Qanittukkut arlaannik qiimmassaavit?
ELENA 17-iinnarnik ukioqartoq nakorsat paasivaat mannissaqarfimmigut kræfteqartoq. Anaanaa, Mari, Elenap naalliuuteqangaarnerani isiginnittuusariaqarsimavoq.
Sivitsunngitsoq Elena napparsimmavimmut Spaniami Madridimiittumut, Kanariap Qeqertaani angerlarsimaffimminit 1900 kilometerisut ungasitsigisumiittumut, unitsinneqarpoq. Madridimi nakorsat aalersornagu pilattarnissaanut piumassuseqarput. (apustilit suliait 15:28, 29) Kisianni pilattaaneq aallartilaaginnartoq malunnarsivoq Elena peruluttorujussuusoq. Kræfti timaata ilaanut siaruaatereersimavoq, nakorsallu qanoq ilioriusissaqanngillat. Elena Madridimut tikinnerminit ullut arfineq-pingasut qaangiummata toquvoq.
Mari taamatut misilinneqarnermini artornaqisumi kisimiinngilaq. Utoqqaanertat kristumiut marluk erneralu angajulleq, angalanertik namminneq akilerlugu, Madridimukarput Elenallu alianaraluartumik toqunissaata tungaanut najuullutik. „Imaqanngitsutut misiginerma avaanngunaqisup anigornissaanut taakkua ikiorpaannga,“ Mari oqaluttuarpoq. „Uannik qiimmassaaneri puiunngisaannassavakka. Anersaakkut annertoqqusersuinerat allatigullu ikiuinerat qujamasunnaqaaq. Ilumut tassaasimapput ’anorersuarmut oqqiffiit.’“ — Jesaja 32:1, 2.
Jehovap nuannarisarpaa taakkutut savanik paarsisut asannittut savaatiminik isumassuigaangata. (Ussatit 19:17; 1 Pîtruse 5:2-4) Allanilli qiimmassaaneq utoqqaanertaannaanngitsut immikkut pisinnaatitaaffigaat. Kristumiut tamarmik ataatsimoortarput anersaakkut unnersuunneqarumallutik ’qiimmassaqatigiinniarlutillu’. (Eprîarit 10:24, 25) Qiimmassaqatigiinneq kristumiut ataatsimoortarnerannut ilaavoq pingaartoq.
Qiimmassaaneq sumik ilaqarpa?
Soorlu naasunnguaq kusanartoq qilalersoq nakassinnaasoq, taamattaaq ilaqutariit ilagiillu iluanni ataasiakkaat qiimmassarneqarneq ajorunik nikallorsinnaapput. Piffissarli eqqorlugu qiimmassaaneq ussernartorsiortunut nakussatsissutaasinnaavoq, nikallortunut qiimmaallaataasinnaalluni aammalu aalajaallutik Guutimut kiffartortunut pissatsissutaasinnaalluni.
Griikerit oqaasiata ’qiimmassaanermik’ nutserneqartup imarai eqqarsaatit tuppallersaanermut, kajumissaarinermut annertoqqusersuinermullu tunngasut. Taamaattumik qiimmassaaneq tassaannaanngilaq ajunngitsumik iliorsimasumik nersualaarineq. Aamma arlaatigut ikiuinermut anersaakkullu annertoqqusersuinermut tunngavoq.
Griikerit oqaasiat ’qiimmassaanermik’ nutserneqarsimasoq isumaqavippoq „inoqatimi ilaat imminut pisippaa“. Anersaakkut qatanngutitsinnik qanimut suleqateqartaratta arlarput nikalloraangat orloqqajaaleraangalluunniit ingerlaannaq ikiuinissatsinnut periarfissaqartarpugut. (Nalunaajaasup oqaasii 4:9, 10) Soqutiginarpoq oqaatigineqarmat Jehovap innuttai ’kiffartortut isumaqatigiillutik’. (Sefanja 3:9) Aamma apustili Paulusip kristumioqatini aalajangersimasoq taasimavaa ’ikiortiga ilumoortoq’ (nutsiinnavillugu: „nammaqat“). (Filípimiut 4:3) Nammaqatigiilluta kiffartoqatigiikkaangatta nammagarput oqinnerulersutut ilisarpoq, ingammik anersaakkut nukittuallaanngitsunut. — Naleqqiuguk Matîuse 11:29.
