Pilersaarusiorit — sumut?
1 Tamatta siunissarput eqqarsaatigisarparput pilersaarusiorfigisarlugulu. Nunarsuarmiinnissaminnik neriugisaqartut Guutip naapertuilluartumik silarsuaani nutaami naassaanngitsumik inuunissaminnut qilanaarput. Sorpassuilli uummatitsinni neriuutitsinnik inangiisinnaapput. Guutip Naalagaaffiata soqutigisaanut atatillugu inuunerput ineriartortissagutsigu eqiasuilluta iliuuseqartariaqarpugut tammartitaanaveersaarlutalu. — 1 Joh. 2:15-17.
2 Silarsuup inuisa anersaakkut tunngasunik soqutigisallit eqqarsaataat anguniagaallu paasiuminaatsittarpaat. (1 Kor. 2:14) Nalinginnaasumik inuit tusaamasanngorniarnertik, pissaaneqarniarnertik pisuunngorniarnertilluunniit ilungersuutigisarpaat, uagulli erlinnartuutit anersaakkut ittut piumavavut. (Mat. 6:19-21) Eqqarsartaaserput silarsuup siunissamik isiginnittaasianut naleqqussarniarutsigu ilimananngilaq anersaakkut anguniakkavut angussagivut. Uummaterput silarsuup soqutigisaanik ulappussuteqalissaaq. Tamanna qanoq pinngitsoorsinnaavarput?
3 „Naalagarput Jiisusi-Kristusi atiniarsiuk“: Guutip Naalagaaffiata soqutigisaani siunissarput ineriartortinnerlugu paasiumagaanni ilaatigut suut oqaluuserisarnerivut maluginiartariaqarpavut. Nunap pii suliassallu oqaluuseriuaannarpavut? Anersaakkut tunngasut eqqartorneqaraangata allanik oqaluuserisaqarniapallattarpugut? Taamaattoqarpat uummatitta nalillit anersaamut tunngasut soqutigiunnaarsimanerai eqqarsaatigisariaqarpavut. Pisariaqarsinnaavoq annerusumik ’naalakkatta Jiisusi-Kristusip atinissaa, uinimmut atasut samminiarnagit, pileritsatsitseqinammata’. — Rom. 13:14.
4 Inuusuttut ’Kristusi atiniarsinnaavaat’ qaqugu piffissaq tamaat kiffartornissamut pilersaarusiorlutik. Kristumiup inuusuttup pioneeriujumasup nunagisaani naatsorsuutigineqarpoq angutit inuusuttut aningaasaqarnikkut isumannaatsuujumallutik iliuuseqassasut. Sivitsunngitsoq suliffiutini kisiat ulapputigilerpaa, ataatsimiinnerit oqaluussinerlu eqqarsaatiginagit ileqqussaannartut isigilerlugit. Jiisusip Matthæusi 6:33-mi oqaasiinut tatiginnilluni inuulerami assigiiaaginnartumillu inuujunnaarluni pioneerinngorpoq. Ullumikkut nalerisimaangaarneq misigaa; oqarnermisut ’piginnaanini tamaat’ atorlugu Jehova kiffartuukkamiuk.
5 Biibili naapertorlugu silatusaarneruvoq siunissaq pillugu pilersaarusiornissaq. (Uss. 21:5) Qanortoq tamatta taamaaliorta Guutip piumasaanik salliutitsilluta. — Ef. 5:15-17.