’Taamaaliortaritsi eqqaallunga’
1 Inunni nalinginnaagaluttuinnarpoq pingaartorsiorfiit piffissap ingerlanerani pingaaruteqarunnaariartortarnerat. Tamanna peqqutaaqataavoq Jesusip ’naalakkap unnukkorsiortitsineranik’ pilersitsineranut ajoqersukkaminullu ima peqqusineranut: ’Taamaaliortaritsi eqqaallunga’. Taamanerniilli kristumiut naalallutik ukiut tamaasa ullormi Jesusip toquffiani ’Naalakkap toqua oqaatigisarpaat, tikiutserlugu’. — 1 Kor. 11:20, 23-26.
2 Erniinnannguaq Jesusip ’savarpannguit’ sinneri qilammi inissaannut pisikkumaarpai. (Lúk. 12:32; Juá. 14:2, 3) Ukioq manna apriilip 11-ani tanitat sinneruttut immikkut pisinnaatitaaffittut Naalakkap unnukkorsiortitsinera nalliusseqqissavaat ’savat allat’ amerliartuinnartut ilagalugit. (Juá. 10:16; sar. 7:9, 10) Tamatuma Jehovap ertuami inuiaat iluaqutissaattut aallartinneratigut uatsinnut asanningaarnerminik ersersitsisimaneranik pingaartitsinerput nakussatsissavaa. Eqqaasinneqassaaguttaaq Jesusip maligassaalluarneranik, asanninneranik, utertitsissummik pilersitsiniarluni toqu tikillugu aalajaassimaneranik, maannalu Guutip naalagaaffiani pilersitaasumi kunngitut naalakkersuineranik aamma Naalagaaffiup inuiannut pilluaqqussutissaanik. Tamakkorpassuit pissutissaqarluartumik eqqaaniarneqartariaqarput.
3 Maanna piareersalereerit: Tamatta iliuuseqartariaqarpugut ukioq manna eqqaaniaanissaq uatsinnut allanullu qujamasulluni najuuttunut nuannaarutaassappat. Isumarput eqqortumik piareersarsinnaavarput Biibilimi Jesusip toqunnginnermini ullut kingulliit kiffartornera toqunissaatalu tungaanut pisimasut pillugit atuarnerisigut. Ilaqutariittut atuaqqissaaqatigiinnermi sapaatit-akunnerini eqqaaniaanissaq sioqqullugu Inuk inuit inuusimasut pingaarnerpaartaat-ni kapitalit 112-16 misissoraanni pitsaassaaq.
4 Qassit nalunngiligit immaqa eqqaaniaanermut najuussinnaasut nalliuttorsiornermut tamatumunnga pingaartitsinissaannik ineriartortitsiniarlutit illit iliuuseqaruit, qaaqqusatillu tikilluaqqusaanermik misigitikkukkit? Allattukkit, sapinngisannillu iliuuseqarit aggernissaannut ikiorniarlugit. Kingornatigut anersaakkut siumukartinniarlugit ikiortariaqarpatit ataatsimiinnernut aalajangersimasumik najuuttalernissaannut kajumissaarnerisigut.
5 Eqqaaniaanissap tungaanut immikkut ittunik aaqqissuisoqartassaaq oqaluussinissatsinnut periarfissiilluartunik. Apriilimi ikiorti-pioneeriunissat pilersaarutigisinnaaviuk? Maajimimi? Guuterput, Jehova, pilluaqqussutissallu Naalagaaffiup erneranit aqunneqartup ataani pisussat pillugit oqaluussisarnerput tassaavoq Jesusip pilliutaata uatsinnut pingaaruteqarneranik qujamasunnitsinnik ersersitsinerit pitsaanerpaat ilaat. — Tus. 79:13; 147:1.