Quppersagaq Tusagassat nuannersut atorlugu ilinniartitsineq
1. Quppersagaq Tusagassat nuannersut qanoq suliarineqarsimava?
1 Guutip naalagaaffianut kiffartorneq-mi juulimoortumi sammineqartutut quppersagaq Tusagassat nuannersut Guutimeersut! ilinniartitsinermi atortakkatta pingaarutillit ilagaat. Pulaakkap Biibilimit toqqaannartumik atuaanerup nuannersua misiginiassammagu allassimaffiit innersuussutigineqartut issuarneqanngillat. Biibililersaarutivut atuaqqissaarnermut atorneqartartut amerlanerit atuartup atuaannarlugit ilinniarfigisinnaavai, Biibililersaarulli taanna ilinniartitsisumik eqqartueqateqarnissamut iluaqutissatut suliarineqarsimavoq. Taamaattumik neqeroorutigigaangatsigu pulaakkap nutaarsiassamik nuannersumik Biibilimeersumik ilinniarnerup nuanningaarnera paasiniassammagu qanoq atuaqqissaartoqartartoq takutittariaqarparput. – Matt 13:44.
2. Quppersagaq Tusagassat nuannersut pulaaqqaarnermi qanoq atorsinnaavarput?
2 Pulaaqqaarnermi. Ima oqarsinnaavutit: “Alakkarpakkit inuppassuit siunissaq pillugu isumakuluuteqartarmata. Isumaqarpit pissutsit pitsaanerulerumaartut? [Akissutaanut tusarnaarit]. Biibili neriuuteqalissutigisinnaasatsinnik nuannersunik nutaarsiassaqarpoq. Ilaatigut apeqqutit uku Biibilimi akineqarput.” Quppersagaq pulaakkamut tunniuguk quppernermilu kingullermi apeqqutit ilaannik toqqaaqqullugu. Taava ilinniagassami immikkoortoq siulleq atorlugu qanoq atuaqqissaartoqartartoq takutiguk. Imaluunniit ilinniagassaq illit toqqakkat tunngavigalugu pulaagaq soqutiginnilersitsisumik aperisinnaavat, taava takutissinnaavat quppersagaq iluaqutigalugu qanoq Biibilimi akissutissarsiortoqarsinnaasoq. Ilinniagassamut tassunga jw.org-imi isiginnaagassiaq oqaluussisartut ilaasa aallarniinerminni takutikkumassavaat.
3. Quppersagaq Tusagassat nuannersut atorlugu qanoq atuaqqissaartoqarsinnaasoq nassuiaruk.
3 Qanoq Biibilimik atuaqqissaaqateqartoqarsinnaasoq. (1) Pulaakkap pingaarnertut sammineqartoq eqqaamaniassammagu apeqqut erseqqissarneqarsimasoq kisitsisitalik atuaruk. (2) Immikkoortoq atuaruk. (3) Allassimaffiit uingasunik allanneqarsimasut atuakkit apeqqutillu kisitsisitalerneqarsimasup allassimaffimmi qanoq akineqarnera pulaakkap paasiniassammagu periaaserissumik apeqquteqarlutit. (4) Apeqqutip ataani allamik immikkoortoqarpat qulaani 2 aamma 3 uteqqikkit. Isiginnaagassiaq apeqqummut tulluartoq pulaakkannut suli takutissimanngikkukku eqqartueqatigiinnissinni takutikkumasinnaavat. (5) Kingullertut pulaakkap paasisaqarsimanera qulakkeerniarlugu apeqqut kisitsisitalerneqarsimasoq apeqqutigiuk.
4. Quppersakkap atorluarnissaanut suna iluaqutigissavarput?
4 Quppersakkami sammineqartut ilisimallualikkit. Periarfissaqaraangavit atorluartaruk. Atuaqqissaaqateqalinnginninni ilinniagassami allassimaffiit atorlugit atuaqqissaaqatigisartakkat qanoq pitsaanerpaamik eqqarsalersissinnaanerlugu eqqarsaatigisaruk. (Uss 15:28; ApS 17:2, 3) Misilittagaqarneruleruit pikkorinneruleruillu immaqa quppersagaq taanna sallusuissummik ilinniartitsinermi atorneqartartut pitsaanerpaartaattut isigilissavat!