Jehovap Juuserfi puiunngisaannarpaa

Juuserfi parnaarus­sivimmiitillugu Faaruu, Egyptenimi kunngi, kimilluunniit nassuiar­neqarsin­naanngitsumik sinnattorpoq. Faaruup kiffaasa ilaat oqarpoq Juuserfip sinnattui nassuiarsinnaagai. Faaruullu ingerlaannaq Juuserfi aatippaa.

Faaruup aperaa: ‘Sinnattukka nassuiarsin­naavigit?’ Juuserfip Faaruu oqarfigaa: ‘Ukiuni arfineq-marlunni Egypteni nerisassanik ulikkaarumaarpoq, kingornalu ukiuni arfineq-marlunni kaannersuaqarumaarluni. Innuttatit kaanngin­niassammata nerisassanik peqqumaatissanik isumagin­nilluar­tussamik toqqaassaatit.’ Faaruup akivaa: ‘Illiussaaq! Illit Egyptenimi uannut tulliullutit pissaaneqar­nerpaan­ngussaatit!’ Juuserfip qanoq ililluni Faaruup sinnattui nassuiarsinnaavai? Jehovap ikiormagu.

Ukiuni arfineq-marlunni tulliuttuni Juuserfi nerisassanik katersivoq. Taava nunarsuaq tamakkerlugu kaannersuaqalerpoq Juuserfi oqarsimaneratorluinnaq. Inuit sumi tamalaaneersut aggerlutik Juuserfimut nerisas­sarsiniartarput. Ataataata Jaakup Egyptenimi nerisas­saqartoq tusaramiuk ernini ilaat qulit taakunga pisiniartippai.

Jaakup erneri Juuserfimut apuummata Juuserfip qatanngutini ingerlaannaq ilisarai. Qatanngutaasali Juuserfi ilisarin­ngilaat. Inuusun­nerugal­laramilu sinnattorsimaneratorluinnaq seeqqum­merfigaat. Juuserfip paaserusuppaa qatanngutimi suli kamaanneraanni. Taamaattumik oqarfigai: ‘Isertortumik paasiniaasar­tuuvusi! Nunarpununa sukkut saassuf­figiuminar­nerussanersoq misissor­niarissi!’ Akipput: ‘Naamik! Qatanngutigiiuvugut aqqaneq-marluk Kaanaanimeersut. Kisianni qatannguterput ataaseq toqunikuuvoq, aamma nukarlersarput ataatatsin­niippoq.’ Taava Juuserfip oqarfigai: ‘Nukarlersarsi uannukaassiuk, taava upperis­savassi.’ Taava angerlarlutik ataatamin­nukarput.

Ilaqutariit nerisas­saataaruteq­qikkamik Jaakup ernini Egypteniliar­teqqippai. Tamatumuuna nukarlersartik Biinia ilagaat. Qatanngutini misilin­niarlugit Juuserfip imerfiutini sølviusoq Biiniap puuanut karrinik imalimmut ikivaa qatanngutinilu tillissimanerarlugit. Juuserfip kiffaasa imerfik Biiniap puuaniittoq nassaarimmassuk qatanngutai tupattorujus­suupput. Juuserfimut kimigiiserput Biinia pillarnagu nammineq pillarneqaq­qullutik.

Maanna Juuserfip paasivaa qatanngutini allanngorsimasut. Misigis­sutsini nunusin­naajunnaaramigit qissaserpoq oqarluni: ‘Uanga Juuserfiuvunga, qatanngutersi. Ataataga suli uumava?’ Qatanngutai tupigusut­torujus­suupput. Oqarfigai: ‘Uannut iliuuserisimasarsi aliasuutigis­sanngilarsi. Guutimuna maanga aallartikkaanga annaanneqar­niassagassi. Qaa, ataataga aapallan­niarsiuk.’

Angerlarput ataatartillu nuannersumik tusarlerlugu. Taava Egypteniliaappaat. Ukiorparpassuit qaangiutereersut kiisami Juuserfi ataatanilu najuleqqipput.