Ileqqorissaarneq Guutimut mianerinnittuni ilisarnaataasariaqarpoq
1 Ileqqorissaarneq ullumikkut qaqutigoortuuvoq. Sooq? Inuit ullumikkut ulapingaarmata pissuserissaarnissartik qaqutiguinnaq eqqarsaartigisarpaa soorlu oqarlutik „-laarlanga“, „qujanaq“, „utoqqatserpunga.“ Biibilimi siulittuutaavoq taamaattoqalerumaartoq, allassimagami ullussani kingullerni inuit ’namminissarsiortuussasut, usorsitsaartut, anneruniartut, qujasuitsut, asanniuitsut, naammatsiuitsut, ajunngitsunut akeraasut makitaniartullu’. (2 Tim. 3:1-4) Tamakku tamarmik ileqqorissaarnerunngillat. Kristumiut pissuseq ataqqinninngitsoq silarsuarmiittoq ilaarniaqqunagu ilungersortariaqarput.
2 Ileqqorissaarneq sunaava? Ileqqorissaarneq allat misigissusaat eqqumaffigalugit allanillu eqqissisimasumik inooqateqarsinnaanertut nassuiarneqarsinnaavoq. Ileqqorissaartoq mianersuttoovoq, saaffiginnikkuminartoq, inussiarnersoq, pissuserissaartoq, qujamasuttoq isumassuisorlu. Pissutsit taamaattut Guutimut tullermullu asanninnermik tunngaveqarput. (Luk. 10:27) Akeqanngillat, allanulli attaveqarluarnissatsinnut pingaaruteqarluinnarlutik.
3 Jiisusi Kristusi maligassaalluartuuvoq. Maleruagassaq atortuujuaannartoq malittuarpaa: „Qanorlu inunnut iliorfigeqqugussi ilississaaq taamatut iliorfigisigit.“ (Luk. 6:31) Isumassuineq asanninnerlu Jiisusip ajoqersukkaminut takutitai, uagutsinnut sunniuteqarluaqaat. (Mat. 11:28-30) Ileqqorissaarnera pissuserissaarnerinnaanngilaq, ilumoorluinnartumik tunngaveqarput. Jiisusip maligassiuilluarnera malinniarsarisariaqarparput.
4 Qaqugukkut kristumiut ileqqorissaassappat? Pisuni immikkut ittuni allanut iluareeqqusaarniaraangamik? Naamik. Tamatigorluinnaq ileqqorissaartassaagut. Pingaarnerusumimmi ataatsimiinnerni katerisimaaraangatta?
5 Naalagaaffilersaarfimmi: Naalagaaffilersaarfik pallorfiginnittarfigaarput. Jehovamit qaaqquneqaratta najuuppugut, allatut oqaatigalugu, tassa Taassuma pulaartoraatigut. Naalagaaffilersaarfimmiikkaangatta maligassiuilluartuuvugut. Isikkorillutalu tulluartunik atisaqarpugut? Soorunami qasukkarsimanartunik ippinnartunillu atisalersortariaqanngilagut. Jehovap innuttai ataatsimeersuarnerni ataatsimiinnerniluunniit Guutimut mianerinninnermik ersiutaasumik torersunik atisalersortarnermikkut ilisarisimaneqarput. (1 Tim. 2:9, 10) Taamaalilluta Jehova allallu ’pulaartut’ soqutiginninnermik pingaartitsinermillu takutitsivigissavagut.
6 Ataatsimiittarnerni ileqqorissuunermik takutitseriaatsit ilagaat piffissaq eqqorlugu aggertarneq. Nassuerutigineqarsinnaavoq oqitsuinnaanngitsoq. Ilaat naalagaaffilersaartarfimmit ungasissumi najugaqarsinnaapput meerarpassuaqarsinnaallutilluunniit piareersartariaqartunik. Ilagiilli ilaanni oqaluussisartut 25 procentii aallarniinerup kingorna aggertarnertik ileqquliussumavaat. Tamanna isiginngitsuusaarneqarsinnaanngilaq. Eqqaamasariaqarparput ileqqorissaarneq allat misigissusaannut maluginiagaqarnerummat. Jehova pulaartitsisorput tuniusiumatooq anersaakkut nerersuarnissarput nuannaarutiginissaa isumagisimavaa. Piffissaq eqqorlugu takkunnitsigut takutissavarput tunniunniagai qujassutigalugit pingaartikkigut. Kingusinaarluta takkukkutta akornusersuisinnaavugut allanullu ataqqinnittuliornerunngilaq.
7 Nutaat takkuttalersut maluginiarpagut? Tikilluaqqugutsigit ileqqorissaarnermik takutitsissaagut. (Mat. 5:47; Rom. 15:7) Ilassiorneq, kissalaartumik assammiineq inussiarnerpaluttumillu qungujunneq mikisualuinnaagaluarput kristumiuulluarnitsinnulli takutitsisooqataapput. (Joh. 13:35) Angut siullermeersumik ataatsimiinnernut najuutereerluni oqarsimavoq: „Ullup ataatsip ingerlanerani inuit ilumoorsuseqartut asannittullu naapippakka — takornartat — upperisarsioqatigiiffimmi peroriartorfinnit takusannit amerlanerusut. Ilumut ersarippoq sallusuissut nassaarisimagiga.“ Qanoq kinguneqarpa? Inooriaatsinni allanngortippaa qaammatillu arfineq marluk qaangiummata kuisippoq. Aap, ileqqorissaarneq pingaaruteqaqaaq!
