Allat Guutip naalagaaffianik tusarliussamik ilassinnissinnaaqqullugit ikiukkit
„Agrippa Paulusimut oqarpoq: ’Kristumiunngortingajaveqaarma!’“ — APUSTILIT SULIAAT 26:28.
1, 2. Sooq apustili Paulusi naalagaatitamut Festusimut kunngi Herodesi Agrippa II-mullu sassartinneqarpa?
UKIUMI 58-imi kunngi Herodesi Agrippa II-p najaatalu Berenikep Romamiut Cæsareami naalagaatitaat Porkiusi Festusi tikeraarpaat. „Takkupput assukkersorsimaqalutik; sakkutuut qullersaat illoqarfimmilu akimanertat ilagalugit eqqartuussivimmut iserput.“ Festusip peqqusineratigut apustili Paulusi kristumiuusoq taakkununnga sassartinneqarpoq. Sunali pissutigalugu Jiisusi Kristusip ajoqersugaa taanna naalagaatitap Festusip eqqartuussivianut sassartinneqarpa? — Apustilit Suliaat 25:13-23.
2 Pissutaasoq Festusip tikeraartuminut oqaluttuaraa. Ima oqarpoq: „Kunngi Agrippa ilissilu tamassi maani isersimaqataasusi! Aana takuarsi taanna juutit tamarmik Jerusalemimi maanilu uannut saaffiginnissutigisaat inuuinnartittariaarunnerarlugulu suaartaatigisaat. Paasigakkuli toqumik pillarneqartariaqartumik iliuuseqarsimanngitsoq pineqarnissanilu Ataqqinartorsuarmut suliassanngortimmagu aalajangerpunga aallartinniarlugu. Taanna pillugu tunngaveqarluartumik kaasarimut allassinnaanngilanga. Taamaattumik ilissinnut, pingaartumillu ilinnut kunngi Agrippa, sassartippara apersorneqareerpat ilisimalersinnaajumallugu qanoq allassanerlunga; isumaqarpungami iluanngitsoq parnaarussaq aallartissallugu tassunga pasilliutaasut nalunaarsornagit.“ — Apustilit Suliaat 25:24-27.
3. Sooq upperisarsiornikkut siuttut Paulusi unnerluutigaat?
3 Festusip oqaasiisa paasinarsisippaat Paulusi eqqunngitsumik unnerluutigineqartoq pikitsitsinissamut kajumissaarisutut — pinerlunneq toqumik pillarneqaataasartoq. (Apustilit Suliaat 25:11) Paulusili pisuussuteqanngilaq, unnerluussisullu tassaapput Jerusalemimi upperisarsiornikkut siuttut sinngasut. Paulusip oqaluussinera akerlilersorpaat, ajuallaatigingaarpaallu allat Jiisusi Kristusimut ajoqersuaganngorsinnaaqqullugit ikiormagit. Nakkutigineqaqqissaarluni Paulusi Jerusalemimiit illoqarfimmut umiarsualivittalimmut Cæsareamukaanneqarpoq, tassanilu kaasarimut suliassanngortippoq. Tassanngaanniit Romaliartinneqassaaq.
4. Kunngi Agrippa tupaallannartumik qanoq oqarpa?
4 Takorlooruk Paulusi naalagaatitap illussaarsuani inuppaaluit, ilaatigut Romamiut naalagaaffissuata ilaanut pingaartumut naalakkap, saavanni qeqartoq. Kunngi Agrippap Paulusi saaffigaa imalu oqarluni: „Oqalussinnaavutit.“ Paulusi oqalutsillugu maluginiarnartumik pisoqarpoq. Paulusip oqaasii kunngimut malunniutilerput. Aap, allaat kunngi Agrippa ima oqarpoq: „Kristumiunngortingajaveqaarma.“ — Apustilit Suliaat 26:1-28.
5. Paulusip Agrippamut oqaasii sooq taama sunniuteqartigippat?
5 Eqqarsaatigeriaruk! Paulusi torrallaalluni imminut illersormat naalakkersuisoq Guutip oqaasianit kimittoqisumit killinneqarpoq. (Hebræerit 4:12) Paulusilli imminut illersornera sooq taama sunniuteqartigaa? Ajoqersuganngortitsiortornitsinnilu iluaqutigisinnaasatsinnik Paulusi qanoq ilinniarfigisinnaavarput? Oqalugiaataa misissorutsigu soqutiginartut marluk malugissavavut: (1) Paulusip oqaasii assut nakimaallinarput. (2) Guutip oqaasianik ilisimasaminik atuillaqqippoq, sulisartutut sakkuminik atuillaqqissutut.
