Angutit inuusuttut, anguniagaqarpisi?
1. Qaqugukkut qatanngutip inuusuttup 1 Timotheusi 3:1-imi kajumissaarut malilersinnaavaa?
1 “Nakkutilliisuujumasup suliassamisut kajungerisaa pingaartorujussuuvoq.” (1 Tim 3:1) Oqaatsini isumassarsiarititaasuni qatanngutit angutit kajumissaarneqarput ilagiinni akisussaaffeqalernissamut piginnaanngorsaqqullugit. Taamaaliorniaruit inersimasuusariaqarpit? Pitsaanerpaassaaq suli inuusuttuutillutit akisussaaffinnik anguniagaqaruit. Taamaalillutit inersimaleruit ilagiinni kiffartorlernissannut ilinniarsinnaavutit takutillugulu suliassatit suliarisinnaallugit. (1 Tim 3:10) Kuisereernikuuguit qanoq anguniagaqarsinnaavit?
2. Qanoq imminut tunniusimasuuneq ineriartortinneqarsinnaava takutinneqarsinnaallunilu?
2 Tunniusimaneq: Eqqaamassavat atorfimmik qaffasissumik anguniagaqannginnavit, nakkutilliisutulli suliassaq anguniagarigakku. Taamaattumik qatanngutinik ikiuisarnissat ilungersuutigisaruk. Jiisusip maligassiuilluarnera eqqarsaatigeqqissaartaruk. (Matt 20:28; Joh 4:6, 7; 13:4, 5) Allanik soqutiginnittuunissat Jehovamut qinnutigisaruk. (1 Kor 10:24) Ilagiinni utoqqaanerusut sanngiinnerusullu kiffartuuttarsinnaavigit? Eqqagassat katersorlugit, aputaajaallutit imaluunniit naalagaaffilersaarfimmi asserfallatsaaliinermi kajumissutsinnik sulisinnaavit? Teokratiimik Ilinniarfimmi pisassaqartumik pisinnaajunnaartoqarpat tigusinnaaviuk? Misigissavat allat pillugit imminut tunniusimaneq nuannaartitsisartoq. — Apustilit Suliaat 20:35.
3. Anersaakkut ittunik pingaartitsineq qanoq pingaaruteqartigaa, aamma qanoq ineriartortinneqarsinnaava?
3 Anersaakkut ittunik pingaartitsineq: Ilagiinni kiffartortup piginnaasai pikkorissusialu apeqqutaanatik anersaakkut ittunik pingaartitsineq pingaarnerpaavoq. Angut inersimalluartoq Jehovap Jiisusillu isiginnittaasiattut isiginnittaaseqarniartarpoq. (1 Kor 2:15, 16) “Anersaalli inerititai” malittarpai. (Gal 5:22, 23) Iivangkiiliumik ilungersuussisuuvoq naalagaaffimmik inuunermini salliutitsisoq. (Matt 6:33) Aalajangersimasumik atuaqqissaartaruit anersaakkut pingaartitat ineriartortissinnaavatit. Tamatumunnga ilaapput ullut tamaasa Biibilimik atuartarneq, Napasuliaq Alapernaarsuiffik-mik Vågn op!-millu saqqummersunik tamanik atuartarneq aamma ilagiinni ataatsimiinnernut piareersartarneq najuuttarnerlu. (Tuss 1:1, 2; Hebr 10:24, 25) Timotheusi inuusuttoq anersaakkut siuariartortuaqqullugu kajumissaaramiuk Paulusi allappoq: “Ajoqersuisutut suliat nakkutiginiaruk.” (1 Tim 4:15, 16) Taamaattumik Teokratiimik Ilinniarfimmi suliassatit suliariniarlugit ilungersorniarit. Oqaluussinermut piareersartarit aalajangersimasumillu peqataasarlutit. Anersaakkut anguniagaqartarit soorlu pioneritut, Betelimi kiffartortutut imaluunniit Qatanngutinut Angutinut Aappaqanngitsunut Biibilimik Ilinniarfimmi atuartitaanermut ilaallutit. Anersaakkut ittunik pingaartitsinerup ‘inuusuttut kajungerisaanit ingalassimatissavaatit’. — 2 Tim 2:22.
4. Tatigisaaneq aalajaattuunerlu sooq taama pinngaaruteqartigaat?
4 Tatigisaaneq aalajaattuunerlu: Ukiuni hundredilinni siullerni kristumiut ikiortariallit nerisassaannik qatanngutit angutit agguaassisut ‘iluarisaammata’, tassa tatigisaallutillu aalajaattuummata, suliap suliarineqarnissaa apustilit ernummatigisariaqanngilaat. Tamanna pissutigalugu pingaarutilinnik allanik suliaqarsinnaatitaapput. (ApS 6:1-4) Taamaattumik ilagiinni suliassinneqaraangavit pisinnaasat tamaat suliariniartaruk. Noa ilaaruk, umiarsualioqquneqarami najoqqutareqquneqartoq maleqqissaarlugu iliorpoq. (1 Mos 6:22) Aalajaattuuneq Jehovap pingaartingaarpaa anersaakkullu inersimalluartuunermut ersiutaalluni. — 1 Kor 4:2; takuuk ungalusaq “Ilinnartitsinnerup pingaaruteqassusia”.
5. Sooq angutit inuusuttut anguniagaqartariaqarpat?
5 Soorlu siulittuutigineqarsimasoq Jehova pilertortumik katersuineqalersitsiumaarpoq. (Es 60:22) Agguaqatigiissillugu ukiumut inuit 250.000-it kuisittarput. Taama amerlatigisut Jehovamut nalunaajaasunngortarmata ilagiinni piginnaatitaaffinnut angutit anersaakkut piukkunnaatillit amigaatigineqalerput. Aatsaat taamak Jehovamut kiffartornermi pisariaqartitsisoqartigilerpoq. (1 Kor 15:58) Angutit inuusuttut, anguniagaqarpisi? Taamaappat, nakkutilliisutut suliassaq kajungerisimavat!
[Qupp. 2-mi issuagaq]
Taama amerlatigisut Jehovamut nalunaajaasuunngortarmata, ilagiinni piginnaatitaaffinnut angutit anersaakkut piukkunnaatillit amigaatigineqalerput
[Qupp. 3-mi ungalusaq]
Ilinnartitsinerup pingaaruteqassusia
Utoqqaanertat, qatanngutit angutit inuusuttut piukkunnaatillit, suliakkertarunikkit ilinniartillugillu iluaqutigissavaat. Ilagiinnik nakkutilliisup oqaluussisartoq kaammattorniarlugu qaqisarfimmi ataatsimiinnerup kingorna oqaloqatigaa. Nukappiaraq eqqamini nikorfasoq maluginiarpaa aperalugulu oqaloqatiginiarlugu utaqqinersoq. Qatannguteerarput akivoq ataatsimeereernerit tamaasa qaqisarfiup støvsugernissaa suliassarisarlugu. Angajoqqaavi aniniarlutik piareeqqasut nammineq suliassani naammassitinnagu aninianngilaq. Ilagiinnik nakkutilliisoq qungujulluni illuarpoq. Oqarpoq: “Utoqqaanertat qatanngutit inuusuttut ilagiinni suliassaannik ilinniartinneqarnissaat eqqumaffigaat. Taamaattumik ilagiit taakku tikeraartarallarakkit, qatanngummik inuusuttumik ilagiinni kiffartortussamik inassuteqartarnerat nalinginnaasuuvoq.”