Paasiuminartuliorit
1 Sooq inuusuttut oqaluussisartut oqaluussiffigisatik soqutiginnittuartissinnaavaat? Ilaatigut paasiuminartuliortaramik. Oqaluussisartut ilaat isumaqartarunarput oqaluussinermi angusaqassagaanni oqallorissuusariaqartoq. Misilittakkalli takutippaat naatsunik paasiuminartumillu oqalukkaanni angusaqarnerpaaffiusartoq.
2 Jiisusip Guutip naalagaaffianik tusarliussaq paasiuminartumik oqaluussissutigisarpaa ajoqersukkanilu taamaaliornissaannik ilinniartillugit. (Mat. 4:17; 10:5-7; Luk. 10:1, 9) Tusarnaartinilu soqutiginnilersinniarlugit uummataallu anguniarlugit pisariunngitsumik aallarniuteqartarluni, apeqquteqartarluni assersuuteqartarpoq. (Joh. 4:7-14) Maligassiaa malikkutsigu iluassaqaaq paasiuminartumillu oqalunnissarput isumagalugu.
3 Oqaluussilluta tusarliussassarput tassaavoq ’Guutip naalagaaffianik nutaarsiassaq nuannersoq’. (Mat. 24:14) Guutip naalagaaffia pingaarnersaatikkukku tusarliussap paasiuminartumik saqqummiunissaanut iluaqutaassaaq. Pulaakkat soqutiginerusaannik eqqartuigit. Arnat ilaqutariittut inuuneq politikkernermit soqutiginerusarpaat. Ilaqutariinni ataataasut suliffitsik ilaquttallu isumannaatsuunissaat soqutiginerusarlugu. Inuusuttut siunissartik soqutigisarpaat, utoqqaallu peqqinnerunissaq toqqissisimanerunissarlu. Aammattaaq inuit nalinginnaasut nunaminni pisut nunani ungasissuni pisunit soqutiginerusarpaat. Nalinginnaasut oqaloqatigiissutigereerlugit Guutimut naalattut naagalaaffiata aqutsinerata ataani pilluaqquneqaatissaannut oqaluuserisaq saatsinneqarsinnaavoq. Oqaatsit ikittut eqqarsaatigilluakkallu allassimaffillu sunniuteqarnerpaamik soqutiginnilersitsisinnaapput.
4 Paasiuminartumik naatsumillu saqqummiussilluni inuit amerlanerusut isumaat uummataallu anguneqarsinnaapput, Jehovamik naassaanngitsumillu inuusinnaanermik paasisaqarnerutissinnaallugit. — Joh. 17:3.