Qularunnaarsitsisinnaaneq ilinniaruk
6, 7. (a) Grækerit ’qularunnaarsitsineq’-mut oqaasiat Biibilimi qanoq isumaqarpa? (b) Allanik Biibilimeersunik ilinniartitsinermi qularunnaarsitsinissaq qanoq pingaaruteqartigaa?
6 Atuakkami Apustilit Suliaat-ni grækerit oqaasiat ’qularunnaarsitsineq’-mik nutserneqartartoq Paulusimut atatillugu atorneqaqattaarpoq. Ajoqersuganngortitsiortornitsinni qanoq pingaaruteqarpa?
7 Vines Expository Dictionary of New Testament Words naapertorlugu grækerit oqaasiat ’qularunnaarsitsineq’-mik nutserneqartartoq isumaqarpoq, „iluarinnilersitsineq“ imaluunniit „inuup eqqarsartaasianik allannguisitsisumik killiineq silassorissutsimut ileqqussanulluunniit tunngasumik eqqarsaateqarnikkut“. Oqaatsip isumaata misissorneruneratigut paasinninnerusoqarsinnaavoq. Aamma ’tatiginninneq’ isumagisinnaavaa. Biibilimi ajoqersuutigineqartumik qularunnaarsitaqaruit, Biibilimik tatiginnilersissimavat, tamatumalu kingunerisarpaa tassani ajoqersuutigineqartut ilumoornerannik upperinnilerneq. Tassa Biibili upperilissappagu malerualissappagulu naammanngilaq tassani qanoq allassimasoqarneranik oqaluttuussineq. Oqaatsivit ilumoortuunerannik qularunnaarsinneqartariaqarpoq, pineqartoq meeraagaluarpat, saniliugaluarpat, suleqataagaluarpat, atuaqataagaluarpat ilaqutaagaluarpalluunniit. — 2 Timotheusi 3:14, 15.
8. Sallusuissummik Biibilimeersumik qularunnaarsitsineq sumik ilaqarpa?
8 Oqaaserisavit Guutip oqaasianeersut ilumoornerannik oqaluttuussat qanoq qularunnaarsissinnaaviuk? Paulusi paasiuminartumik eqqarsalersitsisarpoq, tunngavilersuilluartarpoq ilungersorlunilu kajumissaarisarluni. Taamaaliornermigut oqaloqatigisami ilaannik allamik isumataartitsisinnaasarpoq.a Taamaattumik oqaatsitit ilumoorneraannarnagit, qularunnaarsitsisinnaasunik paasissutissiisariaqarputit. Qanoq taamaaliortoqarsinnaava? Oqaatsitit Guutip oqaasianik tunngaveqarluartikkit nammineq isummannik tunngaveqartinnagit. Aammattaaq tunngavilersuutitit Biibilimeersut uppernarsaateqartittakkit. (Ussatit 16:23) Assersuutigalugu eqqaagukku inuit Guutimut naalattut nunami paratiisimi inuussasut, tunngavilersorsinnaavat allassimaffik, soorlu Esaja 65:21-25, innersuussutigalugu. Eqqarsaalli Biibilimeersoq aamma qanoq tunngavilersorsinnaaviuk? Tusarnaartuit nalunngisaanik innersuussisinnaavutit, eqqaasillugu inuunerup nuannersortaanik akeqanngitsunik, assersuutigalugu seqernup tarrilerneranik kusanartumik, naasut tipiginnerannik, paarnanik mamartunik timmissalluunniit piaqqaminik nerlersuineranik. Paasitiguk tamakku tamarmik takussutissaasut Pinngortitsisup kissaatigigaa nunarsuarmi inuunerput nuannaarutigissagipput. — Oqaluussisartup oqaasii 3:11, 12.
