Pulaaqqiinermik akisussaaffipput naammassiniartigu
1 Pulaaqqiisarnermut sapinngisatsinnik peqataanissatsinnut pissutissaqarluarpugut. Paulusitut suliassarput peqqissaartumik naammassiumavarput. (ap. sul. 20:21, 24) Peqqissaarluta soqutiginnippasittut tamaasa pulaaqqittarutsigik ilerasuuteqarata kiffartuussinerput naammassisinnaavarput. — 2 Tim. 4:5.
2 Ilisimasaqarneq pisussaatitsisarpoq: Piviusumik, tassa inuit inuunerata nalorninartorsiorneranik, eqqaamanittuarneq kajumississutigisariaqarparput pulaaqqiisarnermik aallussilluarnissatsinnut. (Juá. 17:3) Jehovap eqqartuussinissaanik Harmagedonillu qanillineranik ilisimanninnitta kajumissisittariaqarpaatigut ajortunik mianersoqqusinissatsinnuinnaanngitsoq aammali inunnik ’maajunnartut nunami suliarineqartut pillugit kappialasunik’ ikiuinissatsinnut. (Hes. 9:4) Taakku Jehovap peqatigiissortaanut ilanngunnissartik pisasariaqartippaat.
3 Sallusuissut pillugu eqqortumik paasisaqalerniarlutik inuit ikiorneqartariaqarput. (ap. sul. 8:30, 31; 18:26) Illit nammineq taama anersaakkut siumukartigisinnaasimassagaluarpit pulaaqqinneqaqattaarsimanngitsuuguit Jehovamik taassumalu siunertaanik nuanningaartunik eqqortumik paasisaqarnissannut ikiorneqarlutit? — Mat. 7:12.
4 Asanninnermik ilungersornermillu ersersitsigit: Pulaaqqiisarnermik qanoq annertutigisumik suliaqarnerit allanut qanoq asannitsigininnut ersiutaavoq. Qatanngut angut tappiitsoq pioneriusoq ima oqarsimavoq: „Kuisinninniilli . . . kissaatigisimavara allat Bibelimi ilikkarsimasannik oqaluttuunnissaat, nuannaarutigaaralu innarluutiga tamatumunnga akornutaasimanngimmat. . . . Sungiusarsimavungalu aqqusinermi aalajangersimasumi illunik tamanik eqqaamannissinnaanissannut, Bibelimik atuaqqissaarusuttut tamaasa pulaaqqittarsinnaaniassagakkit.“ Iluamik oqaatigalugu qatanngut tappiitsoq taanna uummaminik isigivoq, nangaananilu pulaaqqiisarpoq kristumiutullu asanninnini suliamigut takutittarlugu.
5 Pulaaqqiigaangavit immikkut periarfissaqartarputit Bibeli atussallugu neriuutillu uppernarsassallugu. (1 Pîtr. 3:15) Ilungersornerittaaq sallusuissummillu pingaartitsinerit allisarput. Pulaaqqiineq aqqutigalugu nuannaarneq allatigut anguneqarsinnaanngitsoq angussavat. Tamatigullu ilungersorlutit pulaaqqiisaruit nuannaarneq tamanna nutartersinnaavat. — Uss. 10:22.
6 Pulaaqqiinissamik akisussaaffipput ilungersuutigisariaqarparput. Jehovap innuttaasa ajunngitsuliorusussusiat 1991-imi silarsuarmi tamarmi oqaluussisimanerannit takuneqarsinnaavoq. (Uss. 3:27) Pulaaqqinerit 344.926.952-iupput angerlarsimaffimmilu Bibelimik atuaqqissaaqatiginninnerit 3.947.261-iupput. Ajoqersukkat nutaat 300.945-t Jehovamut tunniulluinnarsimallutik kuisipput. Siuariarneq tamanna tupinnartoq pisimanngisaannarsimassagaluarpoq uagut pulaaqqiinermik akisussaaffitsinnik naammassinnikkumassuseqarsimanngitsuugutta. — 1 Tás. 2:8. (km 92/1 . . . genbesøgsarbejdet)