Ilissi angajoqqaat — meeqqasi meeraanneraniilli ajoqersorsigit
1 „Nukappiaraq ingerlavissamigut ingerlaannarnissaanut kajumissaaruk, utoqqaligaluaruniluunniit tamanna nigussanngilaa.“ (Uss 22:6) Ilissi angajoqqaat kissaatigigussiuk meeqqasi sallusuissutsip aqqutaatigut ’nigussanngitsut’, taava ilinniartitsineq qaqugu aallartinneqassava? Siusissukkut!
2 Paulusi oqarpoq Timotheusi ’meeraaneraniilli’ ajoqersorneqarsimasoq. (2 Tim 3:14, 15) Tamanna tunngavigalugu Timotheusi inuttut anersaakkut ittunik pingaartitsisutut ineriartorpoq. (Fil 2:19-22) Ullumikkuttaaq ilissi angajoqqaatut meeqqassinnik ilinniartitsineq pingaarutilik ’meeraanneraniilli’ aallartittariaqarparsi, ’[Jehova] najorlugu alliartoqqullugit’. — 1 Sam 2:21.
3 „Imerterinissamut najoqqutassaalluartoq“: Soorlu orpiit naarlaat kusanartorsuanngorlutik naatikkumallugit imertertuartariaqartut, meeqqattaaq assigiinngitsunik ukiullit Guutimut kiffaaleqqullugit inersimalluartut, imertullusooq Biibilimik ilisimasassanik imerterneqarluartariaqarput. Meeqqat sallusuissummik ajoqersorniarlugit Jehova Guutimullu qanimut attaveqalersinniarlugit aalajangersimasumik ilaqutariittut atuaqatigiittarnissaq pingaaruteqarnerpaavoq. Angajoqqaalli eqqarsaatigisariaqarpaat meeqqat ataasiakkaat qanoq sivisutigisumik atuaqqissaaqatigiinnermi malinnaasinnaanerat. Meeqqat nukanganeruppata, ilinniagassat naatsunnguit sunniuteqarnerusinnaapput ilinniagassanit takisuuninngarnit. — 5 Mos 11:18, 19.
4 Meeqqavit ilinniagaqarsinnaasusiat nalilernerlussanngilat. Biibilimi inuttaasut pillugit oqaluttuuttakkit. Biibilimiit pisimasunik titartaallik oqaluttuarineqartulluunniit pillugit isiginnaartitsillik. Videofilmiutivut kassettebåndillu, ilaatigut tusarnaagassiat atorluartarsigit. Ilaqutariittut atuaqqissaaqatigiittarnersi, meeqqassi ukiui ilinniagaqarsinnaassusiilu naapertorlugit, naleqqussarsiuk. Aallaqqaammut annikitsunnguanik tunngaviusunik ajoqersorneqassapput, anginerulaalerpatalu ilinniartitsineq sivisunerulersinnaavoq ineriartornartuullunilu. Ilinniartitsineq uummarissuuli allanngorartuullunilu. Kissaatigigukku meeqqavit oqaatsip immua kajungerilissagaa, taava atuaqqissaaqatigiinneq sapinngisamik orniginartuutittariaqarpat. — 1 Pet 2:2.
5 Ilagiit iluanni pisartuni peqataatissigit: Meeqqasi ineriartornartunik, ilagiit iluanni pisartuni peqataanissaanik iluaqutaasinnaasunik anguniagaqartissigit. Anguniagassaq siulleq sunaasinnaava? Angajoqqaat marlunnik meerallit oqarput: „Siullermik, naalagaaffilersaarfitsinni nipaqaratik issiasinnaanissaannik ilinniartippavut.“ Piffissap ingerlanerani ataatsimiinnerni meeqqat namminneq oqaatsitik atorlugit akisarnissartik ilikkartarpaat, Teokratiimillu Atuarfimmut ilanngunnissartik anguniagaralugu. Oqaluussinermi naqitaaqqanik agguaanissaq, allassimaffimmik atuaanissaq, atuagassianik saqqummiinissaq pulaakkaminnillu oqaloqateqarnissaq anguniagarisarpaat.
6 Maligassaalluarit: Meeqqavit, ullut tamaasa Jehova pillugu oqaluttutit qinusutillu tusaasarpaatsit? Oqaasiinik atuaqqissaartutit, ataatsimeeqataasutit oqaluussisutillu takusarpaatsit? Qularutiginngilluinnarpaat Guutip peqqusai kajumissutsinnik suliarigitit? (Tuss 40:9) Tamakku tamaasa peqatigiillusi suliarisarsigit, maligassiuinerimmi aalajangiisuuvoq. Arnaq, anaanani meeqqanik arfinilinnik aalajaallutik Jehovamut nalunaajaasunngortunik perorsaasimasoq pillugu oqarpoq: „Uannut sunniuteqarnerpaasoq tassavoq anaanama nammineq maligassiuinera. — oqaatsinit naleqarneruvoq.“ Anaanaq sisamanik meeralik oqarpoq: „’Jehova pingaarneruvoq’, uagutsinnut ussataannaanngilaq, inooriaasiuvorli.“
7 Ilissi angajoqqaat, piaartumik meeqqasi ilinniartissigit, sallusuissummik Guutip oqaasianeersumit ajoqersorsigit, anguniagaqartittuarsigit namminerlu maligassaalluarniarsarigitsi. Peqqissiminavianngilatit!