Qiimmassaataasimasut
Qiimmassaaneq pingaaruteqartorujussuummat allanut qiimmassaataasimasunik Biibilimi assersuutissat sammeriartigik. Guutip pruffiitiata Mosesip toqunissi qanillimmagu, Jehovap Josua Israelikkunnut siulersuisussatut toqqarpaa. Suliassaq tamanna oqitsuunngilaq, Mosesillumi tamanna misigereersimavaa. (4 Moses 11:14, 15) Taamaattumik Jehova Mosesimut ima oqarpoq: „Josva siulersuisunngortiguk sapiissuseqalersillugu pissatsillugulu.“ — 5 Moses 3:28.
Israelikkut eqqartuussisunit siulersorneqarnerata nalaani Jeftap neriorsuutaa eqqortillugu pania ilaqutaqalernissamut periarfissani tunullugu nammineq kajumissutsiminik Guutip illernartuutaani kiffartulersimavoq. Taamatut pilliuteqarneq maluginngitsoorneqarsimava? Naamik, tassami erĸartũssissunik agdlagkat 11:40-mi oqaatigineqarpoq: ’Ukiut nungullugit Jeftap Gileadikkuusup pania Israelikkut paniisa unnersiutigiartortaraat ullut sisamat ukiukkut.’ Taamatut pulaarneqartarneq Jeftap panianut imminut pilliutigisimasumut qiimmassaataasimasorujussuussaaq.
Qiimmassaaniaraanni ilaannikkut sapiissuseqartariaqartarpoq. Apustili Paulus Asiaaqqami ajoqersuiartortitatut angalanermini siullermi illoqarfinni arlalinni sakkortuumik akerlilersorneqartarsimavoq. Antiochiamit anisitaasimavoq, Ikoniumimi toqutaanissaraluaminit annaqqarsimavoq Lystramilu ujaqqanik milloorneqarluni toqusimasorineqarluni qimaannarneqarsimavoq. Taamaakkaluartoq kingunitsiannguagut Paulus ingerlaqatinilu illoqarfinnut taakkununnga uteqqipput, ’ajoqersukkat tarnaat nakussatsittarlugit oqaaqqissaartarlugillu upperneq aalajangiuteqqullugu, nalunaarfigalugillu naalliunnartorpassuit atorlugit Guutip naalagaaffianut isissasugut’. (apustilit suliait 14:21, 22) Paulusip ajoqersukkat nutaat illoqarfinni taakkunaniittut qiimmassarniarlugit inuunini allaat navianartorsiortissimavaa.
Ajoqersukkalli nutaaginnaanngitsut qiimmassarneqarnissamik atorfissaqartitsipput. Ukiualuit qaangiuttut Paulus Romamut ilungersunaqisumik angalaqataavoq, tamaani eqqartuussisunut sassartinneqassalluni. Immaqa ornitaminut apuutilernermini sapiissuseqanngitsutut misigisimavoq. Romalli kujataata kangianiittumut, Romamit kilometerisut 74-isut ungasitsigisumiittumut, pigami qiimmaallaatissinneqarpoq. Qanoq? Qatanngutit Romameersut Appiusip Aqqutaanut Tritapernamullu naapigiarmanni. ’Taakku Paulusip takugamigit Guuti qutsavigaa tuppallerlunilu.’ (apustilit suliait 28:15) Taamatuttaaq najuinerinnarput uppeqatitsinnut qiimmassaataasinnaasorujussuuvoq.