9. Oqaluussiffigisavut qanoq eqqarsalersinniarsinnaavavut?
9 Ajoqersuummik Biibilimeersumik aalajangersimasumik qularunnaarsitsiniaraangatta mianersuutigisariaqarparput nuannaarutiginningaaratta ingasattajaalinnginnissarput. Ingasattajaalerutta oqaloqatigisarput tusaarusukkunnaarteriaannaavarput, isumaa uummataalu killinngitsoorlugit. ’Skolehåndbogi’-mi ima mianersoqquneqarpugut: „Isumammik allap sivisuumik nuannarisimasaanik ingerlaannaq eqqunngitsuuneraaneq, allassimaffippassuarnilluunniit tunngavilersuigaluaraanni, amerlanertigut akueriumaneqarneq ajorpoq. Nalliuttorsiortarneq nuannarineqartoq assersuutigisinnaavarput; ajorneraannarutsigu Guutimillu nalusut nalaanneersuunerarlugu, ilimanarpallaanngilaq nalliuttorsiortarneq pillugu inuit isumaasa allanngornissaat. Eqqarsalersitsiniarneq pitsaaneruvoq.“ Eqqarsalersitsiniaraangatta sooq ingasattajaannginnissarput sulissutigisariaqarparput? Atuakkami ima allassimavoq: „Tunngavilersuutitit saqqummiukkukkit, oqaloqatigiinnissamut kajumissaarissaatit, eqqarsalersitsissaatit oqaloqatigeeqqinnissamullu periarfissiissallutit. Nakimaallinarpoq.“ — Kolossemiut 4:6.
Inuit uummataat killikkit
10. Paulusi Agrippamut imminut illersorami qanoq aallartippa?
10 Maanna Paulusip imminut illersornera, Apustilit Suliaat kapitali 26-mi allassimasoq, misissornerussavarput. Paulusi qanoq aallartittoq malugiuk. Aallarniutigalugu Agrippa nersualaarpaa, kunngi najamminik Berenikemik inooqateqarnini pissutigalugu tamanit mamiatsaatigineqaraluartoq. Paulusi ima oqarpoq: „Kunngi Agrippa! Nuannaarutigaara juutit uannut unnerluussutaat tamaasa pillugit ullumi ilinnut illersussagama. Illimmi juutit ileqquinik isumaqatigiinngissutaannillu asseqanngitsumik ilisimasaqartuuvutit. Taamaattumik qinnuigaakkit erinitsajuillutit tusarnaaqqullunga.“ — Apustilit Suliaat 26:2, 3.
11. Paulusip Agrippa qanoq ataqqinnittuliorfigaa, qanorlu kinguneqarpa?
11 Malugaajuk Paulusip Agrippap atorfikkaajunera akuersaaraa kunngitut taallugu? Tamanna ataqqinnittuliorneruvoq, Paulusillu silatuumik oqalulluni Agrippa ataqqivaa. (1 Petrusi 2:17) Apustilip miserratiginngilaa Agrippa innuttami juutiusut ileqquinik inatsisaannillu paasiuminaatsunik immikkut ilisimasaqartuusoq, nuannaarutiginerarpaalu naalakkersuisumut taama paasisimasaqartigisumut imminut illersorsinnaagami. Apustili Paulusip kristumiuusup Agrippa, kristumiuunngitsoq, pingaakujuffiginngilaa. (Filippimiut 2:3) Akerlianik Paulusip kunngi qinnuigaa erinitsajuilluni tusarnaaqqullugu. Taamaalilluni iluarusulersitsivoq, Agrippa tusarnaartullu allat oqaatsiminik akuersaaqqajaanerulertillugit. Ataatsimut aallaavik aallarniutigalugu tunngavilersuutissani tunngavissaqartippai.
12. Oqaluussigaangatta qanoq killiiniartarsinnaavugut?
12 Ilinniartitarput kajumissaartartigu pulaarnerput tamaat uummataa killinniarsaralugu, Paulusip Agrippamut sassartitaagami iliorneratut. Taamaaliorsinnaavugut oqaluussiffigisarput ataqqingaarlugu, tunuliaqutaalu eqqarsartaasialu soqutigalugit. — 1 Korinthimiut 9:20-23.
Guutip oqaasia atorluartaruk
13. Paulusitut qanoq tusarnaartutit iliuuseqarusulersissinnaavigit?
13 Paulusip tusarnaartuni nutaarsiassaq nuannersoq malillugu inoorusulersikkusuppai. (1 Thessalonikamiut 1:5-7) Taamaattumik assersuutaasumik uummataannik, iliuutsinut pissutaasut aallaaviannik, killiiniarsarivoq. Paulusi Agrippamut imminut illersorami ’oqaaseq sallusuissutaasoq eqqortumik atorpaa’ Mosesip pruffiitillu oqaaserisimasaannut innersuussilluni. — 2 Timotheusi 2:15, NV.
