Guuti qassinik ateqarpa?

Akissut Biibilimeersoq

Guuti ataasiinnarmik ateqarpoq. Hebræerisut ima allanneqartartoq יהוה kalaallisut “Jehova”-mik allanneqartarpoq.a Guuti pruffiitini Esaja aqqutigalugu ima oqarpoq: “Uanga tassa Jahve, tassa atera!” (Esaja 42:8) Guutip aqqa Biibilimik allagatoqqani 7.000-t missiliorlugit eqqaaneqarpoq – Guutimut taaguutinut allanut imaluunniit inuup allap atianut sanilliullugu eqqaaneqarnerpaavoq.b

Jehova allanik ateqarpa?

Biibilimi Guuti ataasiinnarmik ateqartinneqaraluartoq assigiinngitsorpassuarnik taaguuteqartinneqarlunilu allaatigineqarpoq. Allattorsimaffimmi ataaniittumi taaguutit allaatiginninnerillu ilaat tamarmik Jehovap kinaassusiata pissusiisalu ilaannik ersersitsisarput.

Taaguut	Innersuussut	Isumaa
Ajoqersuisoq	Esaja 30:20, 21	Iluaqutaasumik ilinniartitsisarlunilu siulersuisartoq. – Esaja 48:17, 18.
Ajugaqanngitsoq	1 Mosesi 17:1	Killeqanngitsumik pissaaneqarpoq. Hebræerisut taaguut ’El Sjaddajʹ, “Guuti Ajugaqanngitsoq”, Biibilimi arfineq-marloriarluni allassimavoq.
Alfa aamma Omega	Saqqummersitat 1:8; 21:6; 22:13	“Siulliullunilu kingulliusoq”, imaluunniit “aallaqqaataallunilu naggataasoq”, isumaqarpoq Jehova sioqqullugu kingornagullu allamik Guuteqanngitsoq Ajugaqanngitsumik. (Esaja 43:10) Grækerit naqinnerini alfa siullersaavoq omegalu kingullersaalluni.
Allah	(Soqanngilaq)	Oqaaseq “Allah” Arabiamiutuumit naggueqartoq atiunani taaguutaavoq “Guuti”-mik isumaqartoq. Arabiamiutut oqaatsinilu allani Biibilimik nutsikkani “Guuti” “Allah”-tut allanneqartarpoq.
Annaassisartoq	Esaja 45:21	Ulorianartumit suujunnaarsitsinermilluunniit annaassisoq.
Ataataq	Matthæusi 6:9	Inuunermik tunisisoq.
Guuti	1 Mosesi 1:1	Pallorfigineqartoq; pissarsuaq. Hebræerisut oqaaseq ’Ælohīmʹ qasseersiutaavoq, taamaalilluni Jehovap naalannangaarnera, qutsinnerungaarnera ataqqinangaarneralu ersersinneqarput.
Guuti pilluartoq	1 Timotheusi 1:11	Nuannaarnermik pilluarnermillu ilisarnaatilik. – Tussiaat 104:31.
Guutit tamarmik Guutigisaat	5 Mosesi 10:17	‘Guutipiluit’ inuit ilaannit pallorfigineqartut assiginagit Guuti qutsinnerussaartoq. – Esaja 2:8.
Illernartuusoq	Ussatit 9:10	Kikkunnit tamanit illernarnerpaaq (ileqqorissaarnermut tunngatillugu minguinnerpaaq).
Ilungersortoq	2 Mosesi 34:14	Allat pallorfigineqarnissaat akuerinngilaa. Tamannattaaq ‘Guutimik sangiattumik’ aamma ‘uangaanngitsumik guuteqaqqusinngitsumik’ nutserneqarsimavoq. – New World Translation 1984-imi naqitigaq; Testamentitoqaq 1990-imi naqitigaq.
Ittuinnartoq	Danieli 7:9, 13, 22	Aallartiffeqanngilaq; kinaluunniit sunaluunniillu piulinngikkallarmat naassaanngilluinnartumik piuvoq. – Tussiaat 90:2.
Katersaarsuit Naalagaat	Esaja 1:9; Romamiut 9:29	Inngilerpassuit naalagaat imaluunniit “Katersaarsuit Jehovaat”. – Romamiut 9:29, New World Translation.
Marriortoq	Esaja 64:7	Marriortup marriaminut oqartussaassuseqartarneratut inunnut ataasiakkaanut inuiaqatigiinnullu oqartussaassuseqarpoq. – Romamiut 9:20, 21.
Naalagaq	Tussiaat 135:5	Piginnittoq imaluunniit naalagaq; hebræerisut ’Adhōnʹ aamma ’Adhonīmʹ.
Naassaanngilluinnartumik kunngiusoq	1 Timotheusi 1:17	Naalakkersuinera aallartiffeqaranilu naaffeqanngilaq.
Pinngortitsisoq	Esaja 40:28	Sunik tamanik pinngortitsisoq. – Tussiaat 149:2; Saqqummersitat 4:11.
Paarsisoq	Tussiaat 23:1	Pallorfiginnitsiminik isumassuisoq.
Qinnutinik tusartartoq	Tussiaat 65:3	Uppernikkut imminut qinnutigineqartunik tamanik tusartartoq.
Qutsinnerussaartoq	Tussiaat 47:3; Danieli 7:18, 27	Kikkunnit tamanit qutsinnerusumik inissisimaffilik.
Qaarsoq	Tussiaat 18:3, 47	Qimarnguik isumannaatsoq annatitsisorlu.
Tassaavunga uangaasoq	2 Mosesi 3:14	Siunertani naammassiniarlugu sunngorsinnaasorluunniit. Oqaatsit taakku aamma ima nutserneqarput: “Iluarisara naapertorlugu qanorluunniit ilissaanga,” aamma “sunngorusunnera naapertorlugu taamaalissaanga”. (The Emphasised Bible, J. B. Rotherhamip nutsigaa; New World Translation) Taamatut allaatigineqarnera Guutip atiata allassimaffiup tulliani eqqaaneqartup isumaata paasinissaanut iluaqutaavoq. – 2 Mosesi 3:15.
Utertitsisoq	Esaja 41:14	Jiisusip Kristusip utertitsissutitut pilliutaa aqqutigalugu inuiannik ajortimit toqumillu akiliilluni utertitsisoq. – Johannesi 3:16.

