Guutimut qanilliar­tuaarnerput iluaqutaavoq!

1-2. (a) Qanimut ikinnguteqarlualerumalluta qanoq iliussaagut? (b) Allaaserisami suna sammissavarput?

QANIGISANNIK ikinnguteqarpit? Qanoq iliorpit ikinngutigiumallugu? Ilimanarpoq piffissaqarfigil­luarsimassagit. Paasilerpat suut nuannerinerai suullu nuannarin­nginnerai taamaalil­lutillu ilisarisimal­lualerlugu. Nuannersunik pissuseqartoq maluginialerakku ilaarusulerpat. Ikinngutitullu asalerpat.

² Piffissaq annertooq atorneqar­tariaqarpoq qanimut ikinngutigiil­luarniaraanni. Aamma taamaappoq Jehovamut qanilliniaraanni. Allaaserisami matumani ikinngutiginerpaasatsinnut, Jehovamut, qanoq qanilliar­torsinnaanersugut tamannalu qanoq iluaqutigisin­naaneripput sammissavarput.

3. Sooq pingaaruteqarpa Jehovamik qanimut ikinnguteqalernitta iluaqutissartai eqqarsaatigis­sallugit?

³ Jehovamut qanimut ikinngutaanitta qanoq iluaqutaatiginera eqqarsaatigeq­qissaas­sallugu pingaaruteqarpoq. (Tuss 63:7-9) Sooq? Imatut nassuiarsin­naavarput: Nalunngilarput peqqinnartunik nerinissaq, timersornissaq, naammattumik sininnissaq imerluar­tarnissarlu ajunngitsuusut. Amerlasuulli tamakku eqqumaf­figinngitsoor­tarpaat imminullu paarinatik. Kisianni peqqinnartumik inuunerup iluaqutissartai eqqarsaatiginerujar­tortillugit peqqinnar­nerusumik inooriaaseqarusun­narnerulissaaq. Taamatuttaaq nalunngilarput Jehovamut qanillinissarput iluaqutigisin­naagipput, taamaalior­nerullu iluaqutissartai eqqarsaatigeq­qissaarutsigit Ikinngutitsinnut Jehovamut qanikkusun­nerulissaagut. – Tuss 119:27-30.

4. Tussiaat 73:28-mik allattoq qanoq misigiva?

⁴ Tussiaat 73:28 atuaruk. Tussiaat 73-imik allattoq Levikkuusoq guutisiorfimmi erinarsor­tartutut nipilersor­tartutullu kiffartuus­sisussatut toqqagaasimavoq. Ilimanarporlu sivisuumik Jehovamut kiffartorsimasoq. Nalunngilaali ‘Guuti qanillugu inuunerup’ pilluar­narnera eqqarsaatigiuar­tariaqarlugu. Inoqatinilu paasitik­kusuppai aamma taakkua Guutimik ikinnguteqarnertik iluaqutigisin­naagaat. Iluaqutis­sartaasa ilaat suuppat?

“GUUTI QANILLUGU INUUNEQ” PILLUARNARPOQ

5. (a) Sooq Jehovamut qanilliartorneq pilluarnermik kinguneqarpa? (b) Jehovap ilisimassusia qanoq illersuutigalugulu iluaqutiginikuuiuk? (Ussatit 2:6-16)

⁵ Jehovamut qanilliar­tuinnar­tilluta nuannaar­nerulissaagut. (Tuss 65:5) Pilluar­neruler­nissatsinnut pissutis­sarpassuaqarpugut. Assersuutigalugu Biibilip siunnersuutai atuaraangatsigit malillugillu ilisimas­suseqar­nerulersarpugut. Jehovap ilinniar­titsissutai ulorianartunut kukkorujus­suarnis­satsinnullu illersuutigisin­naavagut. (Ussatit 2:6-16 atuakkit). Taamaat­tuminguna Biibilimi ima allassimasoq: “Pilluarpoq inuk ilisimas­susermik pissarsisoq, inuk siuneqarluar­tunngorsimasoq.” – Uss 3:13.

