’Ajunngitsulianik pisuussuteqarit’
1 Kiffartornermini ukiuni kingullerni apustili Paulusip Timotheusi Titusilu qanimut suleqatigai. Qiimmaallannartunik kajumissaarilluni taakkununnga allappoq. Titusimut allakkamini eqqaavaa ’Guutimut uppertunngortut pingaartittariaqaraat ajunngitsumik eqqortumillu iliorneq.’ (Tit 3:8) Timotheusimut allappoq Guutimut tatiginnittut ’ajunngitsulianik pisuussuteqartariaqartut.’ (1 Tim 6:17, 18) Silatuumik siunnersuutit malittariaqarpavut. Suulli ajunngitsuliornissatsinnut kajumissisinnaavaatigut? Suliallu aalajangersimasut sorliit ulluni qaninnerusuni suliarineqartussat eqqarssaatigineqarpat?
2 Jehovamut uppernerput asanninnerpullu, aammalu uagutsinnut nuanningaartumik neriuuteqalersitsinera ajunngitsulianik pisuussuteqarnissatsinnut kajumissaataavoq. (1 Tim 6:19; Tit 2:11) Pisussami matumani immikkut ittumi eqqaasinneqarpugut, Jiisusip ataatami aqqa salinniassammagu, qinngaqqunnanngitsunullu inuunermik pissarsisussanut tunngavissiiartoqqullugu Jehovap erni nunamut aallartikkaa. (Matt 20:28; Joh 3:16) Marsip 28-ani Kristusip toqunerani nalliuttorsiornermi tamanna erseqqissarneqassaaq. Inuunermik naassaanngitsumik neriuutissaqalersimanerput eqqarsaatigalugu, ’ajunngitsulianik pisuussuteqarnissatsinnut’ kajumissisinneqannginnerpugut? Aap, taamaappoq. Suliat suut maannakkut suliarisariaqarpavut?
3 Marsimi kingornatigullu suliassagut ajunngitsut: Soorunami eqqaaniaalluni nalliuttorsiorneq, nunarsuaq tamakkerlugu Jehovap Nalunaajaasuinut ukiumut pissussaq pingaarnerpaaq najuuffigissavarput. (Luk 22:19) Aammali neriuutigaarput amerlasuut najuukkumaartut nuannaaqatigalutalu. Jehovas Vidners Årbog 2002-mi allassimavoq nunani amerlasuuni oqaluussisartut pingasoriaataat, sisamariaataat, tallimariaataat amerlanerusulluunniit siorna eqqaaniaanermi najuussimasut. Aap, angalaarfigisartakkatsinniittut sapinngisamik amerlasuut qaaqquniarlugit ilagiinni tamani ilungersortoqarsimavoq. Taamaattumik kissaatigaarput marsip 28-a tikitsinnagu piffissap annersaa eqqaaniaanermut qaaqqusinermut atorneqassasoq taamaalilluta allat annannissamut neriuummik ilinniartissagatsigit.
4 Apriilimi qaammariartornera silallu kissatsikkiartornera malugisinnaalissavarput. ’Ajunngitsulianik pisuusuteqarniarutta’ tamanna qanoq atorluarsinnaavarput? ’Ajunngitsuliornissamik noqqaassuteqartuarluta’ tusagassap nuannersup oqaluussisuutigineqarnerani ilungersorluta peqataanitsigut. (Tit 2:14; Matt 24:14) Marsimi ikiortipioneriusinnaanngikkuit immaqa apriilimi majimiluunniit pisinnavutit? Marsimi ikiorti pioneriuguit, ikiorti pioneriunerit ingerlatiinnarsinnaaviuk?