14. Nassuiaruk Paulusi Agrippamut sassartitaagami qularunnaarsitsisumik qanoq eqqarsalersitsiniartoq.
14 Paulusip nalunngilaa Agrippa juutiunerartuusoq, Agrippallu juutiussutsimik ilisimasaanut innersuussiitigaluni tunngavilersuilluni oqarpoq Missiarsip toquneranut makinneranullu atatillugu ’allaasumik oqaaseqarnani pruffiitit Mosesillu pisussatut oqaatigisaat kisiisa oqaatigalugit’. (Apustilit Suliaat 26:22, 23) Paulusip Agrippa toqqaannartumik ima aperaa: „Kunngi Agrippa, pruffiitit upperaagit?“ Maanna Agrippa akunnattoorpoq. Pruffiitit upperinagit oqaruni, juutitut uppertutut ilisimaneqarnini innarlissavaa. Paulusilli tunngavilersuutaa isumaqatigineraruniuk, kikkut tamarmik takkuanni apustili illersussavaa kristumiuunerarneqariaannaalerlunilu. Paulusip silatusaarluni apeqqutini nammineq akivaa ima oqarluni: „Nalunngilara upperigitit.“ Agrippa qanoq oqarnissaminut killinneqarpa? Ima oqarpoq: „Kristumiunngortingajaveqaarma!“ (Apustilit Suliaat 26:27, 28) Agrippa kristumiunngunngikkaluartoq Paulusip oqaluussissutigisaminik uummataa killeqqajarpaa. — Hebræerit 4:12.
15. Paulusi Thessalonikami ilagiinnik qanoq pilersitsiva?
15 Malugaajuk Paulusip nutaarsiassaq nuannersoq saqqummiukkaa sallusuissutip nalunaarutigineratigut tunngavilersuillunilu tusarnaartuminik qularunnaarsitsinermigut? Taamatut periaaseqarnermigut Paulusip oqaaseq sallusuissutaasoq ’eqqortumik atormagu’, tusarnaartaasa ilaat uppertunngorput. Ilaatigut taamaappoq Thessalonikami Paulusip synagogimi juutinik juutiunngitsunillu Guutimik mianerinnittunik naapitsiniarfigisaani. Apustilit Suliaat 17:2-4-mi oqaluttuaq imaappoq: „Ileqquni malillugu Paulusi taakkununngarpoq, sabbatinilu tulleriinni pingasuni oqaloqatigisarpai Allakkat najoqqutaralugit. Allakkat nassuiarpai erseqqissarlugulu Kristusi anniartariaqarsimasoq toqusunillu makissimalluni . . . Juutit ilaat qularunnaarsitaapput.“ Aap, Paulusi qularunnaarsitsilluni oqaluussivoq. Eqqarsalersitsivoq, nassuiaavoq Allakkallu atorlugit uppernarsarpaa Jiisusi tassaasoq Missiarsi neriorsuutigisaq. Qanoq kinguneqarpa? Ilagiit uppertut tassani pilersinneqarput.
16. Oqaluussinermi qanoq nuannaarnerulersinnaavit?
16 Guutip oqaasiani sallusuissummik allanik qularunnaarsitsillaqqinnerulersinnaavit? Taamaassinnaaguit inuttut nalerisimaarnerulissaatit nuannaarnerulissallutillu Guutip naalagaaffia pillugu oqaluussigaangavit allannillu ilinniartitsigaangavit. Tamanna oqaluussisartorpassuit misigereerpaat oqaluussinermi Biibilimik atuinerunissamik siunnersuutit malillugit.
17. Oqaluussinermi Biibilimik atuinerup qanoq iluaqutaaneranik nammineq misigisannik oqaluttuarit, immikkoortumiittorluunniit oqaluttuariuk.
17 Assersuutigalugu Jehovap Nalunaajaasuini nakkutilliisut angalasartut ilaat ima allappoq: „Maanna qatannguterpassuit illumiit illumut oqaluussigaangamik Biibili tigummiartarpaat. Naapitamik ilarpassuinut allassimaffimmik atuffassinissaminnut iluaqutigaat. Aamma pulaarneqartut oqaluussisartullu iluaqutigaat oqaluussinitsinnik Biibilimut, atuagassianuinnaanngitsoq atuakkanuinnaanngitsorlu, atassusiinissaminnut.“ Oqaluussigaangatta Biibili tigummiaatigisinnaaneripput soorunami assigiinngitsut apeqqutaapput, ilaatigut nunagisami ileqquusut. Anguniagarisariaqarparpulli Biibilimik atuillaqqissutut allallu kristumiut tusarliussaannik ilassinnissinnaaqqullugit qularunnaarsitsillaqqissutut ilisimaneqarnissarput.