6. Sooq tussiaasiortoq nuannaarunnaarpa?

⁶ Jehovap ikinngutai aamma nikallungasin­naasarput. Tussiaat 73-imik allattoq ajortunik eqqarsaateqalerami nikallorpoq. Eqqarsalerpoq inuit ajortut Guutimik najoqqutas­siaanillu soqutigisaqan­ngivillutik pilluarlutik inoorpasissut. Kukkulluni isumaqarpoq inuit nakuusertartut anneruniartullu pisuunngoriar­tuinnavissuusut peqqillutillu naalliuutinik nalaataqarneq ajortut. (Tuss 73:3-7, 12) Taakkulu sinngagileramigit allaat Jehovamut kiffartornini iluaqutaanersoq apeqquserpaa imalu oqarluni: “Uummatiga minguitsuutin­niarsimavara asuliin­naasumik, pinngitsuutin­niarlungalu assakka asattarsimallugit.” – Tuss 73:13.

7. Nikallungagaangatta qanoq iliorsin­naavugut? (Aamma asseq takuuk).

⁷ Tussiaasiortup nikallunganini unissutiginagu iliuuseqarfigaa. ‘Guutip illernar­tuutaanukarami’ Jehovamit ikiorneqarpoq eqqortumik isiginnit­taaseqaleq­qilluni. (Tuss 73:17-19) Nikallungagaangatta Ikinngutiginerpaasatta Jehovap naluneq ajorpaa. Jehovamut qinusin­naavugut qanoq iliornis­satsinnut ikioqqulluta. Biibilimi siunnersuutinit qatanngutitsinnillu qiimmas­sarneqar­tarnerput Jehovamut kiffartor­tuarnis­satsinnut nakussatsis­sutigisarparput. Allaat isumakuluuterpas­suaqaraangatta Jehovap tuppallersarlutalu eqqissisis­savaatigut. – Tuss 94:19.a

INUUNERMIK SIUNERTAQALERSITSISARPOQ NERIUUTEQALERSITSISARLUNILU

8. Guutimut qanillineq sunik allanik iluaqutis­sartaqarpa?

⁸ Guutimut qanillinerput pingaarutilinnik allanik iluaqutis­sartaqarpoq. Siullertut, inuunermik siunertaqalersitsisarpoq. Aappaattut, pilluar­nartumik siunissamik neriuuteqalersitsisarpoq. (Jer 29:11) Iluaqutissartai taakku sammineroriartigit.

9. Jehovamut ikinngutaanerput inuunitsinnik qanoq siunertaqalersitsiva?

⁹ Jehovamut ikinngutaanerput inuunermik siunertaqalersitsisarpoq. Guutip piuneranik upperin­ninngitsut ilarpassui isumaqartarput inuuneq siunertaqan­ngitsoq naggataatigullu nunarsuaq inuerutissasoq. Biibilimilli atuaqqis­saarnitsigut upperilersimavarput “Guuti piviusuusoq qamanngalu pisumik ujarlersiminik akissarsisitsisartoq”. (Hebr 11:6) Maannangaarlu pilluarluta inuuvugut Ataatarput qilammiusoq, Jehova, kiffartorfigigatsigu, taamaat­tussatummi pinngor­titaagatta. – Mos 5. 10:12, 13.

10. Jehovap tatigin­nitsini qanoq neriorsorpai? (Tussiaat 37:29)

¹⁰ Ullumikkut inuppassuit Guutip neriorsuutai naluaat. Taamaat­tumillu suliffeqarneq, aappariinneq, meeqqiorneq utoqqalinis­samullu aningaasaliinissaq kisiisa aalluppaat. Uagulli Jehova neriuffigaarput. (Tuss 25:3-5; Tim 1. 6:17) Ikinnguterput Jehova tatigaarput neriorsuutaalu upperalugit. Nuannerluin­nartunik qilanaarutis­sarpassuaqarpugut, minnerun­ngitsumik paratiisimi Jehovap naassaan­ngitsumik guutisiorfiginissaa qilanaaralugu. – Tussiaat 37:29 atuaruk.

