Immikkut ittumik ataatsimeersuarnissami saqqumiussassat nutaat
Ullormi ataatsimi immikkut ittumik ataatsimeersuartarnermik aaqqissuussaq 1987-imi aallartippoq. Paasinarsisimavoq taamaaliortarneq Jehovap kiffaanut soqutiginnittunullu najuuttunut nakussatsissutaasartoq. Septembari 1998 aallarnerfigalugu immikkut ittumik ataatsimeersuarnissami saqqummiussassat nutaat saqqummiunneqartalissapput. Oqalugiaatit qulingiluat apersuinerillu misigisalikkersaartitsinerillu arlallit anersaakkut ineriartornassaqaat.
„Jehovap nerrivianik pingaartitsinermik ersersitsigit“ saqqummiussassanut nutaanut qulequtaavoq. (Jes. 65:14; 1 Kor. 10:21) Jehovamut kiffartornitta inuunitsinni pingaarnerpaatinnissaanik aalajangiusimanninnitsinnut nakussatsissutaassaaq. (Tu. 27:4) Nakkutilliisup angalasartup saqqummiussaa ataatsimiinnernut najuuttarnitsinnik isiginninnitsinnut tunngassaaq. Oqalugiartup qaaqqusap takutissavaa qanoq ililluta ’anersaakkut peqqissuujuaannarsinnaasugut Jehovap nerriviani nerisarnitsigut’. Aammattaaq inuusuttut Guutimut kiffartornerminni uteriarumanngissuseqarnissaannik atoriaannaasumik kajumissaarneqassapput. Oqalugiartup qaaqqusap oqalugiaataata pingaarnerup, „Nakimaalluni nalunaajaanissamut anersaakkut nakussatsinneqarneq“-mik qulequtaqartup, takutissavaa ilagiit qanoq ilillutik Guutip naalagaaffia pillugu nakimaalluta oqaluussinissatsinnut piginnaanngorsartaraatigut. Saqqummiussassat tamakku kia iluaqutissarsiffigerusussannginnerpai?
Tunniulluinnaqqammersut kuisikkusuttut nakkutilliisoq siulittaasoq sapinngisamik piaarnerpaamik tamatuminnga ilisimatittariaqarpaat. Ullormi ataatsimi immikkut ittumik ataatsimeersuartarnerup ukiuisa aqqaneq-aappaata aallartinnerani maani qularinngilarput najuukkumaartussat tamarmik suliassatsinnut anersaakkut nakussatsinneqarumaartut.