Pruffiitit maligassariniarsigit — Jona
1. Jonap suut pissuserineqartussat ajunngitsut pissuserai?
1 Pruffiiti Jona qanoq eqqarsaatigisarpiuk? Ilaasa qunutuutut naakkittaatsutullu isigisarpaat. Taamaakkaluartorli maniguunnermik, sapiissuseqarnermik imminullu pilliutigeriaannaanermik ersersitsisarpoq. Jonap pissusii nersornartut qanoq ‘malissinnaavavut’? — Jaak 5:10.
2. Jonap maniguunnera qanoq ilaarsinnaavarput?
2 Maniguunneq: Aallaqqaammut Jona oqaluussiffigiartugassami killuata tungaanut qimaavoq. Assyriamiut nakuusertartutut Ninevellu ‘aap illoqarfiatut’ ilisimaneqarnerat pissutigalugu tamanna tupaallannanngilaq. (Nah 3:1-3) Jehovap Jona, aappassaaneerluni suliassinneqarnerminik akuersinermigut maniguunnermik ersersitsisoq, perorsaatissippaa. (Uss 24:32; Jon 3:1-3) Piumassuseqanngeqqaaraluarluni Jehovap piumasaatut iliorpoq. (Matt 21:28-31) Uaguttaaq perorsaatissinneqarsimagaluarluta imaluunniit imaannaanngitsumik oqaluussiffigisartagaqaraluarluta nutaarsiassamik nuannersumik oqaluussissutiginninnissatsinnik aalajangiusimannippugut?
3. Oqaluussisarninni sapiissuseq imminullu pilliutigeriaannaaneq qaqugukkut pisariaqartittarpigit?
3 Sapiissuseq imminullu pilliutigeriaannaaneq: Jonap paasigamiuk eqqunngitsumik aalajangiinermigut umiartortut inuunerannik navianartorsiortitsilluni inuunerminik pilliutiginninnissaminut piumassuseqarpoq. (Jon 1:3, 4, 12) Kingusinnerusukkut Ninevemi suliassani naammassiumallugu, Jehovap eqqartuussutaa nalunaarutigiumallugu, sumiiffimmik naleqquttumik ujarlerniarunarluni illoqarfiup qeqqanukuarpoq. Taamatut iliuuseqarneq qunutuunermik ersersitsinerunani Guutip pruffiitiatut sapiissuseqarnermik ersersitsineruvoq! (Jon 3:3, 4) Uagummi? Akerlilersorneqarnitsinni nakimaalluta oqaluussisinnaajumalluta Guutimit sapiissusermik tunineqarnissarput pisariaqartipparput. (ApS 4:29, 31) Piffissarput nukivullu oqaluussinermut atorsinnaajumallugit imminut pilliutigeriaannaasariaqarpugut. — ApS 20:24.
4. Sooq Jehovap pruffiitiisa maligassiuilluarnerannik eqqarsaatiginneqqissaartarnissarput pingaaruteqarpa?
4 Jehovap pruffiitiisa ilaat pillugu oqaluttuamik atuarnerit tamaasa pisunut ilaallutit takorluuisarnerit iluaqutigissavat. Imminut ima aperisarit: ‘Uanga qanoq periarsimassagaluarpunga? Taassuma pissusii ajunngitsut qanoq ilaarsinnaavakka?’ (Heb 6:11, 12) Siunissami Guutip naalagaaffianut kiffartorneq-mi allaaserisani Jehovap pruffiitiisa aalajaatsut allat pissusii pingaarutillit ilaasinnaajumallugit sammissavavut.