Atuagaq Biibilimi ajoqersuutigineqartut atorlugu atuaqqissaarnissaminnut piareersimanngitsut ikiukkit
1. Atuagaq Biibilimi ajoqersuutigineqartut inuit tamarmik atuaqqissaarusussagunarpaat? Nassuiaruk.
1 Jehovamut pallorfiginninniaraanni Biibilimi ajoqersuutigineqartut paasineqartariaqarput. Amerlasuulli kristumiussutsimik upperisaqanngillat immaqalu Biibili Guutip oqaasiatut isiginagu. Allat Guutimik upperisaqanngilluinnarput Biibililu immikkuullarissutut isiginagu. Inuit naapitatta Biibilimi ajoqersuutigineqartut eqqartorusuppallaanngippassuk suut atorneqarsinnaappat? Allaaserisaq una oqaaluussisartut nunat 20-t missaaneersut misigisalikkersaarutaat tunngavigalugit siunnersuutinik imaqarpoq.
2. Guuteqarnera upperinagu oqartoqarpat suna paasiniassavarput, aamma sooq?
2 Guuteqarneranik upperinninngitsut. Guuteqarnera upperinagu oqartoqarpat, sooq taama isumaqarnersoq paasiniassallugu pingaaruteqarpoq. Pinngoriartuaarsimanermik upperisaqarnera pissutaava? Silarsuarmi naapertuilluanngissuseq upperisarsiornermiluunniit peqquserlunnerit Guutimik upperinnikkunnaarsimaneranut pissutaappat? Guutimik upperisaqarnissamik inerteqquteqarfiusumeersuua? Aamma imaassinnaavoq Guuteqarneranik eqqarsaat pimoorullugu ajattunngikkaa upperissalluguli pisariaqartinngiinnarsimallugu. Oqaluussisartorpassuit pulaagaq isumaanik nassuiaateqartittarpaat ima aperineratigut: “Guuteqarnera upperinngisaannarnikuuiuk?” Akornusernagu tusarnaarit. Sooq Guuteqarnera upperinngikkaa paasigutsigu taava qanoq akissanerlugu sunalu neqeroorutigissanerlugu paasissavarput. — Uss 18:13.
3. Pulaagarput upperisaalu ataqqigivut qanoq ersersissinnaavarput?
3 Akinitsigut pulaagaq misigitinnaveersaassavarput isumaa akerleralutigu. Siunnersuut USA-meersoq imaappoq: “Ataasiakkaat qanoq upperissaqassanerlutik namminneq aalajangersinnaanerat ataqqissallugu pingaarutilerujussuuvoq. Assortuunnermut ajugaaniarsariinnarnani inuit eqqarsalersinniarlugit isummertinniarlugillu apeqquteqartarneq pitsaanerpaasarpoq.” Nakkutilliisup angalasartup iluatsilluartumik pulaakkap oqaasiinut akissutini ima aallarnertarpaa: “Periarfissatut una eqqarsaatiginikuuiuk?”
4. Buddhistit qanoq ikiorsinnaavavut?
4 Buddhistit Guuteqarneranik eqqarsaat takorlooruminaatsippaat. Tuluit Nunaanni oqaluussisartut inunnik taama ittunik naapitaqaraangamik quppersakkami Lasting Peace and Happiness — How to Find Them-imi ilinniagassat 1, 3 aamma 4 eqqartussallugit misilittagaqarfigilluarpaat. (Kalaallisuunngortitaanngitsoq). Taava immaqa atuagaq Biibilimik ajoqersuutigineqartut saqqummiunneqarsinnaavoq imalu oqarluni: “Guuti upperinngikkaluarlugu Biibilimik atuaqqissaarneq iluaqutigisinnaavat, Biibilimimi pitsaasunik siunnersuuterpassuaqarpoq.” Pioneri USA-meersoq oqaluussiffigisartakkami Kiinamiutut oqaluffiusumi kiffartortoq ima oqarpoq: “Oqaluussiffigisartakkatsinni inuppassuit atuarneq nuannaraat, atuagassiarlu tunniussimasarput suliluunniit pulaaqqiinngitsugut atuareersimasarpaat. Soorli Biibilimik atuaqqissaartoqartassanersoq amerlanertigut paasisinnaaneq ajorpaat. Taamaattumik siullermeerlunga pulaarnermi Tusagassat nuannersut Guutimeersut! neqeroorutigisarpara, taannami oqaloqatigiissutissatut allanneqarsimammat.” Nakkutilliisoq USA-meersoq ilageeqatigiinni Kiinamiutut oqaasilinni kiffartortoq oqaluttuarpoq pulaarnermi siullermi atuagaq Biibilimi ajoqersuutigineqartut saqqummiunneqarsinnaasoq. Atuakkamili kapitali 1, Guuti pillugu allaaserisaq, aallarniutiginagu kapitali 2, Biibili pillugu allaaserisaq, atuaqqissaarnermi aallarniutigissallugu ajunnginnerussaaq.