8 Takornartanut inussiarneraangatta annerusumik „uppeqatitsinnut“ taamaassanngilagut? (Gal. 6:10) Oqaatsit tulliuttut suli atuupput, ’utoqqaat ataqqissagigut’. (3 Mos. 19:32) Utoqqaat ilagiinniittut ilaginnarneqartutut misiginngisaannartariaqarput.
9 Eqqumaniarit: Ataatsimiinnerni kristumiut nakkutilliisut kissaatigaat anersaakkut ineriartornartunik tunissutinik ilangiisikkumavaatigut. (Rom. 1:11) Ileqqorlunnerujussuussaaq ataatsimiinnerup nalaani sinimisaarutta, tyggegummimik tamuagutta, sanilerput isussukulaffigigutsigi, pisariaqanngitsumik anartarfiliakulagutta, oqalugiaammut tunngassuteqanngitsumik atuagaqarutta iliuuseqaruttaluunniit imaluunniit ataatsimiinnerup nalaani arlaannik sammisaqarniarsarigutta. Tassunga tunngatillugu utoqqaanertat maligassiuilluartariaqarput. Kristumiuulluartutut ileqqoqarutta oqalugiartumut oqariartuutaanullu tusarnaaqqissaarnertigut ataqqinninnermik takutitsivigissavarput.
10 Allanut pingaartitsinerussaaq oqalugiartussaq tusarnaartullu oqarasuaatit angallattakkat allalluunniit nipiliorsinnaasut ataatsimiinnerup nalaani qaminngatikkallaraanni. Arlaat pissarsiarineqartariaqavippat atortorissaarutertik nipikillisariaqarpaat.
11 Meeqqat ileqqorissaarnerlu: Angajoqqaat meeqqatik qanoq ileqqoqarnersut eqqumaffigisariaqarpaat. Meeraq ataatsimiinnerup nalaani akornutaasinnaasumik qialerpat eqqissiveeruppalluunniit pitsaassaaq meeraq sukkanerpaamik annisissallugu. Ajornakusoorsinnaasarpoq allanulli pingaartitsininnut ersiutaassaaq. Angajoqqaat mikisunik meerallit tunorlerpaani issiakulasarput ataatsimiinnerup nalaani akornusersuivallaarnatik meeraq annikkiartorsinnaaniassagamikku. Ataatsimiinnermi najuuttut ilaqutariinnut isumassuillutik issiaviit tunorliit piareeqqatissinnaavaat.
12 Angajoqqaat aamma ataatsimiinnginnermi ataatsimeereernermilu meeqqatik isumagisariaqarpaat. Meeqqat ajutoortoqannginnissaq pillugu illup iluani arpasaqattaartariaqanngillat. Naalagaaffileersaarfiup avataani arpasaqattaarunittaaq ulorianarsinnaavoq, ingammik unnukkut taartumi. Naalagaaffilersaartarfiup silataani nipiliortoqarpat eqqissiviilliorfiullunilu sanilinut akornutaasinnaavoq upperisarpullu sanilitsinnut isumalluarpalunngitsumik ersersitsisinnaalluni. Angajoqqaat naalagaaffilersaarfimmi avataanilu peqqissaarluartumik meeqqaminnik nakkutiginnittut nersualaarneqartariaqarput, ataasioqatigiinnerput nuannaaruteqarnarnerulertarmat. — Tus. 133:1.
13 Atuakkamik atuaqqissaarnermi: Ilaqutariinni atuakkamik atuaqqissaartoqartarsinnaammat nuannaarutigaarput. Taakaniitsilluta allanut ataqqinnittuussaagut. Nateq natersuarlu ipertinnginniassammata allungiartorluartariaqarpugut, kamippagut isertinnata peerlugit isersimmaserlutaluunniit. Angjoqqaat meeqqatik nakkutigisariaqarpaat, ileqqorissaarnersut isumagalugit atuaqqissaarfimmilu uninngatinniarsaralugit. Naak immaqa atuaqqissaaqatigiit ikikkaluartut ilumoorsaarpallaarnanngikkaluartorlu allat angerlarsimaffianni qasukkarsimasariaqanngilagut. Meeraq mikisoq anartarfiliassappat angjoqqaajusup ilagisariaqarpaa. Atuakkamik atuaqqissaarneq ataatsimiinnertulli allatut immat naalagaaffilersaarfiliartarnitsitulli atisalersortassaagut.
14 Ileqqoqarluarnermik takutitsinissaq pingaaruteqarpoq: Kristumiuulluartutut ileqqorissaarutta oqaluussinermi kinguneqarluaannarnani allanulli attaveqarlualissutaasinnaavortaaq. (2 Kor. 6:3, 4, 6) Guutimut pilluartumut kiffartoratta pissusissamisuussaaq qungujulagutta allanillu peqatikkuminarlutalu mikisualunnik allanut nuannaalersitsisinnaasunik ulluinnarni maluginiagaqartarutta. Ileqqoq taamaattoq Guutimut mianerinnittunut nersornaataavoq.