Pulaarneq pilluaqqusaanartoq
1 Zakæusip nuannaarluni Jesus angerlarsimaffimminut pulaartitut tikilluaqqusinnaasimavaa. Pulaarnerlu tamanna Zakæusimut pilluaqqussutissartaqangaarsimavoq. — Lúk. 19:2-9.
2 Ilagiit niaquattut Jesus Kristusip ullumikkut utoqqaanertat ’Guutip savaatai paareqqullugit’ peqqusimavai. (1 Pît. 5:2, 3; Juá. 21:15-17) Ataatsimiinnerni ilinniartitsinerup oqaluussinermilu siuttuunerup saniatigut utoqqaanertat ilagiit ilaasortaannik asannittumik inuttullu ikiuisarput. Taamaattumik ilaannikkut utoqqaanertanit angerlarsimaffitsinni, naalagaaffilersaarfimmi, oqaluusseqatigigaangatsigit periarfissaniluunniit allani inuttut soqutigineqarneq nuannaarutigisarsinnaavarput. Utoqqaanertanit pulaarneqarnissaq annilaangassutigisariaqanngilluinnarpoq. Pulaarneqarnerput isumaqanngilaq ajortuliorsimasugut. Paarsisutut pulaarnerup suna siunertaraa?
3 Paulus oqarsimavoq qatanngutit ’qanoq innersut takusarlugit’ tikeraarniarlugit. (ap. sul. 15:36) Paarsisut asannittut ilagiinniittut ilaasortaasut ataasiakkaat qanoq innersut soqutigisorujussuuaat. Anersaakkut ikiuineq ineriartuutigisinnaasarput neqeroorutigisarpaat. Paarsisutta asannittup Jehovap tamatta immikkut taamatut isumassorneqarnisarput kissaatigaa. — Hes. 34:11.
4 Utoqqaanertat pulaartarneri pingaartikkit: Apustili Paulus qatanngutini tikeraaraangamigit ’saammaannermit tunissummik anersaap pianik ilangiisikkumallugit nakussateqqullugit kajumissaaqatigeeqqullugillu’ taamaaliortarsimavoq. (Rûm. 1:11, 12) Ulluni kingullerni nalorninartuni makkunani tamatta anersaakkut kajumissaaqatigiinneq ikiorneqarnerlu pisariaqartipparput uppernitsinni aalajaattuassagutta. Utoqqaanertanit pulaarneqarneq ajunngitsumik qisuariarfigigutsigu qularnanngivissumik kajumissaaqatigiinnermik kinguneqassaaq.
5 Utoqqaanertat paarsisutut sulinerisa nassatarisartagaasa ajunngitsortarpassui pingaartitsigit. Ajornartorsiutip apeqqutilluunniit eqqissiunnaartippatigut, eqqaamatigu ilagiit utoqqaanertaasa ikiorsinnaammatigut. Anersaakkut peqqissuunerput ulorianartorsiortinneqaraangat nangaanata saaffigisartigik. Jehovamit aaqqissuussineq asannittoq tamanna pingaartitsigu taamatullu paarsisunit pulaarneqarnerup pilluaqqussutissartai nuannaarutigisigik.