5 Ilaasa suliartortillutik aqqusinermi angalaarnermi pisiniarfinniluunniit ullaaralaakkut ammartartuni sulisunut saaffiginnillutik nalunaaquttap akunnera ataaseq oqaluussinermut atorsinnaallugu paasisimavaat. Allat ulloqeqqasiornertik oqaluussinermut atorniarlugu pilersaaruteqarput. Ilaasa suleqatiminnik Biibilimik atuaqqissaaqateqarnermut atorsimavaat. Qatanngutit angerlarsimaffimminni ningiuusut meeqqat atuarneranni oqaluussinissartik pilersaarutigaat. Sapaatip akunnerup ulluisa ilaanni makiaarlutik illumi suliassatik suliareriarlugit ullup ingerlanerani oqaluussinissaminut piffissaqarnerusarput. — Ef 5:15, 16.
6 Ikiorti pioneriusinnaanngikkuit, immaqa illit nammineq pilersaarusiorsinnaavutit ’ajunngitsuliornissamut ajunngitsulianillu pisuussuteqarnissamut, tukkorlutit inoqatinnullu tunniussisarlutit’ tusagassamik nuannersumik oqaluussinikkut. — 1 Tim 6:18.
7 Ajoqersuganngortitsineq ajunngitsuliornermut ilaavoq: Ukiut tamaasa soqutiginnittunik eqqaaniaanermut aggertoqartarpoq. Immaqa aamma Biibilimik atuaqqissaaqatigineqarneq ajortut aggertarput, taamaattumik pitsaassaaq taakkua oqaluussisartut soqutiginninnermik ersersitsivigippatigit. Anersaakkut siuarianissaanik ikiorniarlugit pulaaqqiiffigineqarsinnaappat? Qularnanngitsumik soqutiginnittut ilaat eqqaaniaanermut peqataasut Jehovap Nalunaajaasuinik ilaqutaqarput. Immaqa siornatigut ilaat Jehovap Nalunaajaasuinik atuaqqissaaqateqartarsimapput, atuaqqissaaqqittalernissamut ataatsimiigiaqqittalernissamullu kajumissaarneqalaaginnarnissartik immaqa pisariaqartippaat. Jehovap Nalunaajaasuisut ingerlallualeqqittuugunik uagutsinnut nuannaarutaangaassaaq.
8 Marsimi kingornatigullu kiffartornerulerutta angalaarfigisartakkatsinni soqutiginnittut uterfigeqqissinnaasavut suli amerlanerulernissaat ilimanarluinnarpoq. Pulaarfigisannut apeqqummik naggasiillutit misiliguk. Neriorsorullu aggeqqikkuit tamanna akiumallugu. Taamaalillutit pulaaqqiinissamut periarfissaqalerputit. Aggeqqiaarluni pitsaanerussaaq. Pulaarnermi siullermi Biibilimik atuaqqissaaqatigiittalersimanngikkussi, pulaaqqiinermi atuaqqissaaqaserisigit. Naqitaaqqap Biibilimik paasisaqarnerorusuppit? atornissaa eqqaamajuk.
9 Aqqusinermi angalaaraangatta inuit oqaloqatiginissaat anguniartariaqarparput. Oqaluussisartorpassuit soqutiginnittut aqqi sumilu najugaqarneri oqarasuaatillu normui aqqusinermi naapitaminnit pissarsiarisarsimavaat. Illoqarfigisanni najugaqanngitsumik oqaloqateqaruit ilagiinni allatsimut nalunaarutigikkit, taassuma ilagiinnut soqutiginnittup najugarissaaniittumut nalunaarutigissavai. Soqutiginnittoq nunaqarfimmi najugaqarpat, illoqarfimmullu sorlermut atanersoq allatsimit ilisimaneqanngippat, allatsi immikkoortortaqarfimmut paasissutissanik ingerlatitseqqittussamut allassinnaavoq. Taamaaliornikkut soqutiginninnerit tamarmik malittarineqarsinnaassapput.