11. Guutimut qanilliar­tornerput uagutsinnut Jehovamullu qanoq sunniuteqarpa?

¹¹ Guutimut qanilliar­tornerput arlalitsigut iluaqutaavoq. Assersuutigalugu Jehovap neriorsorpaatigut ajortuliatsinnik peqqissimis­sutigin­nikkutta isumakkeerfigiumaaraatigut. (Es 1:18) Taamaattumik siusinnerusukkut ajortuliarisimasagut pillugit pisuusutut misigiuaan­nartariaqan­ngilagut. (Tuss 32:1-5) Aamma nuannaar­taqaagut Jehova nuannaar­tikkaangatsigu. (Uss 23:15) Jehova qanimut ikinngutigigakku ajunngitsorpas­suarnik allanik eqqaasaqas­sagunarputit. Qanormi Jehovamut qanilliar­tortuarsin­naagatta?

QANOQ JEHOVAMUT QANILLIAR­TORTUARSIN­NAASUGUT

12. Jehovamut qanilliniarlutit qanoq iliuuseqarsimavit?

¹² Kristumiutut imermut morsutsitaasimaguit Jehova qanilliumallugu iliuuseqareersimavutit. Jehova Jiisusilu pillugit ilumoor­torpassuarnik ilisimasaqalersimavutit, ajortuliarisimasannik peqqissimis­sutigin­nissimavutit Guutimullu upperluar­tunngorsimallutit. Sapinngisannillu ilikkakkatit maleruar­niarsimavatit. Guutili qaninnerulerumallugu iliuutsit taakku ingerlatiin­nartariaqarpatit. – Kol 2:6.

13. Suut pingasut iluaqutigalugit Jehovamut ikinngutaanerput nakussatsis­sinnaavarput?

¹³ Qanoq ililluta Jehovamut ikinngutaanerput nakussatsis­sinnaavarput? (1) Biibilimik atuartarnerput misissueq­qissaar­tarnerpullu ingerlatiin­nartariaqarpagut. Anguniagariin­nanngilarput Guuti pillugu paasissutissanik tunngaviusunik ilinniarnissaq. Paasiniar­tarparpulli Guuti qanoq eqqarsar­tariaaseqarnersoq qanorlu iliuuseqar­nissatsinnik kissaateqarnersoq. (Ef 5:15-17) (2) Jehovap uagutsinnut asannin­neranik takussutis­sarpassuit eqqarsaatigeq­qissaar­nerisigut uppernerput nukittorsar­tariaqarparput. (3) Iliuutsit Jehovap uumigisai uumigiuar­tariaqarpagut ajortumillu iliortartut ikinngutiginagit. – Tuss 1:1; 101:3.

14. Ullut tamaasa Jehovap iluarisaanik qanoq iliortarsin­naavugut? (Korintimiunut 1. 10:31) (Aamma assit takukkit).

¹⁴ Korintimiunut 1. 10:31 atuaruk. Jehovap iluarisaanik iliuuseqar­tarnissarput pingaar­tipparput. Oqaluus­siinnarnata ataatsimiin­nernullu peqataagiin­narnata iliuuseqar­nerusariaqarpugut. Ulluinnarni inuuniar­nitsinni Jehovap iluarisaanik iliuuseqarusut­tarpugut. Assersuutigalugu sutigut tamatigut unneqqarin­niartar­nitsigut tunisiumatuunitsigullu Jehova nuannaar­tittarparput. (Kor 2. 8:21; 9:7) Jehovap aamma kissaatigaa inuuneq tunniussani qujamasuutigalugu paarissagipput. Taamaattumik suut nerisarinerlutigit imigarinerlutigillu mianersuut­tarpagut allatigullu iliuuseqar­tarluta peqqissuunis­satsinnut iluaqutaasin­naasunik. Jehova annikitsun­nguatigul­luunniit nuannaar­tikkusullugu iliuuseqar­tarutta tamanna Jehovamut qaninnerulis­sutigis­savarput. – Luk 16:10.

