’Atorsinnaanersut misilinneqaqqaarlit’
1 Jehovap peqatigiissortaani amerliartuinnarneq pissutigalugu qatanngutinik pikkorissunik ilagiinni kiffartortussanik pisariaqartitsisoqarpoq. Qatanngutit angutit amerlanerit suli toqqarneqarsimanngitsut, ilaatigut inuusuttuaqqat, ilagiinni kiffartorumallutik kissaateqarput. Suliassinneqaraangamik atorfissaqartinneqarnitik naammassisaqarsinnaanitillu nuannaarutigisarpaat. Kingusinnerusukkut kiffartortutut toqqagaassanersut aalajangerneqassaaq ’atorsinnaanersut’ misilinneqassapput. (1 Tim. 3:10, NV) Qanoq tamanna pisarpa?
2 Utoqqaanertat suliaat: 1 Timûtiuse 3:8-13-imi piumasaqaatit eqqartorneqartut qatanngutip naammassinerai utoqqaanertat nalilerunikkik ilaatigut akisussaaffimmik nammassinnissinnaanersoq misilissavaat. Immaqa atuagaateqarfimmi ikiortissatut suliakkerneqassaaq, mikrofonilerisutut imaluunniit naalagaaffilersaarfiup aserfallatsaalineqarnissaanut allanulluunniit ikiuuttaqqullugu qinnuigisinnaavaat. Utoqqaanertat maluginiassavaat suliakkerneqarnini qanoq qisuariarfigineraa. Pissutsit soorlu tatiginninneq, piffissamik eqqortitsisinnaaneq, peqqissaarneq, anneruniajuinneq, kajumissuseqarneq allanillu suleqateqarluarsinnaanersoq eqqumaffigissavaat. (Fil. 2:20) Atisalersoriaatsimigut periaatsimigullu maligassiuilluarpa? Akisussaaffimmut misikkarippa? Kissaatigaat ’ilisimatuutut piuaalluni ileqqorissutsimigut suliani nittarumaarai.’ (Jâko 3:13) Ilagiinni kiffartuuteqarnissaq anguniarpaa? Jesusip ’inuiaqatigiit tamaasa ajoqersuganngorteqqullugit’ peqqussutaa oqaluusseqataalluarnermigut malittarpaa? — Mat. 28:19; takuuk Vagttårnet 1. septembari 1990-moortoq, quppernerit 18-28.
3 Ilagiinni kiffartortunngornissamut qassinik ukioqarnissaq Biibilimi killilerneqanngilaq, allaaserineqarnerali naapertorlugu angutit inersimalluartut pineqarput. Inuusuttut pineqarsinnaanerat ilimagineqanngilaq, taamaassinnaanngilarmi nuliaqarsinnaanerat meeraqarsinnaanerallu ingammik pineqarmata. (1 Tim. 3:12, 13) Angutit pineqartut ’inuusuttut kajungerisaannik’ nanertisimassanngillat, Guutimulli attaveqarluarnissartik aammalu Guutimut inunnullu ilerasuuteqannginnissartik anguniassavaat. — 2 Tim. 2:22.
4 Inunnguuseralugu ajunngitsunik piginnaaneqarneq iluaqutaavoq, pingaarnerusumilli inuup nammineq isiginnittaasia anersaavalu pineqarput. Qatanngut angut maniguulluni Guutimut unnersiutiginnikkumava qatanngutinillu kiffartuukkumallugit? Avatangiisiisa Biibilimilu piumasarineqartunut allanut isumaginninnerata taamaaliornissaq ajornakusoortinngilaat? Taava ilagiinni atorneqarumalluni ilungersornera aamma Jehovamit pilluaqquneqarumaarpoq.