Oqaluussinermut Guutip isiginnittaasiatut isiginnittaaseqarit
18, 19. (a) Guutip oqaluussinerput qanoq isigaa, aamma sooq taamatut isiginnittaaseqarneq ineriartortittariaqarparput? (b) Pulaaqqiinermi qanoq angusaqarluarsinnaavugut? (Takuuk qupperneq 24-imi ungalusaq ima qulequtalik: „Pulaaqqiinermi qanoq angusaqarluartoqarsinnaasoq“.)
18 Aammattaaq inuit uummataat killissinnaajumallugit oqaluussineq Guutip isiginnittaasiatut isiginnittaaseqarfigisariaqarparput erinitsajuitsuullutalu. Guutip kissaatigaa inuit tamarmik ’sallusuissummik ilisarsissasut’. (1 Timotheusi 2:3, 4) Tamanna aamma uagut kissaatiginnginnerparput? Jehova erinitsajuitsuuvoq, erinitsajuimmallu inuppassuit allamik isumataarnissaminnut periarfissinneqarput. (2 Petrusi 3:9) Taamaattumik Guutip naalagaaffianik tusarliussamik tusaarusuttunik naammattoorsigaangatta soqutiginninneruleriartortinniarlugit pulaaqqittuartariaqarsinnaavavut. Sallusuissutip naatsiiassartaata naajartornera takussagaanni piffissaqartariaqarpoq erinitsajuittariaqarlunilu. (1 Korinthimiut 3:6) Taamatut qanoq soqutiginninnerulersitsisoqarsinnaanersoq ungalusami „Pulaaqqiinermi qanoq angusaqarluartoqarsinnaasoq“-mik qulequtalimmi siunnersuuteqarpoq. Eqqaamajuk inuit inuunerat — ajornartorsiutaat pissutsillu atugaat — allanngorartuarmata. Angerlarsimanngitsoortoqattaasinnaavavut, naammattoorutsigilli ilungersulussinnassanngilagut. Annaanneqarnissamik Guutip tusarliussaanik tusarnissaannut periarfissikkusuppavut. Taamaattumik Jehova Guuti ilisimassusermik qinnuigiuk sallusuissummik Biibilimeersumik allanik qularunnaarsitsillaqqinerulerniarlutit.
19 Oqaluussisartutut kristumiutut aamma suna iliuuserisinnaavarput kristumiut tusarliussaannik paasisaqarnerorusuttumik naammattoorsigaangatta? Allaaserisami tullermi tamanna sammineqarpoq.
[Quppernerup ataani ilanngussaq]
a Qularunnaarsitsilluni qanoq oqartoqarsinnaanera pillugu atuakkami Den Teokratiske Skole — til gavn for kristne forkyndere-mi (Jehovap Nalunaajaasuinit saqqummersinneqartumi) ilinniagassani 48-mi 49-milu paasissutissaqarneruvoq.
Eqqaamavigit?
• Sooq Paulusip kunngi Agrippamut imminut illersornera taama sunniuteqartigaa?
• Tusarliussatsinnik inuit uummataat qanoq killissinnaavavut?
• Inuit uummataannik killiisinnaaniarluta Guutip oqaasianik atuillaqqinnerulernissatsinnut suna iluaqutigissavarput?
• Oqaluussinermut Guutip isiginnittaasiatut qanoq isiginnittaaseqalersinnaavugut?
[Qupp. 24-mi ungalusaq/assiliartaq]
Pulaaqqiinermi qanoq angusaqarluartoqarsinnaasoq
• Ilumoortumik inuttut soqutigiuk.
• Oqaloqatigiissutissaq Biibililersaarut piareersaruk.
• Pulaaqqinnissaanut qilanaartuuseruk.
• Pulaareernermi inuttaa eqqarsaatigiuk.
• Pulaaqqiaarit, immaqa ulloq ataaseq marlulluunniit qaangiuppata, soqutiginninnera ineriartortinniarlugu.
• Eqqaamajuk Biibilimik atuaqqissaaqateqalernissaq anguniagaammat.
• Soqutiginninnerujartoqqullugu Jehovamut qinugit.
[Qupp. 23-mi assiliartaq]
Paulusi nunamut naalagaatitamut Festusimut kunngi Agrippamullu sassartitaagami qularunnaarsitsisumik tunngavilersuivoq