Sumiiffiit Allakkani Hebræerisuuni eqqaaneqartut

Sumiiffiit ilaat Biibilip allassimaqqaarfiini Guutip aqqanik ilaqartinneqartarput, taakkuli Guutip aterinngilai. Sumiiffinnut taaguutini Jehova allaatigineqaannartarpoq. – 1 Mosesi 22:13, 14; 2 Mosesi 17:13-16; Eqqartuussisut 6:23, 24; Ezekieli 48:35.

Guutip atiata ilisimanissaanut atornissaanullu pissutaasut

Guutip atini, Jehova, tuusintilippassuariarlugu Biibilimut allanneqartikkamiuk pingaartissimassavaa. – Malaki 1:11.
Guutip ernerata, Jiisusip, arlaleriarluni Guutip atiata pingaaruteqassusia erseqqissarpaa. Assersuutigalugu Jehovamut ima qinuvoq: “Aqqit illernartitaali.” – Matthæusi 6:9; Johannesi 17:6.
Guutip aqqanik ilisimannilerneq atuilernerlu Jehovamut ikinngutaalerumalluni iliuusiuvoq siulleq. (Tussiaat 9:11; Malaki 3:16) Taamatut attaveqaramik Guutip neriorsuutaa una iluaqutigisinnaavaat: “Attavigimmanga annaatissavara, sernigissavara atera ilisimammagu.” – Tussiaat 91:14.
Biibilimi ima allassimavoq: “[Qilammi] nunamilu guutinik taaneqartunik peqaraluarpoq – guuterpassuaqaraluarpormi naalagarpassuaqarlunilu.” (1 Korinthimiut 8:5, 6) Taamaattoq Biibilimi ersarissumik ersersinneqarpoq Guuti ilumoortutuaq Jehovamik ateqartoq. – Tussiaat 83:19, Niels Wolfip nutsigaa 1824-meersoq.

a Allakkanik Hebræerisuunik misissueqqissaartartut ilaasa Guutip atia “Jahve”-mik allakkumanerusarpaat.

b Guutip atianut tunngatillugu oqaaseq “Halleluja”, imaluunniit ‘aliiluujaa’, Biibilimi arlaleriarluni eqqaaneqartoq Biibili-p 2000-mi naqitikkap nassuiaataani ima isumaqartinneqarpoq: “Jah(ve) unnersiutigiuk.” – Saqqummersitat 19:1, Biibili; tastamantitâĸ.