Ataatsimeersuaararnissami saqqummiussassaq nutaaq
1 „Jehovamit ajoqersorneqarit“ ataatsimeersuaararnissat septembarimi aallartittussat tamanna qulequtarissavaat. (Juá. 6:45) Jehovamit ajoqersorneqarnerup naammagisimaarnartumik inuuneqarnissatsinnik ikiortarpaatigut. Ikiortarpaatigut anersaakkut pigisatsinnik itisuumik pingaartitsinissatsinnut. Allanut nutaarsiassap nuannersup oqaluutiginissaanik ilungersuutiginninnitta ikiortarpaatigut iluaqutaasumik innuttaanissatsinnut. Ataatsimeersuaararnerup pingaarnerutissavaa pilluaqqussutit Jehovamit ajoqersorneqarnerup nassatai.
2 Saqqummiussassap erseqqissassavai Guutimit ajoqersorneqarnerup iluaqutaassusia silarsuullu ajoqersuutaasa navianartoqarnerat. Takutilluarneqassaaq Jehovap qanoq qutsissumik ajoqersorneqarneq aqqutissiortaraa — ajoqersorneqarneq oqaasianik Biibilimik tunngaveqartoq. Aamma takutinneqassaaq pallorfiginnittunut atatillugu Guutimit ajoqersorneqarneq qanoq ililluni pingasutigut nuannaarnissamik kinguneqartartoq. Aammattaaq inuusuttut kajumissaarneqassapput Biibilimi maligassiuilluartut, ilaatigut makkuusut David Timuutiusilu assiginiaqqullugit, inuunertillu anersaakkut ineriartorteqqullugu. Uppernerput nukittorsarneqassaaq utoqqaat aalajaattuarnerminnik takutitsisut eqqartorneqarpata. Tunniulluinnaqqammersut kuisinnissaminnut piukkunnarsisimasut tamatumani periarfissarsissapput. Piffissaalluartukkut ataatsimeersuaararneq aallartitsinnagu nakkutilliisumut siulittaasumut saaffiginnittariaqarput oqaluttuullugulu kissaatigisaminnik.
3 Ataatsimeersuaararnermi oqalugiaatissat pingaarnersaat ima qulequtaqarpoq: „Jehovap piumasaanik iliorumallutik ajoqersorneqartut.“ Erseqqissarneqassaaq sooq tamatta ajoqersorneqartuartariaqartugut, uppernikkut aalajangiussisariaqarluta siumukartuartariaqarlutalu. Jehova assiginiarlugu allat sallusuissummik inuunermut naassaanngitsumut sammisumik ajoqersornissaannik kajumissaarneqassaagut. Peqatigiiffiup atuagassiaataanik inuppassuit Jehovamit ajoqersorneqarsimasut pillugit misilittakkat ineriartornartut oqaluttuarineqassapput. Takutinneqassaaq nunarsuaq tamakkerlugu Jehovamit ajoqersorneqarneq qanoq kinguneqarluartigisimasoq.
4 Saqqummiussassat peqataaffiginiarlugit aalajangerit. Soqutiginnittut tamaasa peqataanissaannut kajumissaakkit. Qilanaarikkit ajoqersuutigineqartussarpassuit ajunngitsut Ilinniartitsisorsuatsinnit. — Jes. 30:20. (kmD 8/96 Det nye program . . .)