Allat ataatsimeeqataasalernissaannik ikiukkit
1 „Eqqaamiugut tamarmik . . . ataatsimiigiaqataarusuttut tikilluaqqusaangaarput“. Novembarimi 1880-imi Zion’s Watch Tower-mi qaaqqusissut taamaattoq atuarneqarsinnaavoq, taamanimiilli Jehovap Nalunaajaasui Biibilimik ilinniartitsiumallutik ataatsimiigiaqqusillutik qaaqqusisalerput. (Saq. 22:17) Tamanna pallorfiginninnerup ilumoortup pingaarnersaraa.
2 Ataatsimiinnerit pingaaruteqassusiat: Ilagiinni ataatsimoortarnitsigut pilluaqquneqartaqaagut. Guuterput angingaartoq, Jehova ilisarisimanerulerparput. Ilagiinni ’Jehovamit ajoqersorneqarniarluta’ katersuuttarpugut. (Es. 54:13) Ilagiit kristumiut kipisuitsumik Biibilimik Jehovamut palligunnerulersitsisumik ilinniartitsisarput, ’Guutillu piumasaata tamakkiisup’ malinnissaanut ikiorneqartarluta. (Aps. 20:27; Luk. 12:42) Ataatsimiinnerni ilinniartarparput qanoq nammineq allat Guutip oqaasianik ilinniartissinnaallugit. Biibilimit ajoqersorneqarpugut qanoq allanut Jehovamullu pissusilersorsinnaasugut. Allallu Guutimut asannittut ilagisarutsigit uppernerput nakussatinneqassaaq. — Rom. 1:11, 12.
3 Ornillugit qaaqqukkit: Atuaqqissaaqateqaleruit atuaqqissaaqatigiinnalerlugilli ataatsimiigiaqataasarnissaannik qaaqqusarsinnaavatit. Allagartannguamik qaqugukkut ataatsimiittarnitsinnik allassimasumik tunikkit. Kingullermik ataatsimiinnermi ilinnut suna qiimmassaataasoq oqaluttuarineratigut soqutiginnilersitsigit, tullissaanullu suna oqaluuserineqarumaartoq eqqartullatsiarlugu. Naalagaaffilersaarfipput pillugu oqaluttuuguk, sumiittorlu paasilluarsimaneraa qulakkeerlugu.
4 Biibilimik atuaqqissaaqatigisartakkat qaaqqujuartaruk ingerlaannaq ataatsimiigiaqataasalinngikkaluarpaalluunniit. Sapaatip-akunneranut minutsialuit atortakkit peqatigiiffik pillugu oqaluttuarlutit. Atuagassiaaraq Jehovap Nalunaajaasui — Ataasiussuseqarlutik Guutip peqqusaanik silarsuarmi tamarmi naammassinnittut videofilmilu Jehova Vidner og deres organisation atorlugit ataatsimiittarnivut uagullu pilluta ilisarititsigit. Isumagiullu oqaluussisartut allat ilisarisimalernissaanut. Peqatigiiffimmik pingaartitsinerit qinnutinni ersersiguk, Biibilimillu atuaqatigisartakkat paasitiguk tassunga suleqataalernissani pisariaqartikkaa.
5 Soqutiginnittut ataatsimiigiaqataanissaat tunuarsimaarfigeqinagu. Jehovamik pingaartitsinerulerunik ilinniakkami malinnissaanut kajumississutiginerulissavaat Guutillu peqatigiissortaanut ataasiussuseqartunut ilanngullutik. — 1 Kor. 14:25.