Qiimmassaanissamut periarfissat atorluakkit
Qiimmassaanissamut periarfissarpassuaqarpoq. Teokratiimik atuarfimmi qatanngutip angutip arnalluunniit saqqummiussaanit qamuuna attorneqarnikuuit? Ilagiinni anersaakkut nukittuunik inuusuttuaraqarnera nuannaarutigaajuk? Utoqqanngortut qasujuissusiat tupigusuutigisarpiuk? Pioneerit ilaata illumiit illumut oqaluussinermi Biibilimik atuillaqqissusia tupigusuutigisimaviuk? Nersualaarinikkut qiimmassaanissamut periarfissatut tamakku isigisakkit.
Ilaqutariinni qiimmassaasarneq ilagiit iluanni qiimmassaasarnertulli pingaartigaaq. Angajoqqaat meeqqaminnik ’Jehovamit paaqqutarinninneranni perorsaanerannilu’ qiimmassaaneq iluaqutaasinnaavoq. (Evfisumiut 6:4) Meeqqap nersulaarneqarnini, tamatuminngalu nassuiaanneqarnini, assorsuaq qiimmaallaatigisinnaavaa! Inuusuttuaraanermi, ussernartoqaqalunilu tatineqarfioqisumi, qiimmassarneqartuarneq pinngitsoorneqarsinnaanngilaq.
Alliartortilluni qiimmassarneqartannginneq ajoqutaasinnaasorujussuuvoq. Michael, kristumiu utoqqaanertaq, ullumikkut ammasunngorsimasoq ima oqarpoq: „Ataatama nersualaanngisaannarsimavaanga. Taamaattumik alliartorpunga imminut ataqqissuseqarnanga. . . . Ullumikkut 50-inik ukioqaraluarlunga suli nuannaarutigisarpara utoqqaanertatut suliannik ajunngitsumik naammassinninnik ikinngutinnit uppernarsaavigineqartuartarnera. . . . Nammineq misigisimasama ilinniartissimavaanga allanut qiimmassaasarnissaq qanoq pingaartigisoq, tamannalu ilungersuutigisarpara.“
Kikkut qiimmassarneqarnissartik pisariaqartippaat?
Kristumiuni utoqqaanertat suleruloortartut qiimmassarneqarnissartik pisariaqartippaat. Paulus ima allassimavoq: ’Inanniarpassi, qatanngutivut ukorsii, ilisariniaqqullusigik ilissinni suliaqartut, Naalakkami ilissinnik misissuisut ilissinnillu eqqaasitsisartut, suliaallu pillugu ataqqingaarlugit asaqqullusigik.’ (1 Tásalûníkamiut 5:12, 13) Utoqqaanertat suleruloortarnerat taamaattussaannartut isiginaqqajaasinnaavoq, ilumoorlunili pingaartitsinermik ersersitsivigisaraanni qiimmannartunillu oqarfigisaraanni nammataat oqinnerulersinneqarsinnaapput.
Ilatta pissutsini ajornakusoortuni inuusariaqartut aamma qiimmassarneqarnissartik pisariaqartippaat. ’Nikallortut tuppallersarsigik, sanngiitsut illersorsigik,’ Biibilimi taamatut unnersuussuteqarpoq. (1 Tásalûníkamiut 5:14) Angajoqqaat kisimiittut, inuusuttuaqqat, utoqqaat sanngiitsullu ilaannikkooriarlutik isumatsassinnaasarput anersaakkullu sanngiilliorsinnaasarlutik.
