Guutimit ilinniartitaaneq ataasiussuseqalersitsisarpoq — qatanngutigiittut ataasiussuseqarnermut takussutissaalluartoq

Nakkutilliisoq angalasartoq arnap suli ataatsimiigiartalersimanngitsup atuaqqissaaqatigineqarneranut ilaavoq. Arnaq siunnersorpaa videofilmi Oplæring fra Gud forener takoqqullugu. Sapaatip akunnera taanna ataatsimeeqataavoq, assullu nuannernerarpaa. Sooq videofilmi taama pilertortigisumik sunniuteqarpa? Silarsuarmi taama peqqarniisaarfiutigisumi qinngarsuiffiutigisumilu qatanngutigiittut ataasiussuseqarnerput tupigusuutigingaarpaa. — Johannesi 13:35.

Videofilmi takuuk misigalugulu Jehovap Nalunaajaasuisa nunarsuarmi tamarmi eqqisseqatigiinnerat asaqatigiinnerallu. Apeqqutit tulliuttut eqqarsaatigikkit:

(1) Sooq 1993-94-mi ataatsimeersuarnerit „Guutimik ilinniartitaavugut“-mik qulequtserneqarnerat tulluartuuva? — Mika 4:2.

(2) Sallusuissut Biibilimeersoq ilikkarlugu ilaqutariit ilaannut qanoq kinguneqarsimava? Illit ilaqutannut qanoq kinguneqarsimava?

(3) Sooq Jehovamit ajoqersorneqarneq pingaaruteqarpa? — Tussiaatit 143:10.

(4) Ataatsimeersuarnerit inuiaqatigiit tamaneersut peqataaffigisassaat piareersarniarlugit suna pisariaqarpa?

(5) Tussiaat 133:1-p aamma Matthæusi 5:3-p ataatsimeersuarnerni najuuffigisimasanni eqquunnerat malugisimaviuk?

(6) Guutimik ilinniartitaanerup pissaaneqarnera sutigut takussutissaqarpa? — Saqq. 7:9.

(7) Kristumiut ilumoortut ataatsikkut kuisittut amerlanerpaaffii qassiuppat?

(8) Mikap, Petrusip Jiisusillu oqaasii sorliit Jehovap Nalunaajaasuisa akornanni piviusunngoreerpat?

(9) Suup qularunnaarsippaatit pilluarluni ataasiussuseqarlunilu ilaqutariinneq sinnattuinnaanngitsoq?

(10) Videofilmi kimut takutissaviuk aamma sooq?

Qatanngutip arnap videofilmimi takusani ataatsimut ima oqaatigai: „Filmip tamatuma, nunarsuarmi tamarmi qatanngutit angutit arnallu amerlangaartut maannakkorpiaq Jehovamut aalajaallutik kiffartornerannik suli annerusumik eqqaamasassippaanga . . . Aap, qatanngutigiittut ataasiussuseqarnerput . . . ilumut naleqangaarpoq.“ — Ef. 4:3.