Tunisineq pillugu Biibilimi qanoq allassimasoqarpa?

Akissut Biibilimeersoq

Biibili naapertorlugu tunisisoq nammineq kajumis­sutsimik eqqortumillu pissutiginiagaqarluni tunissuteqar­tassaaq. Ersersin­neqarpoq taamatut pissuseqarluni tunisineq tigusisumuin­naanngitsoq, aammali tunisisumut, iluaqutaasartoq. (Ussatit 11:25; Lukkarsi 6:38) Jiisusi oqarpoq: “Tunisineq tigusinermit pilluar­narneruvoq.” – Apustilit Suliaat 20:35

• Qaqugukkut tunisineq Guutimut nuannaarutaasarpa?

• Qaqugukkut tunisineq Guutimut nuannaarutaaneq ajorpa?

• Tunisineq pillugu Biibilimi allassimaffiit

Qaqugukkut tunisineq Guutimut nuannaarutaasarpa?

Kajumis­sutsimik tunisigaanni Guutimut nuannaarutaasarpoq. Biibilimi allassimasutut “kinaluunniit nangaanani pinngitsaalineqar­naniluunniit kisianni uummammigut aalajangersimanermisut iliussaaq, Guutimmi nuannaarluni tunisisoq asammagu”. – Korintimiunut 2. 9:7, quppernerup ataani ilanngussaq.

Uummammit pisumik tunisineq ‘guutisioriaasiuvoq’ Guutip iluarisaa. (Jaaku 1:27) Ikiortarialinnik tukkorluni ikiuisoq Guutip iluaraa, taassumalu tukkortuunera Guutip imminut taarsigas­sarsisitsisutut isigaa. (Ussatit 19:17) Biibilimi allassimaneratut tunisisoq Guutip nammineq akilerumaarpaa. – Lukkarsi 14:12-14.

Qaqugukkut tunisineq Guutimut nuannaarutaaneq ajorpa?

Siunertapiloqarluni tunisisoqaraangat. Assersuutigalugu:

• Inunnit ataqqineqarnissaq siunertaralugu tunisisoqaraangat. – Matiusi 6:2.

• Akineqarluni tunineqarnissaq siunertarineqaraangat. – Lukkarsi 14:12-14.

• Annatsitaajumalluni tunisisoqaraangat. – Tussiaat 49:7, 8.

Guutip assuarisaanut tunisisoqaraangat. Assersuutigalugu aningaasanoorutissanut, aanngajaar­niutissanut imaluunniit imigassarsiniutissanut aningaasanik tunisineq eqqunngitsulior­nerussaaq. (Korintimiunut 1. 6:9, 10; Korintimiunut 2. 7:1) Taamatuttaaq imminut pilersorsin­naagaluarluni suliuman­ngitsumut aningaasanik tunissuteqarneq tulluar­tuunngilaq. – Tessaluunikamiunut 2. 3:10.

Akisussaaffik Guutimeersoq sumigin­narneqaraangat. Biibili naapertorlugu ilaqutariinni ittuusoq inoqutimi pisariaqar­titaannik isumagin­nittussatut akisussaaf­filigaavoq. (Timuutiusimut 1. 5:8) Kukkunerussaaq ilaqutariinni ittuusoq, ilaquttami pisariaqartitaat tunulliullugit, allanut tunisiumatuval­laartarpat. Taamatuttaaq angajoq­qaaminnik utoqqalisunik isumagin­nikkumanatik pigisatik tamaasa Guutimut tunissutaasus­saanerarmatigit Jiisusip assuarai. – Makkorsi 7:9-13.