Oqaluussinermi misigisat
◼ Australia: John, ilinniagartooq, meeraalluni naalagiartarsimavoq, kingornali “ingasaassilluni guuteqannginneraasunngorpoq”. Qatanngutip pioneriusup quppersakkamik Er livet en Skabers værk?-imik tunivaa pulaaqqiinermilu quppersagaq Fem gode spørgsmål om livets oprindelse tunniullugu. Pulaagaq soqutiginninnerulersinniarlugu qatanngutip atuagassianik nutaanik pajuttaannarpaa pinngortitamik Biibilimiluunniit siulittuutinik allaaserisat takutinniartarlugit. Qatanngut misigigami John piareersimalersoq atuagaq Bibelen — Guds ord eller menneskers? tunniuppaa. Atuagaq atuareerlugu John imminut “agnostikeritut ingasaassinianngitsutut” taavoq. Taava qatanngutip atuakkami Biibilimi ajoqersuutigineqartut-imi qupperneq 20 immikkoortoq 8 aamma qupperneq 23, 24-milu immikkoortut 13-imiit 16-imut takutippai. Atuakkami allassimaffiit innersuussutigineqartut Johnip tupigusuutigingaaramigit ima oqarpoq: “Immaqa Biibili misissorneroqqilaarukku.”
◼ Mexico: Angutip oqaluussisartoq oqarfigaa nammineq Biibili Guutip oqaasiatut upperinagu. Oqaluussisartup neqeroorfigaa Biibilip Guutiminngaanneersuunera uppernarsarumallugu. Eqqartueqatigiittareerlutik Biibilimi ilikkakkani angutip killitsissutigilerpai. Guutip najoqqutassiai killitsissutiginerpaavai. Oqaluussisartumut oqarpoq: “Biibili atuaqatigiissutigeqqaaleratsigu soorlu tassa atuagaq sunaluunniit siunnersuuteqaannartoq uannullu sunniuteqarnavianngitsoq. Maannakkulli atuaraangatsigu, pingaartumik ileqqussatigut najoqqutassianut siunnersuutinut tunngatillugu, nalunngeqatiginnissutsikkut attorneqaatigisarpara.”
◼ United States: Aappariit illoqarfissuarmi immikkut ittumik tamanut oqaluusitillutik arnamit Taiwanimiumit saaffigineqarput. Guutimut upperneraraluarluni isumaqarpoq Biibili kitaamiunuinnaq atuagaasoq. Naak inuunermini amigaateqanngikkaluarluni inuunini imaqanngitsutut misigaa. Neriulluni Biibili aqqutigalugu inuunerminik siunertaqarlersitsisumik nassaarsinnaassalluni aappariit atuagassianik ilitsivigisaannukarpoq. Aappariit atuagaq ‘Biibilimi ajoqersuutigineqartut’ aamma quppersagaq Lasting Peace and Happiness — How to Find Them (kalaallisuunngortitaanngilaq, jw.org-imili oqaatsini arlalinni atuarneqarsinnaavoq) atorlugit atuaqqissaaqatigisalerpaat. Atuakkami kapitali 2 atuanngiinnarlugu quppersakkami ilinniagassaq 4 atuarpaat. Immikkoortut arfinillit siulliit atuareeramikkit arnaq oqarpoq Biibili upperisarsiornermut tunngasunut allakkanut naleqqiullugu immikkorluinnaq ittuusoq. Biibilimi siulittuutit ilaasa eqquussimaneri sammereerlugit ima oqarpoq: “Biibilitut taama eqqoqqissaartigisumik allassimasumik atuakkanik allanik eqqaasaqarsinnaanngilanga!”
◼ Japan: Naak pulaakkap oqaluussisartoq oqarfigereeraluaraa Guuti nammineq upperinngikkini oqaluussisartup alakkalaaginnartarnini ingerlatiinnaarpaa Vågn op!-imilu allaaserisaq “Står der en designer bag?” maluginiaqqusarlugu. Paasinnikkiartuaartilluni angutip isiginnittaatsini allanngortikkiartuaarpaa Pinngortitsisoqarsimassagunartorlu nassuerutigalugu. Maannakkut Guuteqarnera upperilerpaa quppersagarlu Tusagassat nuannersut Guutimeersut! atorlugu atuaqqissaaqatigineqartarluni.
◼ Canada: Arnaq biilerniarluni illuminit anisoq angumeralugu qatanngutip arnap atuagassianik tunivaa. Qatanngut arnaq pulaaqqiilluni aggeqqimmat arnap sukangasumik oqarfigaa soqutiginninnani Guutilu upperinagu. Qatanngut arnaq tunniutiinnarnani aalajangerpoq uteqqiniarluni quppersagaq Nalerisimaarluni qanoq inuusoqalersinnaasoq tunniukkiartorlugu. Arnaq angerlarsimasoq naammattooramiuk qatanngutip arnap oqarfigaa nalunngikkaluarini Guutimik upperinninngitsuusoq nalunnginnamiulli anaanaasoq kisimiittoq eqqarsaatigisimallugu. Quppersakkami qupperneq 4-mi immikkoortoq 6 siunnersuutitsialannik sumi nassaassaqarnersoq pillugu allaaserisaq arnamut takutippaa. Meeqqanik perorsaanermut siunnersuutit ilinniagassaq 2-miittut atuaqqullugit kajumissaarpaa. Arnap quppersagaq nuannaarluni tiguaa.