Oqaatsikkut ileqqukkullu maligassaagit
1 Apustili Paulusip Timoteus kajumissaarpaa oqaatsikkut ileqqukkullu maligassaaqqullugu. (1 Tim. 4:12) Uagut aamma maligassaalluartariaqarpugut oqaatsitsigut ileqqutsigullu, ingammik kiffartuussinermut peqataagaangatta inuit naapitatta uummataannik angusinissatsinnut pingaaruteqarsinnaammat.
2 Ilassiortuusariaqarpugut, isumassuisuulluta, inussiarnerluta periaaserillutalu, aap, pissuserissaarnissarput takutittariaqarparput. Ileqqorissaartuugutta allat iliuutsitsinnut qanoq misigissutsimikkut sunnerneqarnersut soqutigilluassavavut. Pissuserissaarneq akuutissanut nerisassat mamassusiannut ersersitsisunut assersuunneqarsinnaavoq. Nerisassat akuutissaqanngikkunik immaqa imersunnissinnaapput mamassuseqaratillu. Allanut pissuserissaarneq ersersinngitsoorutsigu taama assingusumik kinguneqarsinnaavoq. — Kul. 4:6.
3 Oqaatsikkut maligassaagit: Qungujunneq inussiarnersumillu ilassinninneq nutaarsiassamik nuannersumik saqqummiussinitsinni pingaaruteqaqaat. Saqqummiussinerput qanilaarnermik ilumoornermillu akuutissaqarluartikkutsigu pulaakkatsinnut malugitissavarput ilumoorluta soqutigigipput. Oqalukkaangat soqutiginnilluta tusarnaartariaqarparput isumaanut tulluartumik ataqqinnilluta. Oqalunnitsinni periaaserittuusariaqarpugut kajumissinartuusariaqarlutalu. — Naleqqiuguk apustilit suliait 6:8.
4 Ilaatigooriarluta inussiarniitsunik imaluunniit immaqa akerliusunik naapitaqarsinnaasarpugut. Qanoq qisuariartariaqarpugut? Peterip kajumissaarpaatigut oqaloqqulluta ’piuaalluta mianerinnillutalu’. (1 Pît. 3:15; Rûm. 12:17, 18) Jesus oqarsimavoq pulaakkap Naalagaaffimmik tusarliussaq ilassinngippagu ’isikkavut qasiiassagivut’. (Mat. 10:14) Maligassiuilluartutut pissutsimi taama ittumi pissuserissaarneq takutikkutsigu piffissap ingerlanerani akerliusup uummataa aqilisissinnaavarput.
5 Ileqqukkut maligassaagit: Nutaarsiassaq nuannersoq aqqusinermi allanilu oqaluussissutigigaangatsigu isumassuisumik pissuseqarnissaq pisariaqarpoq, nipitusaarpallaarnissaq qerlertoruuttuunissarlu saneqquttunullu akornusiinissaq pinngitsoortittariaqarlugit. Isertinneqaraangattalu naleqquttumik pissuseqartariaqarpugut pulaatut ajunngitsumik pissuseqarluta inoroorsaarnerannut qujamasuutiginnilluta. Meeqqanik ilaqarutta pulaakkatsinnut pigisaanullu ataqqinnittumik pissuseqartariaqarput, torersumik pissuseqartariaqarlutik oqaloqatigiinnermullu malinnaallutik. Meeqqat naalaaseriikkunik iluarinninnginnermik kinguneqarsinnaavoq. — Uss. 29:15.
6 Inuttut periaasitta allanut erseqqissartariaqarpaa Guutip oqaasianik kiffartuutiginnittuunitsinnik. Sunik atisaqarnerput isikkorpullu eqqarsaatigalugit tukattuussanngilagut ipeqarnatalu imaluunniit isiginiarnartuunata ingasallutalu kusanarniartuunata. Isikkorput ’tusagassamut nuannersumut naapertuuttariaqarpoq’. (Naleqqiuguk Filípimiut 1:27.) Isikkorput soqutigigutsigu allanut naakkiuffissarsissanngilagut kiffartuussinerpulluunniit pillugu ajortumik nassaarfiginiassanngilaatigut. (1 Kor. 6:3, 4) Oqalunnitsigut ileqqutsigullu maligassiuilluarutta tusarliussaq kajuminnarnerussaaq Jehovamullu ataqqinaataassalluni. — 1 Pît. 2:12. (kmD 9/96 Vær et eksempel i tale og adfærd)