10 Soqutiginnittup najugaqarfia paasinagu oqarasuaatip normua pissarsiarisimagukku soqutiginnittoq sianerfigalugu pulaaqqiisinnaavutit. Oqaasissatit siumut piareersakkit. ’Ræsonnerebogi’ qupperiaannanngorlugu piareersimatiguk. Arlallit oqarasuaatikkut atuaqqissaaqateqarneq misilittagaqarfigilluarpaat, ingammik angerlarsimaffimmi naapikkuminaatsitaminnut. Qatanngutip arnap illumiit illumut angalaarluni naapittakkani arnat soqutiginnittut oqarasuaataata normuu apeqqutigisalersimavaa. Tamaaliornera marlunnik Biibilimik atuaqqissaaqateqalernermik kinguneqarpoq.
11 Utoqqaanertat suleqatigikkit uunittooqqasut ikiorniarlugit: Utoqqaanertat qatanngutinik angutinik arnanillu unittooqqasunik ikiuerusuttorujussuupput. Unittooqqasut ilaasa nammineerlutik ilagiit ataatsimiinneri najuuffigeqqittalersimavaat. Paasisimavaat anersaakkut toqqissisimaneq Tussiaatit 91-mi allaaserineqartoq pigiumagaanni Jehovap peqatiigiiffianut qanimut attaveqarnissaq pingaaruteqartoq. Taakku ilaat kiffartuleqqinnissamut piareeqqapput. Unittooqqasut allat ukioq manna eqqaaniaanermut ilaasut, Biibilimik atuaqqissaqatigineqarnissartik immaqa nuannaarutigissavaat. Taamaappat oqaluussisartunit atuaqqissaaqatigineqarnissaat utoqqaanertat isumagissavaat. Ikiunissamut taamaattumut piumaffigineqaruit, suleqataanerit pingaartinneqangaassaaq. — Rom. 15:1, 2.
12 ’Ajunngitsumik eqqortumillu iliortuarit’: Qaammammi ataatsimi arlalinniluunniit ikiorti pioneriusimasorpassuit misigisimavaat qaammatini tulliuttuni kiffartornerulertarlutik. Soqutiginnittunik uterfigeqqikkusutaminnik naapitsisarput. Pulaaqqittagalikkatik orninniarlugit oqaluussikulanerulernissaminnut kajumissisinneqartarput. Ilaat Biibilimik atuaqqissaaqateqalertarput, taamaalillutillu kiffartornertik annertunerulersittarlugu.
13 Allat oqaluussinerulernerminni ajoqersuganngortitsiortornerminnilu nuannaarnerulersimasut anguniakkatik periarfissatillu eqqarsaatigeqqissaaqqilersimavaat. Ilaasa sulinikinnerulernerannik aalajangersimasumillu ikiorti pionerinngornerannik kinguneqarsimavoq. Allat nalinginnasumik pioneritut allartissinnaasimapput. Taamaalillutik silarsuarmuunngitsoq Guutimulli tatiginnilluinnarnertik ersersippaat. ’Tukkornermikkut inoqatiminnullu tunniussisarnermikkut’ Jehovamit pilluaqqusaangaarsimapput ’inuunivimmillu’ neriuutertik aalajaallisimallugu. (1 Tim 6:18, 19) Suli amerlanerusut pionerinngorpata ilagiinniittut tamarmik soorunami iluaqutigissavaat. Pionerit misigisimasaminnik oqaluttuakulasarput oqaluussisartunillu allanik angalaaqatissarsiortarlutik, tamanna ilagiinni akaareqatigiilluni anersaaqarnermut allisaaqataasarpoq.
14 Qanortoq tamatta eqqaaniaanissap nalaani ’ajunngitsulianik pissussuteqarta’ siunissamilu oqaluussinermi tamaviaarnerulluta. Jehovap silarsuarmi nutaami iluassuseqarfiusumi naassaanngitsumik inuunissamik uagutsinnut neriuuteqalersitsisimanera pingaartillutigu takutitsigu. — 2 Pet. 3:13.