Aggusti qaammat — oqaluttuarisaanermi suliniarnersuaq!

1. Naalagaaffiup ukiut hundredinngulernerani immikkut ittumik suna suliniutigineqassava?

¹ Guutip naalagaaffia aqutsilermalli ukiut hundredinngulernerani immikkut ittumik suliniarnitsigut Jehovap ataqqinaaserneqarnissaa tulluartuussaaq. Naqitaaraq nutaaq Inuunermi apeqqutit pingaarutillit qanoq akineqarsinnaappat? aggustip qaammataani nunarsuaq tamakkerlugu agguaanneqassaaq. Atuartartut naqitaaqqami kajumissaarneqassapput apeqqutit akissutaat Biibilimi atuaqqullugit. Aamma naqitaaqqami jw.org atorlugu akissutit qanoq nanineqarsinnaasut nassuiarneqassaaq.

2. Aggustimi ‘nillialluta qanoq Jehovamik unnersiutiginneqataasinnaavugut’?

² Nillialluta Jehova unnersiutigisigu. Oqaluussisartut kiffartornerulernissaannik ikiorniarlugit qaammammi aggustimi ikiorti-pioneriorusuttunut immikkut ittumik aaqqissuussisoqarsimavoq. Qaammammi tamatumani oqaluussisartut kuisimasut nalunaaquttap-akunneri 30-t anguniarnerisigut ikiorti-pioneriusinnaapput. Aggustip qaammataani sapaatip-akunnerata naaneri tallimaammata oqaluussisartut ulluinnarni sulisartut atuartulluunniit qaammammi tamatumani ikiorti-pioneriusinnaapput. Qitornat imaluunniit siuariartortumik atuaqqissaaqatit oqaluussisartunngorusuppat utoqqaanertaqatigiinnut ataqatigiissaarisoq saaffiginasuaruk. Qaammammi tamatumani oqaluusseqatigigunisigut taakkununnga ila qanoq qiimmaallaataatigissava! Naak pionerit qaammammi tamatumani ukiumut kiffartornermi angusassatik naammassigaangamikkit feriakaasaraluartut, immikkut ittumik suliniarnermut tamakkiisumik tapersersuiniarlutik pilersaarutitik allanngortissinnaassagunarpaat. Ilaqutariit aggustip qaammataani ‘nilliallutik qanoq Jehovamik unnersiutiginneqataassanerlutik’ eqqartueqatigiinnissaannut maannakkut piffissanngorpoq. — Ezra 3:11; Uss 15:22.

3. Immikkut ittumik suliniarnermut tunngatillugu suna neriuutaava?

³ Naak siornatigut assingusunik suliniuteqartarnikuugaluarluta neriuppugut suliniarnerput una oqaluttuarisaanermut ilanngukkumaartoq. Nalunaaquttap-akunneri qaammammut ataatsimut atorneqartut, oqaluussisartut ikiorti-pionerillu amerlanerpaaffii aggustimi qaangersinnaavavut? Qanortoq ukiup kiffartorfiusup 2014-ip naalernerani Jehovap innuttami nunarsuaq tamakkerlugu aggustip qaammataata oqaluussiffiulluarnerpaanissaanik suliniuteqarnerat pillugu pilluaqquligit! — Matt 24:14.