Danmarkimi naalagaaffilersaartarfinnik sanaartorneq
1 Silarsuaq tamakkerlugu sulinerput eqqarsaatigalugu nuannersorujussuuvoq takullugu Jehovap nunarsuarmi peqatigiissortai qanoq amerliartuinnartut. Silarsuaq tamakkerlugu siornaannaq 366.579-it kuisipput. Amerliartorneq tamanna eqqarsaatigalugu, eqqarsaatigigutsigulu naalagaaffilersaartarfiit ilaat pisoqaanerusut nutarterneqartariaqartut tupinnanngilaq naalagaaffilersaartarfinnik sanaartortoqartariaqarmat.
2 Qatanngutit angutit arnallu amerlasuut aallussilluarlutik Jehovap peqatigiissortai tapersersortarpaat naalagaaffilersaartarfiliornermut kajumillutik piffissaminnik pigisaminnillu pilliuteqarlutik. Danmarkimi sanaartornermut ataatsimiititat marluk ilagiinni 233-ni pisariaqartitsinerit isumagisarpaat. Ukiut tamaasa sanaartornissat 6-8-it pilersaarusiorneqartarput, ukiullu 12-it kingulliit ingerlaneranni immikkoortortaqarfitta ataani naalagaaffilersaartarfiit nutaat 61-it sukkasuumik sanaartorneqarsimapput allallu 27-it annertuumik nutarterneqarsimallutik. Sanaartornermut ataatsimiititat illuliornerit tamakku nakkutigisarpaat, sulinerallu pingaartinneqaqaaq. Naalagaaffilersaartarfinnik sanaartornerit kristumiutut tukkussutsimik imminullu pilliutiginermik tunngaveqarput, tamannalu silarsuarmit avatitsinniittumit allaanerulluinnarpoq. — 2 Tim. 3:2, 4.
3 Naalagaaffilersaartarfiliornerit assigiissaarniarlugit Peqatigiiffiup sanaartornermut ataatsimiititat aqqutigalugit naalagaaffilersaartarfissanut nutaanut assigiinngitsunik angissusilinnut titartakkat assigiissaakkat sanasimavai. Taamaalilluni kajumillutik sanasut piffissartik aningaasallu sipaarsimavaat. Taamaalilluni naalagaaffilersaartarfiliorniaqatigiit Peqatigiiffiullu aningaasaataat atorluarneqarnerusimapput. Tamatigut Peqatigiiffiup aalajangertarpaa naalagaaffilersaartarfik qanoq angitigisoq naleqqunnersoq. Sanaartornerni paasisat nutaat takkuttuaannarmata ukiut tamaasa Peqatigiiffik sanaartornermullu ataatsimiititat ataatsimiittarput titartakkat assigiissaakkat sanaartoriaatsillu paasisanut naleqquttunngorsarniarlugit. Qatanngutit sanaartornermik misilittagallit naatsorsorsimavaat assigiissaakkanik sanaartoriaaseqarnitta piffissamik 50-60 procentinik sipaartikkaatigut. Aamma naalagaaffilersaartarfissanut najoqqutassat assigiinnerupput, taamaalillunilu titartaasartut, ingeniørit sanasullu kajumillutik ikiuuttut suliassanik amerlasuunik oqilisaanneqartarput.
4 Kajumissutsiminnik suleqataasut suliassat ajunngitsut tapersersortarpaat: Qujamasuutigaarput amerlasuut kajumillutik naalagaaffilersaartarfiliornernut ikiuuttarmata. Naalagaaffilersaartarfinnik sanaartornerni kajumillutik sulisut hundredelikkuutaat imminnut pilliutigisarput. Sanaartornerit naammassineqarsinnaasimassanngikkaluarput kajumissutsiminnik suleqataasut tukkunngikkaluarpata, piumassuseqarluanngikkaluarpata suleqatikkuminartuunngikkaluarpatalu; piffissaq ilagiinnut ilaquttaminnulluunniit atorsinnaasaraluartik pilliutigisarpaat. (Tus. 110:3; Kul. 3:23) Taamaattumik nersortariaqarput, pingaartinneqartariaqarlutik tapersersorneqarluartariaqarlutillu. — Rûm. 12:10; Epr. 13:1.
