Jehova pissaanermik angingaartumik tunisisarpoq
1 Jesusip ajoqersugai tamarmik pisinnaatitaaffimmik immikkut ittumik tunineqarsimapput — kristumiutut illernartumik kiffartorsinnaanermik. (Mat. 24:14; 28:19, 20) Naammalluinnanngitsuugattali pissutsinillu aaqqissuussaanermit matumannga tatineqartaratta ilaannikkut sapertutut misigisinnaavugut.
2 Paulusip kristumiunut tanitaasunut Korinthimiittunut allagai tuppalliutigisinnaavavut. Ima allassimavoq: ’Pequut tamanna puuguttani marraasuniitillugu pigaarput.’ (2 Kor. 4:7) Paulus isumalluarpoq: ’Tamanna pillugu tamatuminnga kiffartuutigisaqaratta . . . nikallunngilagut.’ (2 Kor. 4:1) Tanitaagaluaraanni imaluunniit ’savanut allanut’ ilaagaluaraanni ’nikallornani’ nutaarsiassamik nuannersumik oqaluussiuarnissaq unamminiarnartuusinnaavoq. Guuti ’pissaanermik angingaartumik’ tunisisartoq nukissamik aallerfigisariaqarparput. — Juá. 10:16; 2 Kor. 4:7b.
3 Kajumissinartuuvoq oqaluussisartut amerlasuut naak assortorneqaraluarlutik, peqqissutsimikkut ajornartorsiuteqaraluarlutik imaluunniit aningaasatigut ajornakusoornartorsioraluarlutik ilungersuussisarmata. Paasisariaqarparput oqaluussinerput Jehovamit tapersersorneqarlunilu pilluaqquneqartarmat. Nikallunganermit annilaanganermilluunniit oqaluussiniarnerput millisinneqartariaqanngilaq, akerlianilli ’Naalakkami nakuussusiatalu pissaaneqarnersuani nakussatsittariaqarpugut’. — Evf. 6:10; Uss. 24:10.
4 Qanoq ililluni Guuti pissaaneqaatigisinnaagipput: Qasusuillutit qinujuartarit ikiorneqarnissat nakussatsinneqarnissallu qinnutigalugu. (Rûm. 12:12; Fil. 4:6, 7) Uummatikkullu iluunngaarlutit tatigiuk Jehovap pissaanermik immikkut ittumik tunissagaatit. (Uss. 3:5) Atuagassiaatitsinni inuunermi misigisartakkanik oqaluttuat ullutsinni pisimasut atuartakkit, tamakkunani takutinneqarmat Jehovap ullumikkut kiffani naalliunnartutigut nikallujuinnissaannut ikiortarai. Qatanngutitit ilagiinniittut qanittumik attaveqarfigiuakkit ilagiillu ataatsimiinneri aggerfigiuaannarlugit. — Rûm. 1:11, 12; Epr. 10:24, 25.
5 Qanortoq Jehovamit ’pissaanermik angingaartumik’ nakussatsinneqarsinnaanissatsinnut iliuuseqartuarta, pissaanerata tamatuma Guutip naalagaaffianik oqaluussissutiginninnermi immikkut pingaaruteqartumi suliuarnissatsinnut ikiorsinnaammatigut.