5. Sooq erinitsajuinnissaq pingaaruteqarpa?
5 Guuti upperfigilissagaanni piffissaqarluartariaqarmat erinitsajuinnissarput pingaaruteqarpoq. Pulaarnermi siullermi pulaagaq Pinngortitsisoqarneranik qularunnaarsissinnaassagunanngilarput. Piffissalli ingerlanerani immaqa oqaloqatigisartagarput Guuteqarneranik akuersiartuaalissaaq. Imaassinnaavorluunniit sooq inuit ilaat taama isummersimanersut paasisinnaaleraa.
6. Sooq inuit ilaat Biibilimik soqutiginninngillat?
6 Biibilimik soqutiginninngitsut imaluunniit upperinninngitsut. Inuppassuit Guuteqarneranik upperinnikkaluarlutik Biibili ajoqersuutaalu soqutigineq ajorpaat Biibili Guutip oqaasiatut upperinnginnamikku. Immaqa naapitarput nunamit kristumiussusermik upperisaqarfiunngitsumeersuuvoq Biibililu kristumiuussutsimut attuumatittarlugu. Immaqaluunniit nunamit upperisarsiornermik pingartitsiffiunngitsumit kristumiuunerartuninngaanneersuuvoq Biibililu atorfissaqartinnagu. Taama ittoq qanoq Biibilimik soqutiginnilersissinnaavarput atuakkamillu Biibilimi ajoqersuutigineqartut-imik atuaqqissaarusulersinniarlugu?
7. Biibilimik soqutiginnilersitsiniarluta qanoq iliorsinnaavugut?
7 Grækenlandimi immikkoortortaqarfimmiittut ima allapput: “Inuit Biibilimik soqutiginninngitsut pitsaanerpaamik ikiorsinnaavavut Biibili qupperlugu qanoq imaqarnersoq taakkununnga takutillugu. Oqaluussisartorpassuit maluginiarsimavaat namminneq oqaatigisaminnit Biibilip oqariartuutaa inuup uummataanik sunniisinnaanerujussuusoq. (Hebr 4:12) Inuppassuit Guutip aqqa Biibilimi takugaangamikku Biibilimik misissuerusussuseqalertarsimapput.” Indiami immikkoortortaqarfimmiittut ima allapput: “Hindusiortorpassuit inuuneq toqulu pillugit sallusuissut aamma silarsuassaq inuiaqatigiinni atorfiit aallaavigalugit assigiinngisitsiffiunngitsoq pillugu Biibilip neriorsuutaa soqutigisarpaat.” Ajornartorsiutit najugarisami ernumassutigineqartut eqqartornerisigut Guutip naalagaaffiata pissutsinik aaqqiiumaarnera Biibilimi takutissinnaavarput.