5 Sanatoornermut ataatsimiititanut ikiuussinnaasut tamarmik qinnuigineqarsimapput immersugassaq Frivillige medarbejdere ved bygning af rigssale (S-82) immersoqqullugu. Ilagiit immersugassaq, sulisup piginnaassussiinik periarfissarisinnaasaanillu takutitsisoq, sanaartornermut ataatsimiititanut nassiutissavaa. Kajumissutsiminik sulisumut tunngasunik allanngortoqarpat, soorlu nuuppat, ilagiinni kiffartortunngorpat utoqqaanertanngorpalluunniit immersugassaq nutaaq immersorneqartariaqarpoq, ilagiillu allatsiata nassiutissavaa. Kajumissutsiminik suleqataasoq piukkunnarunnaarpat utoqqaanertat ingerlaannaq sanaartornermut ataatsimiititat allakkatigut tamatuminnga paasitissavaat. Immersugassat Peqatigiiffimmit Holbækimiittumit piniarneqarsinnaapput. Aamma nakkutilliisut angalasartut kiffartornermut illernartumut tamatumunnga peqataajumasut soqutigaat. Taamaattumik ilagiit immersukkanik nalunaarsugaat ilagiinnut tikikkaanngamik misissortariaqarpaat.
6 Sanaartornermut aningaasartuutit minnerpaajutinniarneqartarput: Sanaartornermut ataatsimiititat naalagaaffilersaartarfiliorniaqatigiillu Peqatigiiffiup pisiniartarfia Silkeborgimiittoq qatanngutinit angutinit pikkorissunit ingerlanneqartoq suleqatigisarpaat. Tassani sulisut akinik neqeroorutinillu assigiinngitsunik misissuisarput atortussat sapinngisamik akikinnerpaat pissarsiariniarlugit. Taamaalillutik aalajangersinnaavaat pilersuisut kikkut attaveqarfigissanerlugit atortussallu suut atussanerlugit. Naalagaaffilersaartarfiliortoqaraangat qatanngutit angutit piukkunnaatillit ilagiinni pineqartuni immikkoortoq taanna suleqatigisarpaat.
7 Aningaasat atorluarneqartarnersut qulakkeerniarlugu sanaartornermut ataatsimiititat illuliornerni tamani naatsorsuutinik akuerseqqaartussaapput. Nutaamik illuliortoqaraangat imaluunniit nutarterisoqaraangat, ilagiinnit allanit kajumissutsiminit suleqataasoqaraangat sanaartornermut ataatsimiititat suliaq nakkutigissavaat.
8 Nunani allani naalagaaffilersaartarfinnik pisariaqartitsineq alliartuinnarmat aningaasat sapinngisamik atorneqarluartariaqarput. Taamaattumik ilagiit tamaasa kajumissaarniarpavut sanaartornerni nutarterinernilu sapinngisamik aningaasanik atorluaaqqullugit. Aningaasat Danmarkimi sinneruttut nunani immikkut pisariaqartitsiffiusuni naalagaaffilersaartarfiliornermut aningaasartuutinullu pisariaqartunut allanut atorneqartarput. Nuannaarutigaarput periarfissaqaratta nunani aningaasatigut ajornartorsiuteqarfiusuni suliassat tapersersorsinnaanissaannut.
9 Nunat ilaanni naalagaaffilersaartarfinnik pisariaqartitsisoqarnera ’atuakkami ukiumoortumi’ 1997-imoortumi erseqqissarneqarpoq. Assersuutigalugu eqqaaneqarpoq Ukraine, tassani manna tikillugu naalagaaffilersaartarfiit 47-t sananeqarsimapput, allallu 56-it maanna sananeqarlutik. Nunani taamaattuni pisariaqartitsineq ersarippoq, soorlu nalunaarusiami allassimasoq: „Ruslandimi naalagaaffilersaartarfippassuarnik pisariaqartitsisoqarpoq. Nunami tamatumani oqaluussisartut amerliartortorujussuupput, ilagiilli russit immikkoortortaqarfiata ataaniittut 85 procentii aalajangersimasumik ataatsimiittarfeqanngillat. Zimbabwemi 800-t missaanni ilageeqarpoq, amerlasuulli silami ataatsimiittarput. Soqutiginnittut ilaat tamanna pillugu ataatsimiigiarneq ajorput.“ Europap kangiani, Afrikami Latinamerikamilu nunat ilaanni tamatumunnga assingusumik atugaqarput.
10 Naak ulluni kingullerni makkunani inunni amerlasuuni asanninneq nillertunngorsimagaluartoq Guutip innuttai asaqatigiittuarput, inuiaqatigiit naggueqatigiillu akornanni killeqarfiit apeqqutaatinnagit. (Mat. 24:12) Ataatarput qilammiusoq malinniartigu asanninnerlu taama ittoq takutittuarlugu Danmarkimi nunanilu allani naalagaaffilersaartarfissanik sanaartornerit kajumilluta tapersersortarlugit. Taamaaliorutta pilluaqquneqangaassaagut Jehovamullu iluarisaassalluta. — Mal. 3:10; Epr. 6:10.