Oqaluussinerup siunertaa eqqumaffigaajuk?
1 Jehovap iliuuserisai tamarmik aalajangersimasumik siunertaqarput. (Jes. 55:10, 11) Kajumissaarneqarpugut taanna assileqqullugu. (Evf. 5:1) Oqaluusseriaassitsinni aamma taamaaliortariaqarpugut. Taamaattumik aperisinnaavugut: „Oqaluussinerup siunertaa eqqumaffigaajuk?“
2 Illumiit illumut oqaluusseqataaneq, torrutiinnarlugu nalunaajaaneq atuagassianillu Biibililersaarutinik agguaassineq oqaluussinerup siunertaqalerneranut ilasaataapput. Kisianni eqqaamasariaqarparput suliassarput tassaaginnaanngimmat oqaluussineq, aammattaarli ajoqersuganngortitsineq. (Mat. 28:19, 20) Naalagaaffiup naatsiiassarissua siaruarterutsigu, imertissallugu passutarissallugulu uterfigeqqittuartariaqarparput Jehovap naajartortitsinera alapernaajutigalugu. (1 Kor. 3:6) Pulaaqqiilluta Biibilimillu atuaqqissaaqateqarluta sulinitsinni peqqissaartuusariaqarpugut.
3 Kiffartornerit annertusiuk: Nuannaarutaajuaannarpoq kiffartorluni suliarisimasaq kingumut qiviarlugu oqarsinnaagaanni: ’Anguniagarisimasakka tamaasa naammassivakka.’ Paulusip 2 Timûtiuse 4:5-imi kajumissaarutaa imaappoq: ’Kiffartuutigisat naammatsillugu kiffartuutiguuk.’ Tamatuma ilagaa soqutiginninnerit suulluunniit eqiasuilluni malinnaaffigisarnissaat. Sapaatip-akunneri tamaasa pulaaqqiiffigisartakkannut piffissaq aalajangersoq atortaruk. Naapertuilluassutsimik nuannarissallit Biibilimik atuaqqissaaqatiginissaat anguniagariuk. Oqaluussigaangatta tamatigut tamanna eqqarsaatitsinniittariaqarpoq.
4 Oqaluussisartut ilaat apereriakkit Biibilimik atuaqqissaaqatigisimasami ilaat ataatsimeersuarnermi kuisittoq takullugu qanoq misigisimanersut. Taakku nuannaarnerat kuisittut nuannaarnerannit minnerunngilaq. Oqaluussinerminni anguniagartik angusimavaat. Sallusuissummik ilisarsinissamut allanik ikiuisimasoq imatut oqarpoq: „Ajoqersuganngortitsineq Jehovamut unnersiutiginnittut amerliartornerannik kinguneqartarpoq. Sallusuissummik ilassinnittunut inuunermik kinguneqarpoq. Allat sallusuissummik ilinniartinnerat nuannaareqaara — suliaq tassa nuanningaartoq! . . . Taakku Jehovamut asannittunngortut amerlasuut ikinngutiginerpaalersimavakka.“
5 Eqqarsaatigiuk allat Jehovamut tunniulluinnarluni kiffartornissamut ikiorsinnaallugit! Tassaavoq immikkut pisinnaatitaaffik annertooq. Tassa oqaluussinerup siunertaata eqqumaffiginerata kingunerisinnaasaa. — Kul. 4:17.