Angajoqqaat — meeqqassinnut maligassaalluaritsi!
1 Guutip oqaasiani allassimavoq: „Iluartup ataataa [anaanaalu] ilumut qiimmattaatissaqarpoq.“ (Ussatit 23:24, 25) Angajoqqaat meeqqaminnut maligassiuilluartut tamanna pilluaqquneqaatigissavaat. Qatanngut angut immikkoortortaqarfiup ataatsimiitsitaliaanut ilaasoq angajoqqaani pillugit ima oqarsimavoq: „Sallusuissut inuunerminni pingaartinnerpaasimavaat, uangattaaq kissaatigisimavara inuuninni sallusuissut pingaarnerpaajussasoq.“ Meeqqat angajoqqaaminni sunaana takusinnaasariaqaraat?
2 Ileqqorissaarneq ataqqinningaarnerlu: Angajoqqaat akisussaaffigaat meeqqatik ikiussallugit pissutsinik iluaqutaasunik ineriartortitsinissaannut. Ileqqorissaarneq oqaassutaannakkut ilikkarneqarsinnaanngilaq, aammattaarli allanik isiginnaagaqarluni issuaaneq ilinniarfiusarpoq. Taamaattumik qanoq ileqqoqarpit? Meeqqavit tusartarpaatsit oqartutit „utoqqatserpunga“, „ikiorsinnaavinga“ imaluunniit „qujanaq“? Ilaquttassinni tamassi ataqqeqatigiippisi? Allat oqalukkaangata tusarnaartarpigit? Meeqqavit oqaluffigigaangatsit tusarnaartarpigit? Naalagaaffilersaarfimmi angerlarsimaffimmilu taamatut ileqqorissaartarpit?
3 Anersaakkut ittunik pingaartitsineq oqaluussinermilu ilungersuussineq: Qatanngut angut ukiut 50-t sinnerlugit tamakkiisumik kiffartorsimasoq oqarpoq: „Anaanaga ataatagalu maligassiuilluarsimapput ataatsimiinnerit pingaartinnerisigut kiffartornermillu ilungersuutigineratigut.“ Ilaquttavit anersaakkut nukittunissaat soqutigigit meeqqannut qanoq takutittarpiuk? Ullormut allassimaffik ataatsimoorlusi sammisarpisiuk? Akuttoqatigiimmik ilaqutariittut Biibilimik atuaqqissaaqatigiittarpisi? Biibilimik Peqatigiiffiullu naqitertitaanik atuarlutit meeqqavit takusarpaatsit? Ilaqutariittut qinoqatigiikkaangassi suna tusartarpaat? Ilagiit sallusuissullu isumalluarnartumik oqaluuseralugit meeqqatit anersaakkut ineriartornartumik oqaloqatigisarpigit? Ataatsimiinnerit tamaasa najuuffiginissaat ilaqutariittullu kiffartornermut peqataanissarsi ilungersuutigisarpigit?
4 Angajoqqaat ilissi, meeqqassinnut qanoq maligassaanissi isumaliutiginissaanut pingaaruteqarpoq. Maligassiuilluarussi meeqqasi inuunertik tamaat pingaartikkumaarpaat. Nakkutilliisup angalasartup nulia, maannakkut 70-t sinnerlugit ukiulik, ima oqarsimavoq: „Angajoqqaama asanartut kristumiuusut maligassaallarsimanerat suli nuannaarutigisarpara. Ilumoorullugu qinusarpunga kingornussaq tamanna suli annerusumik pingaartinnerulerumallugu ukiuni aggersuni eqqortumik malinninnikkut.“