8. Kristumiuunerartut pissutigalugit Biibilimik isiginerluisut qanoq oqarfigisinnaavavut?
8 Kristumiuuneraqatigiit pissutigalugit inuit ilaasa Biibili tusaamanerlulersimavaat. Taamaattoqartillugu paasitiguk kristumiuunerartut Biibili Biibilimilu ajoqersuutigineqartut ajoqersuutigisanngimmatigit. Indiami immikkoortortaqarfimmiittut ima allapput: “Oqaluussisartut ilaannikkooriarlutik inuit paasitittariaqartarpaat oqaluffiit kisiartaallutik Biibilimik nassuiaassussatuaanngitsut.” Quppersakkami Inuuneq sumik siunertaqarpa? Qanoq ililluni nanineqarsinnaava?-mi ilinniagassaq 4-mi allaaserineqarpoq qanoq oqaluffiit Guutip oqaasia kimeerutsinniarsaralugulu suujunnaarsinniarsarisimagaluaraat, paasissutissallu tamakku hindusiortut killitsissutigisarpaat. Pionerip Brasiliameersup inuit oqarfigisarpai: “Soormi Biibilip imaa misissornerunianngiliuk? Inuppassuit isummereersimanatik upperisarsioqatigiinnut arlaannaanulluunniit ilanngutinngikkaluarlutik taamaaliortarput. Immaqa ilikkakkatit tupaallaatigissavatit!”
9. Biibilimik ingerlaannaq soqutiginnilinngitsumik naapitsigutta sooq nikallussanngilagut?
9 Jehovap inuit uummataat isigisarpai. (1 Sam 16:7; Uss 21:2) Inuillu uummatigissut pallorfiginninnermut ilumoortumut kajungilersittarpai. (Joh 6:44) Taakkua ilarpassui Guuti pillugu ilinniarsimanngissaannarput Biibilimilluunniit ilisimasaqarpiaratik. Oqaluussigaangatta inuit taamaattut ‘annaanneqarnissaannut sallusuissummillu eqqorluartumik ilisimasaqalernissaannut’ periarfissittarpavut. (1 Tim 2:4, NW) Taamaattumik inuk Biibilip oqariartuutaanik ingerlaannaq soqutiginnilinngippat nikalloqinak! Soqutiginnilersitsiniarlutit Biibililersaarutit ilaannik atuigit. Immaqa piffissap ingerlanerani atuagaq atuaqqissaaqatigiissutigisartagarput pingaarnerpaaq Biibilimi sorpiaat ajoqersutigineqarpat? atorlugu eqqartueqatigiilersinnaassaasi.
[Qupp. 4-mi assiliartaq]
Pulaakkat Guutimik upperinninnginnerarpat ima oqarlutit misiliguk:
• Sooq taamatut isumaqarnersoq paasiniarlugu aperisinnaavutit: “Guuteqarnera upperinngisaannarnikuuiuk?”
• Buddhistiuppat quppersakkami Lasting Peace and Happiness — How to Find Them-imi qupp. 9-12 atorsinnaavat (kalaallisuunngortitaanngilaq)
• Pinngoriartuaarsimaneraaneq upperippagu uku atorsinnaavatit:
Vågn op!-imi allaaserisat “Står der en designer bag?”
Filmi Det fantastiske skaberværk vidner om Gud
Quppersakkat Nalerisimaarluni qanoq inuusoqalersinnaasoq, ilinniagassaq 4; Er livet en Skabers værk? aamma Fem gode spørgsmål om livets oprindelse
• Naapertuilluanngissuseq ajussuserlu pissutigalugit Guuti upperiunnaarsimappagu uku iluaqutigineqarsinnaapput:
Atuagaq Findes der en Skaber som interesserer sig for os?, kapitali 10.
Quppersakkat Guutip ilumut soqutigaatigut?, ilinniagassaq 6; aamma Inuuneq sumik siunertaqarpa? Qanoq ililluni nanineqarsinnaava?, ilinniagassaq 6.
• Guutip piunera pulaakkap upperilerniariarpagu atuagaq Biibilimi ajoqersuutigineqartut atuleruk. Kapitali 2 imaluunniit soqutigisaa aallarniutigissallugu ajunnginnerussaaq.
[Qupp. 5-mi assiliartaq]
Pulaakkavit Biibili upperinngippagu uku misilikkit:
• Atuagaq Livet — hvordan er det kommet her? Ved en udvikling eller en skabelse?, kapitali 17 aamma 18 eqqartorsigit.
• Hindunut quppersagaq Why Should We Worship God in Love and Truth? atoruk (kalaallisuunngortitaanngilaq).
• Juutimik oqaloqateqarnermi quppersagaq Vil der nogen sinde komme en verden uden krig?, qupp. 3-11 misissuataarneqarsinnaapput.
