? Filmimi oqaatigineqarpoq: „Nunarsuaq tamakkerlugu Jehovap Nalunaajaasui peqatigiiffittut ajoqersorneqarput allanik Biibilimik upperinnilernissaannut ikiuisinnaanngorlutik.“ Tamanna isiginnaartunut erseqqissaaq aammattaaq kajumissaarneqarput namminneq Jehovap peqatigiissortaasa qanoq ingerlanerannik misissoqqullugu. Arnaq Biibilimik atuaqqissaartalersimasoq filmi takugamiuk qujamasungaarami nuannaarnerup pianik qullilisimavoq. Ima oqarpoq: „Sooruna inuit takusinnaanngikkaat tassaasoq peqatigiiffik Guutip ilumoortup, Jehovap, atortagaa?“ — Naleqqiuguk 1 Korintumiut 14:24, 25.
3 Arnaq alla Biibilimik sivisuumik assigiinngisitaartumik atuaqqissaartarsimasoq, ataasiullunilu pingasuusumik ajoqersuutip ilumuunnginneranik akuerinnikkumasimanngitsoq. Uinilu videofilmi isiginnaarsimavaat. Killitsissutigingaaramikku unnuk taanna marloriarlugu isiginnaarsimavaat. Tullianik atuaqqissaartussanngoramik arnap Jehovap nalunaajaasunngorusunnini ersersissimavaa. Oqarpoq ataasiullunilu pingasuusumik ajoqersuummut isumaqarfiginninnini aaqqissugaanitta takunissaaninngarnit eqqarsaatigivallaarsimallugu. Videofilmip qularunnaarsissimavaa tassaasut Guutip peqatigiissortai. Ingerlaannaq illumiit illumut oqaluussisarnermut peqataasalerusuppoq. Nassuiaanneqarami kuisimanngitsutut oqaluussisartunngussaguni suna sulissutigissallugu, ima oqarsimavoq: „Iluarsigasuartariaqarpakka.“ Oqaluffeqarfimmit anivoq, oqaluussisalerluni ataasiullunilu pingasuusumik ajoqersuummut akerliliisarneq pikkoriffigillualerlugu.
4 Takutinneqarsimavoq Biibilimik atuaqqissaaqatigisartakkat siuariartupallattartut ineriartorlutillu Jehovap peqatigiissortai akuerigaangamikku tassungalu atassuteqaleraangamik. Maluginiarnartuusimavoq piinsip ulluani inuit 3000-t kuisimmata ’taakkualu apustilit ajoqersuineri . . . aalajangerfigigaat’. (Ap. sul. 2:42) Pingaaruteqartorujussuuvoq uagut aamma atuaqqissaaqatigisartakkavut taamatulli iliornissaannik ikiussallutigik. Qanoq iliortarpugut?
5 Inersimasutut akisussaaffeqarit: Ajoqersuganngortitsiniaraanni kialuunniit ilinniartoq Guutip peqatigiissortaanut siulersussallugu akisussaaffeqarnini paasisariaqarpaa. (1 Tim. 4:16) Atuaqqissaaqatigiinnerit tamaasa ilinniartup ullussamut nuannersumut Jehovamut tunniulluinnarluni imermut kuisinnissaanut siuariarnertut isigineqartariaqarput. Kuisilernermi apeqqutigineqartussat ilaat imaappoq: „Paasilluinnarpiuk tunniulluinnarnikkut kuisinnikkullu Jehovap nalunaajaasuinut, ilagiit Guutip anersaamigut siulersugai peqatigalugit kiffartortunut, ilannguttutut nalunaarlutit?“ Paasisariaqarpaa Guuti kiffartuussinnaanngikkaa kristumiut ilumoortut ilagiissaannut ilaanngikkuni. — Mat. 24:45-47; Juá. 6:68; 2 Kor. 5:20.
6 Ilagiit pillugit Jehovallu Nalunaajaasuisa nunarsuaq tamakkerlugu peqatigiiffiat pillugu ilinniartumut oqaluttuartarit. Tamatigut atuaqqissaaqatigiikkaangassi taama iliortarit atuaqqissaaqatigiinnerup aallartinneraniit ingerlaannarlutit. Ilinniartoq ataatsimiittarnernut qaaqqujuk, qaaqqusarneralu ingerlatiinnarlugu. — Sar. 22:17.
