Suna siunertarineqarpa?
1 Sooq atuaqqissaaqateqartarpugut? Ilisarsititsinissaq, inuit pitsaanerusumik inuuneqalernissaat isumalluarnarnerusumilluunniit siunissaqalernissaat kisimit siunertarineqarpat? Naamik, Jiisusi Kristusimut ajoqersuganngortitsinissaq siunertarpiaavoq. (Matt. 28:19; Aps. sul. 14:21) Taamaammat atuaqqissaaqatigisartakkatta ataatsimiigiaqataasarnissaat pingaaruteqarpoq. Anersaakkut siumukarneq ilagiit kristumiut aqqissuussaanerannik pingaartitsilernermut ilaavoq.
2 Pingaartitsilertartoq: Ilinniartoq aallaqqaataaniit ilagiit ataatsimiinnerinut peqataaqqullugu aalajangersimasumik kajumissaartariaqarpat. (Hebr. 10:24, 25) Nassuiaaguk ataatsimiinnerit uppernera qanoq nakussatsissagaat, Guutip peqqusaanik iliornissaanut ikiussagaat Jehovamillu unnersiutiginnikkusuttunik nuannersumik peqateqalersissagaat. (Tuss. 27:13; 32:8; 35:18) Peqatigiiffimmut ataatsimiittarnernullu nuannarinninnerit ersersittarukku ilaanissaanut kajumilersissavat.
3 Nutaat Jehovap peqatigiiffiata nunanit tamaneersunit qatanngutigiiffiunera paasisariaqarpaat. Videofilmit Jehovas Vidner og deres organisation aamma Oplæring fra Gud forener takutikkit. Paasitillugillu pingaartitsilersikkit Jehovap nunarsuarmi tamarmi kiffani millionillit aallussilluartut siunertani naammassiniarlugu atotarai. Nutaat Guutimik kiffartornissaminnut aamma qaaqqusaanerannik oqaluttuukkit. — Esaja 2:2, 3.
4 Nuannaarutaangaartarpoq Biibilimik atuqqissaaqatigisartagarput Jiisusimut ajoqersuganngoraangat, tamannarpiaavorlumi oqaluussinitta siunertarisaa. — 3 Joh. 4.