Pilersaarusiorit
1 Jehovap peqatigiissortai teokratiimut tunngatillugu sammisassanik aalajangersimasunik pilersaarusiaqartarput, tamakkulu anersaakkut pisariaqartitatta matussuserneqarnissaat siunertaralugu suliarineqarsimapput. Aaqqissuussanik tamakkuninnga pingaartitsigutta tamaasa iluaqutiginiassavavut, soorlu nakkutilliisumit angalasartumit tikeraarnerit, ataatsimeersuarnerit ilagiinnilu suliniuteqarnerit pilersaarutigineqarsimasut. (Mat. 5:3) Ilaasali anersaakkut aaqqissuussinerit tamakku peqataaffiginngitsoortarpaat allanik sammisassaqarnertik pissutigalugu. Qanoq ililluta tamanna pinngitsortissinnaavarput? Qanoq ililluta qulakkeersinnaavarput sammisassat allat ’sorliit iluarnerusut’ samminissaannut inangiinnginnissaat? — Fil. 1:10.
2 Pilersaarusiorluarneq pisariaqarpoq: Ussatit 21:5-imi ima kajumissaaruteqarpoq: „Eqiasuitsup eqqarsarluaqqaarnera iluanaarutissarsisitsisarpoq, tuaviorpallaarnerli ajunaarutissiiginnartarpoq.“ Anersaakkut ittumik ’iluanaassagutta’ pilersaarusiorluartariaqarpugut, eqqumaffigisariaqarparpullu qaqugukkut teokratiimut tunngasunik aaqqissuussisoqartarnersoq. Nammineq sammisassavut piffissamut anersaakkut ineriartornartumik piareersaatinut peqataanissatsinnut akornutaanngitsumik inissittariaqarpavut. Nammineq sammisassat salliutillugit teokratiimut tunngasut eqqarsaatiginagit pilersaarusiorutta anersaakkut ’ajunaarutissamut’ ingerlasinnaavugut.
3 Aaqqissuussineq arajutseqinagu! Tamatta siunissamut pilersaaruteqartarpugut, feriarnissat, suliffimmut atatillugu angalanerit, ilaquttanut tikeraarnerit ilaallu ilanngullugit. Kisianni inaarutaasumik isumaqatigiissuteqannginnermi ullorsiutivut takoqqaartariaqarpavut anersaakkut sammisassanut pilersaarutigisanut aporfiunnginniassammata. Paasigukku allanik pilersaaruteqarnerpit nalaani ilagiinnik nakkutilliisoq tikissasoq imaluunniit ataatsimersuartoqassasoq, sapinngisat tamaat iliuuseqartariaqarputit pilersaarutitit allanngortinniarlugit anersaakkut ittunik sulissuteqarnisanut peqataasinnaajumallutit
4 Siumut ilisimasaqareertarutta pingaarnerusunullu pilersaaruteqarluta, ’iluarnerup inerititaanik . . . Guuti naalannarsisillugu nersornarsisissavarput’ — Fil. 1:11.