Jesus malittuaruk
1 Jesus oqarsimavoq: ’Uannik malinnikkumasoq imminik isumakkiissaaq, [napasorlu anniartitaaffini, NV] ersullugu malissavaanga.’ (Mat. 16:24) Jesusip oqaasiinut ajunngitsumik qisuariarusuppugut. Taamaattumik qaaqqusissut sunik nassataqassanersoq misissoriartigu.
2 ’Imminik isumakkiissavoq’: Jehovamut inuunerput tunniulluinnaratsigu imminut naaggaarluta ersersipparput. Griikerit oqaasiat ’isumakkiineq’-mik nutserneqarsimasoq isumaqarpoq „naaggaarneq“, imaluunniit „misiutiginnilluinnarneq“. Tassa imaappoq nammineq anguniakkavut, ilorrisimaarnissavut, kissaatigisavut, namminissarsiortumik pilerigisavut taamaatillugit Jehova kiffartuuttuarniarlugu aalajangerluta. — Rûm. 14:8; 15:3.
3 ’Napasoq anniartitaaffini ersullugu’: Kristumiutut inuuneq tassaavoq imminut pilliutigeriaannaalluni Jehovamut kiffartornerup nappagaanik anniartitaaffimmik ersunneq. Imminut pilliutigeriaannaanerput ilaatigut takutissinnaavarput oqaluussinermut nukitta atornerisigut. Upernaaq manna oqaluussisartut amerlasuut ikiorti-pioneeriusimapput. Taakkua immaqa aamma illit ilagisimavaatsit, pilliutigisimasallu nalinga qaangerujussuarlugu pilluaqqussutinik pisimaneq uppernarsisinnaasimavat. Ikiorti-pioneeriusinnaasimanngitsorpassuillu ilagiinni oqaluussisartutut piffissamik annerusumik atuillutik oqaluussinissaminnut pilersaarusiorsimapput. Tamanna eqqarsaatigalugu ilagiit ilaat upernaaq manna siornatigut pisarnermit piaarnerusumik katersuutsitsisarsimapput taamaalillutik oqaluussiartornermut piffissaq atorluarniarlugu. Ilaasalu aalajangeraangamik ’naggammik ataatsimik pulaagassamik tigusinikkut’ imaluunniit angalaartarfigisami ’minuttialunni sivisunerulaarnerusumik’ angalaaraangamik kinguneqarluartittarsimavaat.
4 Imminut pilliutigeriaannaanermik ersersitsinissaq alla tassa inuttut immikkut anguniagalerneq. Pilersaarusiorluarnikkut piffissamillu pilersaarutigisamik naleqqussarnikkut ilaat naliginnaasumik pioneeriunissamik imaluunniit aalajangersimasumik ikiorti-pioneeriunissamik nalunaarsinnaasimapput. Allat pissutsit atukkatik aaqqissorsimavaat taamaalillutik Betelimi imaluunniit ajoqersuiartortitatut kiffartorsinnaallutik. Allat allamut oqaluussisartunik pisariaqartitsiffioqisunut nuussimapput.
5 ’Malittuarlungalu’: Naak ajoqersukkat misilinneqarnerpassuarnik nalaataqartaraluarlutik Jesusip oqaluussinikkut aallussilluartuuneranik aalajaattuarneranillu kajumissisinneqartarput. (Juá. 4:34) Najuunneratigut oqaluussisarneratigullu anersaakkut pissatsinneqarput. Taamaattumik taassuminnga malinnittut nuannaarnermik piviusumik pigisaqartut malunnartarput. (Mat. 11:29) Taamatuttaaq uagut immitsinnut qiimmassaqatigiitta Naalagaaffimmik oqaluussissutiginninnermik ajoqersuganngortitsinermillu suliamut pingaaruteqartumut aalajaattuarnissatsinnut.
6 Tamatta Jesusip qaaqqusissutaanut ajunngitsumik qisuariarta taanna malittuarlugu imminut pilliutigeriaannaassuseqarluta. Taama iliorutta maannakkut nuannaangaarneq siunissamilu pilluaqqussutissat amerlanerusut misigisinnaavavut.