Silarsuaq tamakkerlugu naalagaaffilersaartarfinnik sanaartorneq
1 Silarsuaq tamakkerlugu naalagaaffilersaartarfiit amerliartuinnartut pisariaqartinneqarput. Ukiup oqaluussiffiusup kingulliup ingerlanerinnaani ilagiit nutaat 3288-t pilersinneqarsimapput. Taakkua ilaat amerlasuut Afrikami, Asiami, Amerikami Qiterlermi Kujallermilu aamma Europap kangiani pilersinneqarput.
2 Naalagaaffimmut Kiffartorneq-mi arlaleriarluta paasitinneqarsimavugut nunani amerlasuuni naalagaaffilersaartarfiliornermut tunngatillugu siumukarnerit pisarsimasut, sulili pisariaqartitat amerlaqaat. Nunami aalajangersimasumi 568-inik ilageeqartumi ataasiinnarmik naalagaaffilersaartarfeqarpoq. Nunami allami ilagiit 129-ugaangata ataatsit naalagaaffilersaartarfeqartarput. Nunami allami ilagiit 41-uugaangata ataatsit naalagaaffilersaartarfeqartarput. Nunanilu arlalinni 1000-init amerlanerusunik ilageeqarfiusuni naalagaaffilersaartarfeqanngivippoq. Tamatumunnga aningaasakilliorneq pissutaavoq. Naak tamatumunnga atatillugu angusaqarluartoqareeraluartoq suli suliassaqaqaaq. Qularinngilarput Danmarkimi ilagiit nuannaarlutik nunani allani ilagiit ikiorusussagaat tulluartunik naalagaaffilersaartarfeqalernissaannik.
3 Aalajangersimasumut atugassanngorlugit aningaasanik tunissuteqarsinnaanermut arlalinnik periarfissaqarpoq. Aningaasat toqqaarnartumik Peqatigiiffimmut nassiunneqarsinnaapput aningaasallu tamakku Europap kangiani atorneqartussatut nalunaarlugit. Peqatigiiffiup tunissut tamanna pillugu allakkat qujassutit nassiutissavai. Aamma qaammatit tamaasa oqaluussinermut tunngasumik ataatsimiinnerit aappaanni ilagiit aningaasanut nakkaatitsiviannut tapiissuteqartoqarsinnaavoq, unnuk taanna isertitat ilagiit Europap kangianut nassiuttarmatigik. Nunanit tamanit peqataaffigineqartumut aningaasaateqarfimmut nakkartarput ilaatigut Europap kangiani naalagaaffilersaartarfiliornernut atorneqartarlutik, nunanilu tamakkunani aningaasat kitaaneersut naleqartorujussuummata katersukkat tamakku iluqutaasorujussuupput.
4 Tamanna Korintumiunut agdlagkat áipait 8:13, 14-imi allassimasumut naleqqulluartuuvoq: ’Maannakkut ilissi peqangaarsusersi taakkua piitsuussusiannut ikiuutaassaaq . . . ataaseq naligineqaqqullugu.’ Nunani amerlasuuni naalagaaffilersaartarfiliornissamut kontonik pilersitsisoqarsimavoq, immaqali aningaasatigut pissutsit pissutigalugit qatanngutit tamaanimiut pisariaqartunik naalagaaffilersaartarfiliorsinnaanngikkallarput. Qatanngutit nunanit allaneersut ikiortigalugit Peqatigiiffiup qaammatit sisamat ingerlanerinnaanni nunani 75-ini naalagaaffilersaartarfiit nutaat 413-it sanaartornerat allallu 727-it nutarterneqarnerat peqataaffigisinnaasimavai. Danmarkimi Peqatigiiffik aamma nunanut pisariaqartitsiffiusunut tapiissuteqarsimavoq. Ukiuni kingullerni nunani tamani qatanngutigiissutut peqatigiissunit qinnuigineqarluta immikkut pisinnaatitaaffigalugu koruuninik millioninik arlalinnik nunanut piitsunut nassiussisinnaasimavugut. Nuannaarutigaarput takullugu silarsuaq tamakkerlugu Jehovamut unnersiutaasumik naalagaaffilersaartarfiit amerlanerusut sanaartorneqartut. — Tus. 102:16; Hag. 1:7, 8.