• Najoqqutassiat Biibilimeersut malinneratigut iluaqutissartai eqqartukkit. Biibilip inuunermi iluaqutaanera erseqqissaarniarlugu uku atorsinnaavatit:
Vågn op!-imi allaaserisat “Hjælp til familien”
Filmi Bibelen — en positiv kraft i dit liv
Quppersakkat Tusagassat nuannersut Guutimeersut!, ilinniagassaq 9 aamma 11; Inunnut tamanut atuagaq, qupp. 22-26; aamma Nalerisimaarluni qanoq inuusoqalersinnaasoq, ilinniagassaq 2.
Buddhistimik oqaloqateqarnermi quppersagaq The Pathway to Peace and Happiness, qupp. 3-7 eqqartorneqarsinnaapput (kalaallisuunngortitaanngilaq).
Muslimimik oqaloqateqarnermi Ægte tro — nøglen til et lykkeligt liv, immikkoortoq 3 eqqartorneqarsinnaavoq.
Oqaluussiffigisartakkami inuit Biibilimik akerliuppata siunnersuutitsialaat suminngaanniit pissarsiarisimanerlugit aatsaat arlaleriarlutit pulaaqqeereernermi oqaatigigukkit pitsaanerussaaq.
• Siulittuutit Biibilimeersut qanoq eqquussimanersut nassuiaruk. Uku atorsinnaavatit:
Filmi Bibelen — nøjagtig historie, pålidelig profeti
Quppersagaq Inunnut tamanut atuagaq, qupp. 27-29.
• Sammisat assigiinngitsut pillugit Biibilimi qanoq ajoqersuutigineqarnersut pulaakkavit apeqqutigisalerpagit atuagaq ‘Biibilimi ajoqersuutigineqartut’ atuleruk.
[Qupp. 6-mi assiliartaq]
Pulaagaq oqarpat: “Guuti upperinngilara,” ima oqarsinnaavutit:
• “Sooq uanga Pinngortitsisoqarnera upperilersimanerlugu naatsunnguamik nassuiaatilaarsinnaavakkit?” Taava ‘Ræsonnerebogen’, qupp. 345-347-mi sammisat eqqartukkit, imaluunniit atuagassiaq illit soqutiginartissimasat nassarlugu aggeqqikkumagit.
• “Guuteqaraluarpammi illit taanna qanoq ittuutikkusussagaluarpiuk?” Pulaakkat amerlanerit akissagunarput Guuti asanittuussasoq, naapertuilluartuussasoq, naakkittartuussasoq aamma kinaassusersiortuussanngitsoq. Guutip taamatorluinnaq pissuseqarnera Biibilimi allaaserineqartoq takutiguk. (Immaqa ‘Biibilimi ajoqersuutigineqartut’, kapitali 1, immikkoortoq 6 takutissinnaavat).
Pulaagaq oqarpat: “Uanga Biibili upperinngilara,” ima oqarsinnaavutit:
• “Inuppassuit taamatut oqartarput. Ilaat isumaqarput Biibili ilisimatussutsimut naapertuutinngitsoq imaluunniit siunnersuutit Biibilimiittut itsangavallaartut. Aperilaarlakkit: Biibili atuarnikuuiuk? [Akissutaanut tusarnaarit. Taava quppersagaq Inunnut tamanut atuagaq, qupp. 3 takutiguk neqeroorutigalugulu]. Upperisarsioqatigiit assigiinngitsut Biibilimi ajoqersuutigineqartunik paasinerlutsitsisimanerat pissutigalugu inuppassuit Biibili qularilersimavaat. Tulliani quppernerni 4, 5-imilu assersuuteqarsinnaavunga.”
• “Inuppassuit ilittulli isumaqarput. Uanga Biibilimi allassimasoq tupigusuutigisimasara takutilaarsinnaavara? [Jobi 26:7 atuaruk. Allassimaffimi matumani Biibilip ilisimatuussutsimut naapertuuttuunera ersersinneqarpoq]. Aamma Biibilimi ilaqutariinnut sinnersuutitsialannik allassimasoqarpoq. Tulliani aggeruma taakkua ilaat takutissinnaavara.”
• “Nuannaarutigaara isummat annikkakku. Guutilli inuit atuakkiuussimasuuppagit qanoq imaqarnissaa ilimagissagaluarpiuk?” Taava allassimaffik pulaakkavit akissutaanut naapertuuttoq takutiguk.