María, arnaq kristumiu, uviminit qimanneqariataarsimasoq ima oqaluttuarpoq: „Jobitut ilaannikkut toqorusuttarpunga. (Job 14:13) Qujanartumilli qiimmassarneqartarnikka iluaqutigalugit nakkaannanngilanga. Utoqqaanertat marluk nalunngilluakkama nalunaaquttap-akunnerpassuini ikiortarpaannga paasitillunga piffissaq tamaat kiffartornerup ingerlatiinnarnissaata qanoq naleqartigissusianik. Aamma qatanngutit arnat marluk paasinnittut tuppallersartarpaannga, uummammiunnillu aniatitsininni naammagittarlutik tusarnaartarlunga. Biibili atorlugu paasitippaannga pissutsit Jehovap isiginnittaasiatut isiginiarnissaannik. Naluara qasseriarluta Tussiaat 55:23 atuarnerlugu, nalunngilarali allassimaffiup tamatuma atorneratigut anersaakkut misigissutsikkullu peqqissuseqaleqqillunga. Tamakku tamarmik ukiut aqqaneq-marluk matuma siorna pipput, nuannaarutigaaralu eqqaasinnaagakku ulloq manna tikillugu piffissaq tamaat kiffartortuuneq ingerlatiinnarsimagakku. Naak ilaannikkut misigissutsikkut nanertisimasaraluarlunga pissarsiaqarnartumik pilluarnartumillu inuuvunga. Qularutiginngilluinnarpara piffissami taama ittumi qiimmassarneqartarneq inuup inuunerani pingaaruteqartorujussuusoq.“
Ilaat kukkuluttorsimanertik tamannalu aaqqinniarlugu ilungersuuteqarnertik pissutigalugu qiimmassarneqarnissaminnik pisariaqartitsisarput. Immaqa asannittumik naveerneqarsimapput. (Ussatit 27:6) Utoqqaanertat naveersisimasut takusinnaagunikku Biibili tunngavigalugu unnersuussinertik maleruarneqartoq, nersualaarinninnissartik eqqumaffigisariaqarpaat. Qiimmassaanerat tamanna marlunnik ajunngitsunik siunertaqassaaq — kukkuluttorsimasumut asanninnertik uppernarsassavaat ’aliasuppallaarnermik ajuleqqunagu’ aammalu unnersuussutit maleruarnissaata iluaqutaassusianik eqqaasissavaat. — 2 Korintumiut 2:7, 8.
Utoqqaanertaq ataaseq kukkuluttorujussuarsimavoq ilagiinnilu nakkutilliisutut immikkut pisinnaatitaaffini annaallugu. „Utoqqaanertaajunnaarnera nalunaarutigineqarmat eqqarsarpunga qatanngutit ilagissallunga nuannariunnaassagaat,“ oqarpoq. „Utoqqaanertaajunnaarninnulli pissutaasoq utoqqaanertat allanut isertuulluinnarpaat sapinngisaminnillu qiimmassarniartarlunga. Aamma ilagiinniittut allat asanninnermik ikinngutinninnermillu ersersitsipput, anersaakkut peqqissiartoqqinnissannut iluaqutaalluinnnartumik.“
Qiimmassaasuugit
Inuunitsinni ulapaarfioqisumi qiimmassaanissaq puiornaqqajaasinnaavoq. Ilali taamaaliortoqatuaraangat iluaallannartassusia! Sunniuteqarluartumik qiimmassaajumaguit marluk eqqaamasariaqarpatit. Siullermik, eqqarsaatigisaruk qanoq oqassanerlutit qiimmassaanerit naleqquttooqqullugu. Aappassaanik, inuup nersualaarneqartariaqartup imaluunniit ineriartornartunik oqaluffigineqarnissaminik pisariaqartitsisup taamaaliorfiginissaanut periarfissarsiortarit.
Taamaaliukulaarnerujartortillutit pilluarnerujartussaatit. Jesusimmi ima neriorsoqqissaarpaatigut: ’Tunisineq tigusinermit pilluarnarneruvoq.’ (apustilit suliait 20:35) Allanik qiimmassaasarnikkut imminut qiimmassassaatit. Ullut tamaasa allanik qiimmassaasalernissat anguniagariniaruk! (wE 15/1 95)