15. Inoqatitsinnut qanoq pissusilersor­nissarput Jehovap kissaatigaa?

¹⁵ Jehovap asannilluni naapertuil­luartut naapertuil­luanngitsullu ajunngitsumik pisarpai. (Mat 5:45) Tassuunakkut ilaassagitsinni kissaatigaa. Assersuutigalugu ‘kinaluunniit pillugu oqaatis­suaassan­ngilagut oqallik­kumatuujunatalu kikkunnullu tamanut saamasuunissarput’ pingaar­tittariaqarlugu. (Tit 3:2) Taamaattumik inoqatigut uppeqatigin­ngikkaluarlugit taakkunannga pitsaanerusorineq ajorpugut. (Tim 2. 2: 23-25) Kikkunnut tamanut ajunngitsulior­tarnerput Jehovamut qaninnerulis­sutigiler­tarparput.

NAAK KUKKUSARALUARLUTA JEHOVAMUT QANINNERULERSIN­NAAVUGUT

16. Tussiaat 73-imik allattoq qanoq misigisimalerpa?

¹⁶ Taavami ilaanni kukkusimanerit pillugu Jehovamit asaneqarun­naarsimasutut misigiguit? Taava Tussiaat 73-imik allattoq ilinniarfigisinnaavat. Ima allappoq: ‘Naakkiuteq­qajaasimavunga, isikkakka quaaqqajaasimapput.’ (Tuss 73:2) Anersaakkut sanngiil­lisimavoq, nassuerporlu ‘narrutsas­simalluni’ ‘paasisimasaqan­ngitsutut illuni, ussittut sianiitsigaluni’. (Tuss 73:21, 22) Isummerpali Jehovamit asaneqarun­naarluni allaallu isumakkeerfigineqarsin­naanani?

17. (a) Tussiaasiortoq nikallungangaaraluarluni qanoq iliorpa? (b) Misigisaanit qanoq ilinniarfigisin­naavarput? (Aamma assit takukkit).

¹⁷ Tussiaasiortoq Jehovamit qimagaasutut misigisimaguni taamatut misiginera sivisusimanavianngilaq. Nuanniil­liungaaraluaqaluni nalunngilaa Jehova qanillisariaqarlugu. Ima allappoq: “Maannali ilinniit­tuaannarpunga, talerpiga tigummivat. Ilitsersuutikkut ingerlatis­savarma, naalannas­susermukaatis­savarma.” (Tuss 73:23, 24) Uaguttaaq uppernikkut sanngiitsutut misigigaangatta kukkussutigul­luunniit nikallus­sutigigaangatsigit Jehovamut nakussatseq­qulluta ikioqqusassaagut, taannami ‘qaarsorigatsigu’. (Tuss 73:26; 94:18) Allaat kukkorujus­suassagutta Jehovamut utersin­naassaagut ‘isumakkeerfigin­nikkumasarnera’ tatigalugu. (Tuss 86:5) Pingaartumik nikallungarujus­suarnitsinni Guutitsinnut qanilliar­tortuar­tariaqarpugut. – Tuss 103:13, 14.

QAQUGORSUARMUT JEHOVAMUT QANILLIAR­TORTUARSIN­NAAVUGUT

18. Sooq naassaan­ngitsumik Jehovamut qanilliar­tortuarsin­naavugut?

¹⁸ Jehovamut qanilliar­tornissarput killeqanngilaq. Qaqugorsuarmut ilisarisimal­luarnerulersin­naavarput. Biibilimi allassimavoq Jehovap iliuusii, ilisimassusia paasisimasaqas­susialu tamakkiisumik paasineqarsin­naanngitsut. (Rom 11:33) Aap, naassaan­ngitsumik Jehova pillugu ilikkagaqar­tuarsin­naavugut.

19. Siunissaq pillugu Tussiaatini qanoq neriulluar­nartumik paasitin­neqarpugut?

¹⁹ Tussiaat 79:13-imi ima allassimavoq: “Uagut tassaavugut innuttatit savaatillu paarisatit, qutsavigis­savatsigit naassaan­ngitsumik, unnersiutigalutillu kinguaariik­kuutaani.” Jehovamut qanilliar­tortuaruit qularis­sanngilat naassaan­ngitsumik pilluaq­quneqarumaarlutit. Ima oqarsin­naassaatit: “Guuti tassaajuarumaarpoq uummatima qaarsorisaa, pissarititaasorlu uannut.” – Tuss 73:26.