Guutip oqaasia sunniisarpoq
1. Ukiumi kiffartorfiusumi 2014-imi immikkut ittumik ataatsimeersuaararnissaq qanoq qulequtaqarpa?
1 Inuit naammalluinnanngitsut sunniisinnaassusiisa akerlianik, Biibili Jehovap piumasaanut naapertuuttumik eqqarsaatitsinnik iliuusitsinnillu allannguisinnaassuseqarpoq. Guutip oqaasia qanoq sunniisinnaassuseqartigaa? Tamanna inuunitsinni qanoq atorluarsinnaavarput? Allat ikiorniarlugit qanoq iluaqutigilluarsinnaavarput? Qularutiginngilluinnarparput, ukiumi kiffartorfiusumi 2014-imi immikkut ittumik ataatsimeersuaararnissamut saqummiussassat piareersarneqartut tamatta anersaakkut nakussatitsissutigiumaarivut. Qulequtaq Hebræerinut allakkani 4:12-imit tunngaveqartoq unaavoq: ‘Guutip oqaasia sunniisarpoq’.
2. Apeqqutit suut akissutissarsissavavut?
2 Apeqqutit uku akissutissarsikkit. Saqqummiusanut tusarnaartillutit apeqqutit ataani allassimasut akissutaat allattukkit.
• Sooq Jehovap oqaasia tatigisariaqarparput? (Tuss 29:4)
• Guutip oqaasiata sunniisinnaassusia inuunitsinni qanoq misigisinnaavarput? (Tuss 34:9)
• Guutip oqaasia oqaluussininni qanoq nammineq sulitissinnaaviuk? (2 Tim 3:16, 17)
• Qanoq Saatanip silarsuaata sunniisinnaassusianik nakutitaanaveersaarsinnaavugut? (1 Joh 5:19)
• Anguniakkat anersaakkut ittut inuusuttuutillutit qanoq anguniarsinnaavigit? (Jer 17:7)
• Naak sanngiikkaluarluta qanoq pissatsinneqarsinnaavugut? (2 Kor 12:10)
• Sivisuumik ileqqupalaaqarsimagaluaruttaluunniit eqqunngitsunillu isiginnitaaseqarsimalluta inuunitta allanngortikkiartuaarnissaanut suna pisariaqarpa? (Ef 4:23)
3. Saqqummiussassanut tusarnaarnitta saniatigut immikkut ittumik ataatsimeersuaararneq qanoq iluaqutigisinnaavarput?
3 Paasissutissat tusagassavut iluaqutigissaqaagut! Immikkut ittumik ataatsimeersuaararnermi, ataatsimeersuaararneq aamma ataatsimeersuarneq assigalugit, ammarnissamut periarfissaqalissaagut qatanngutivullu nuannisaqatigalugit. (Tuss 133:1-3; 2 Kor 6:11-13) Taamaattumik ikinngutitoqqanut piffissaqarit nutaanillu ikinngutissarsiorlutit. Betelimiit aallartitaq imaluunniit ilageeqatigiinnik arlalinnik nakkutilliisoq immikkut ittumik ataatsimeersuaararnermi najuutissappat, soormi taanna nulialu tikilluaqqunianngiligit? Ilumut immikkut ittumik ataatsimeersuaararnissamut qilanaarutissaqarluarpugut!