Silaannarmut tillueriartutut issanngilagut
1. 1 Korinthimiut 9:26-mi allassimasoq oqaluussinerlu qanoq attuumassuteqarpat?
1 Apustili Paulusi allappoq: “Uanga arpappunga maangaannaq pinnanga, tilluuttartutullu silaannarmut tillueriartutut inngilanga.” (1 Kor 9:26) Paulusip anersaakkut anguniagaqarnerminut qamannga pisumik ilungersornini uani pivaa. Aammali oqaatsit taakku oqaluussinermut tunngassuteqarsinnaapput. Kissaatigaarput ‘silaannarmut tillueriartutut innginnissarput’ ilungersornitsinni sapinngisamik angusaqarsinnaaniassagatta. Qanoq taamaaliorsinnaavugut?
2. Qaqugukkut sumilu oqalussissanerluta aalajangerniarnitsinni Paulusi ukiunilu hundredilinni siullerni oqaluussisartut allat qanoq ilaarsinnaavavut?
2 Inoqarfiusumi oqaluussigit: Paulusi ukiunilu hundredelinni siullerni oqaluussisartut allat inuit ornigarfigisartagaanni oqaluussisarput. (ApS 5:42; 16:13; 17:17) Taamaattumik angalaarfigisartakkatsinni amerlasuut unnukkut angerlarsimasarpata tamatuma missaani illumiit illumut angalaassalluni pitsaanerpaajusinnaasarpoq. Illoqarfimmi bussit unittarfiini ullaaralaakkut suliartortunik imaluunniit ualikkut kingusissukkut angerlaakaasunik inoqartarpa? Niuertarfiit eqqaanni qaqugukkut inoqarnerusarpa? Piffissani taakkunani aqqusinermi oqaluussineq angusaqarluarnarnerusinnaavoq.
3. Angalaarfigisartakkatsinni piffissaq qanoq atorluarsinnaavarput?
3 Oqaluussiffigisartakkami piffissaq atorluartaruk: Aamma oqaluussiffigisartakkatsinni ‘silaannarmut tillueriartutut innginnissarput’ pingaaruteqarpoq. Assersuutigalugu oqaluussisartorpassuit ataatsikkut oqaluussiffissamukarnatik aaqqiissuunnissaannullu suliaqartinnissaannullu piffissarujussuaq nukippassuillu atulussinnarnagit pitsaanerusinnaavoq oqaluussisartut eqimattakkuutaarlutik avinneqarpata. Aamma angalaarfigisartakkani inoqarpianngitsuni oqaluussigaangatta oqaluussisartut amerlavallanngippata angalaarfigisaq sukkanerusumik oqaluussiffigineqarsinnaavoq, amerlanerusunillu oqaloqateqarnissatsinnut periarfissaqarnerussaagut. Immaqa najugaqarfitsinnut ungasinngitsumik angalaarfigisartagaqarsinnaavugut. Taamaalilluta angalanermut piffissarujussuaq sipaarsinnaavarput.
4. ‘Inunnik aalisallaqqittunngornissatsinnut’ suna iluaqutigisinnaavarput?
4 Jiisusip nutaarsiassamik nuannersumik oqaluussisartut ‘inunnik aalisartunut’ assersuuppai. (Mark 1:17) Aalisartoq umiatsiamik angalaaginnarniarluni aallarneq ajorpoq, aalisakkanilli pisaqarniarniarluni aallartarpoq. Aalisartoq pikkorissoq aalisagaqassangatitaminukartarpoq aalisakkat tassaniinnerani ingerlaannarlu aalisalertarluni. Aap, ‘silaannarmut tillueriartutut inngillat’. Oqaluussinermi ilungersuussineq taamaattoq uaguttaaq ersersinniartigu! — Hebr 6:11.