7 Atortussat pigineqartut atukkit: Biibilimik atuaqqissaaqateqarnissamut atortussatta pitsaanerpaartarivaat atuagassiaaraq Guutip sumik piumaffigaatigut? atuagarlu Ilisarsineq inuunermut naassaanngitsumut sammisoq. Atuagassiat taakkua ersersippaat ilagiit ilagisarlugit qanoq pingaaruteqartigisoq. Atuagassiaaqqami ilinniagassaq 5-imi naggataani allassimavoq: „Jehova ilinniartuaannartariaqarpat piumasaqaataalu malittuarlugit. Najukkanni Jehovap nalunaajaasuisa naalagaaffilersaartarfianni ataatsimiinnerit taamaaliornissannut iluaqutigissaqaatit.“ Atuakkap ’Ilisarsinerup’ arlaleriarluni ilinniartoq kajumissaartarpaa ataatsimiinnernut aggertarnissaanik. Kapitali 5-imi, immikkoortoq 22-imi, qaaqqusissut ima nipeqarpoq: „Jehovap nalunaajaasuisa . . . kajumissaarpaatsit peqatigalugit Guuti ’anersaakkut ittumik ilumoortumillu’ pallorfigeqqullugu. (Juánase 4:24)“ Kapitali 12-imi, immikkoortoq 16-imi, allassimavoq: „Biibilimik atuaqqissaartuaannaruit Jehovallu nalunaajaasuisa ataatsimiittarnerinut aggertarneq ileqquliukkukku qularnanngivissumik uppernikkut aamma suli nukittunerulissaatit.“ Kapitali 16-imi, immikkoortoq 20-imi, oqaatigineqarpoq: „Taamaattumik Jehovap nalunaajaasuisa ataatsimiittarnerinut najuuttarneq ileqquliunniaruk.“ Nangilluni ima oqaatigineqarpoq: „Taamaalioruit Guuti pillugu ilisimasatit inuuninni atorsinnaanerulissavatit, tamannalu pilluarnerulissutigissavat. Kristumiunut nunarsuaq tamakkerlugu qatanngutigiissuarnut attaveqarnerpit Jehovamut qanilliniarnerit oqinnerulersissavaa.“ Aammalu kapitali 17-imi eqqartorneqarpoq qanoq Guutip innuttaani toqqissisimaneq nanineqarsinnaasoq. Allanik atuaqqissaaqateqaraangatta uagut tamakku erseqqissartarnissaat akisussaaffigaarput.
8 Atuagassiaaraq Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut sakkussaalluartuuvoq saqqummersinneqarsimasoq inunnut ataasiakkaanut ilimasimatitsissutiginiarlugu ullumikkut Jehovap takussaasumik peqatigiissortai piumasaminik naammassinninniarnermini atortagatuarigaa. Oqaluussisarnerput, ataatsimiittarnivut aaqqissuussinerlu pillugit annikitsualuit ilanngullugit paasissutissiinerata atuartoq kajumissaassavaa ilagaluta Guutimik pallorfiginninnissaanik. Biibilimik atuaqqissaaqateqartalerutta siunnersuutigineqarpoq ilinniartoq atuagassiaaqqamik tunissagipput taamaalilluni nammineerluni atuarniassammagu. Soorlu siornatigut taama pisarsimagaluartugut maanna pisariaqassanngilaq tamatuminnga atuaqqissaaqatiginissaa.
9 Ilinniartup Guutip peqatigiissortaanut siulersornissaanut Peqatigiiffiup videofilmiutaasa ilaat sakkussaalluartuupput. Pitsaassagaluaqaaq takusinnaappatigik: (1) Den Nye Verdens Samfund i Virksomhed, filmi 1954-imeersoq Jehovap peqatigiissortaasa ajornartorsiutitaqanngitsumik, asannittumik sunniuteqarluartumillu ingerlanerannik takutitsisoq; (2) Oplæring fra Gud forener, ataasioqatigiinnermik nunanit tamanit peqataasulinni Europap kangiani, Amerika kujallermi, Afrikami Asiamilu ataatsiussuseqarnermik eqqissisimasumik ersarissumik takutitsisoq; (3) Ud til hele den vide Jord, Napasuliaq Alapernaarsuiffiup Biibilimik atuarfia Gilead ukiuni 50-inngorneranik malunnartitsisup takutippaa qanoq ajoqersuiartortitat nunarsuaq tamakkerlugu oqaluussilluni sulinermut sunniuteqarsimasut; (4) Jehovas Vidner står fast trods nazismens terror, Jehovap nalunaajaasuisa Hitlerip nalaani soqqusaatsumik malersorneqarlutik tatitunerannik ajugaasimaarnerannillu pissanganartumik pisimasumik oqaluttuarineqartoq, aammalu, soorunami, (5) Jehovas Vidner og deres organisation.
10 Ataatsimiittarnerit najuuffigisarnissaat anguniagariuk: Ilinniartut nassuiaanneqartariaqarput nammineq immikkut angerlarsimaffimmi Biibilimik atuaqqissaaqatigineqartarneq aammattaaq ataatsimoorluta ilagiit ataatsimiittarnerini eqqartueqatigiittarneq pisariaqartikkivut. (Juá. 6:45) Nutaat ineriartorlutik Biibilimik peqatigiiffimmillu pingaartitsileriartortariaqarput. Tamanna taamaallaat ilagiit ataatsimiittarnerinut najuuttarnikkut pisinnaavoq. (Epr. 10:23-25) Siusissukkut ataatsimiittarnernut qaaqqujuk. Soqutiginnilerlaat ilaat suli atuaqqissaaqatigineqartalertsinnatik ataatsimiinnerit najuuffigisarpaat. Uagullu soorunami maligassiuiumalluta aalajangersimasumik ataatsimiinnernut aggertarpugut. — Lúk. 6:40; Fil. 3:17.
11 Siusissukkut ilinniartoq ataatsimiinnerit qanoq ingerlanneqartarnerinik oqaluttuuguk siullerpaamik ataatsimiinnerit najuuffigippagit nalerisimaarluni misiginiassammat. Ilaat siornatigut iserfiginikuunngisaminnukassagaangamik annilaangasarput, taamaattumillu pitsaassaaq ilinniartoq siullerpaamik naalagaaffilersaartarfimmut ilagissallugu. Ilagiinnut ilaasut allat naapissagunigit tassaniinnerit toqqissisimassutigissavaa. Pulaartitannut pulaartitsisuulluarit; tikilluaqqusaasutut misigitiguk. — Mat. 7:12; Fil. 2:1-4.
12 Ilinniartoq pisussamut siullermut ataatsimeersuaararnermut imaluunniit ataatsimeersuarnermut najuunnissaanik kajumissaaruk. Immaqa angallataasut ilaannut ingerlaqatigisinnaavat.
13 Ilinniartoq uummatikkut pingaartitsilersitsiguk: Atuakkami Organiseret til at fuldføre vor tjeneste qupperneq 89-imi ima oqaatigineqarpoq: „Illit nammineq Jehovap peqatigiissortaanut pingaartitsilluinnarnerit soqutiginnittut oqaloqatigigaangakkit ersersittarukku oqinnerusumik pingaartitsileriartorsinnaapput, siuariartornerusinnaallutillu Jehova ilisariniarnerata tungaatigut.“ Ilagiit pillugit ajunngitsumik eqqartuiuaannarit ajortumik eqqartunngisaannakkit. (Tus. 84:11; 133:1, 3b) Ilinniartoq qinoqatigileraangakku pitsaassaaq ilagiit ilanngullugit ilinniartullu akuttunngitsumik ilagisarnissaannik pisariaqartitsinera eqqaasarukkit. — Evf. 1:15-17.
14 Qamannga pisumik kissaatigaarput nutaat Guutip innuttaasa akornanni ataqatigiinnermik nuannersumik anersaakkullu toqqissisimanermik sorlanissimasuni pingaartitsilluinnalernissaat. (1 Tim. 3:15; 1 Pît. 2:17; 5:9) Jehovap nalunaajaasuisut sapinngisatsinnik Guutip oqaasianik atuaqqissaartartut taassuma peqatigiissortaanut siulersorniassavavut.