PISIASSAT AKITSORNERINI SUSINNAAVIT?

Aningaasaatinnik aqutsilluartuugit

Akit qaffakkiartornerat tamatsinnut ajornartorsiortitsisarpoq. Soriarsinnaanngitsutulli misigisariaqanngilatit. Pissutsit atukkatit atoruminarsarniarlugit iliuuseqarsinnaavutit.

SOOQ PINGAARUTEQARTOQ

Aningaasartuutigut aqunngikkutsigit isumakuluutiginerulikkatsinnik ajornartorsiuteqalersinnaavugut. Aningaasaatikikkaluaraanniluunniit aningaasanik aqutsilluarniarnermi arlalinnik iluaqutaasunik iliuuseqartoqarsinnaavoq.

SUSINNAASUTIT

Akissaqarfiginngisannik atuinaveersaarit. Eqqissisimanerusutut misigissaatit ilimaginngisannillu akiligassaqalissaguit piareersimanerussallutit.

Akissaqarfiginngisannik atuinnginniassagavit missingersuusiorit – tassa isertittakkatit aningaasartuutigisartakkatillu allattukkit. Allattuereeruit eqqarsaatigiuk aningaasaatitit pisariaqanngitsunut atortarnerlugit. Missingersuutitit malillugit iliuuseqarniarsarisarit, isertitatillu pisiassallu akii allanngussagaluarpata naleqqussarit. Aappaqaruit soorunami marluullusi aningaasaqarnermut tunngatillugu aalajangiisassaasi.

Una misiliguk: Akilersugassanik pisinak ingerlaannaq akiliisarit. Ilaasa korti atornagu aningaasanik pappilissanik akiliisarput. Taamaalillutimmi aningaasanik missingersuutiminnik eqqortitsinissartik ajornannginnerutittarpaat akiitsoqarnaveersaarnissamullu iluaqutigisarlugu. Aamma pitsaassaaq bankimiittuutitatit nakkutigisarukkit. Eqqissisimanarnerusarpoq qanoq akissaateqarnerluni nalunngikkaanni.

Akissaqarfiginngisamik atuinaveersaarnissaq imaannaanngilaq. Eqqarsaatigilluakkamilli missingersuusioraanni iluaqutaalluarsinnaavoq. Taamaalioruimmi eqqissisimanerussaatit ernumassutissaqannginnerullutillu.

“Kina arlarsi napasulialiorniartoq ingeqqaassannginnerpa naatsorsorniarlugu naammassinissaanut akissaqarnerluni?” – Lukkarsi 14:28.

Suliffiit annaanaveersaaruk. Qanoq taamaaliorsinnaavit? Siunnersuutialuit aajuku: Piffissaq eqqorlugu takkuttarit. Suliffinnut isumalluartumik isiginnittaaseqarit. Ikiuiumatuujugit eqiasuitsuullutillu. Ataqqinnittuugit. Suliffinni malittarisassat maleruartakkit sapinngisannillu suliatit pikkoriffiginiartakkit.

Aningaasaatinnik atuipilunnaveersaarit. Aningaasaatitit peqqinnanngitsunut akisuunulluunniit atortarnerlugit eqqarsaatigiuk. Assersuutigalugu inuppassuit aningaasaatiminnik atuipiluttarput ikiaroorniutinut, aningaasanoornermut, pujortarnermut imaluunniit imigassartorpallaarnermut. Ileqqupalaat taakku pissutigalugit peqqiilliortoqarsinnaavoq suliffimmilluunniit annaasaqartoqarsinnaalluni.

“Pilluarpoq inuk ilisimassusermik pissarsisoq. … Sølvip pissarsiarinissaanit pingaarneruvoq.” – Ussatit 3:13, 14.

Ilimaginngisamik pisoqariataarsinnaaneranut aningaasanik sillimmateqartarit. Ajornanngippat aningaasanik immikkoortitsisarit. Taamaaliornikkut ilimaginngisamik akiligassaqalissaguit pisoqariataassagaluarpalluunniit – soorlu peqqiilliulissagaluaruit, suliffiit annaassagaluarukku ilaquttanniluunniit taamatut misigisaqartoqassagaluarpat – aningaasatigut sillimmatitit iluaqutigissavatit.

“Inuunersi aqagu qanoq issanersoq naluarsi.” – Jaaku 4:14.

Sipaarnissamut siunnersuutit

Nammineq igasarit.

Neriniartarfinnut neriartukulasaruit aamma nerisassanik imigassanillu naammasseriikkanik pisisaruit akisusinnaavoq. Nammineq iganeq piffissartornarsinnaallunilu nukersornarsinnaasaraluartoq taamaaliortaruit aningaasanik sipaarluarsinnaassaatit. Aamma taamaalioruit nerisatit peqqinnartuunersut aqulluarsinnaanerussavat.

Susiniassanerlutit eqqarsaatigilluaqqaartaruk.

Pisiassatit allattukkit taakkulu kisiisa pisiarisakkit.
Akikinneruppat akissaqarfigigukkulu arlalikkuutaartunik pisisarit, eqqaamajulli pisiassat ilaat asiusinnaammata atornissaat angumerisinnaanngikkukku amerlavallaartunik pisinaveersaarnissat.
Nioqqutissat akikinnerusut ajunngippata pisiarisakkit.
Najugaqarfigisanni ajornanngippat internetikkut pisiniartarsinnaavit? Taamaalioruit akikinnerusut nassaarisinnaassavatit, pilersaarutiginngisannik pisinaveersaarsinnaavutit aningaasallu qanoq amerlatigisut atorsimanerlugit eqqumaffiginerusinnaallugu.
Akikillisat neqeroorutaalluartullu eqqumaffigisakkit. Pisiniarfinni assigiinngitsuni akit sanilliuttakkit, aamma innaallagissamik orsussamillu atuinikinnerusartunik pisisarit.

Pigisavit taarsinnginnerini eqqarsarluaqqaartarit.

Mobilinik allanillu sanasartut aningaasarsiornerujumallutik nutaanik saqqummersitsikulasarput. Taamaattumik uku eqqarsaatigikkit: ‘Pigisara taarsertariaqarpara? Taamaappallu massakkorpiaasariaqarpa? Pitaassagumalu nutaanerpaaq pisariaqartippara?’

Pigisatit aseroraangata iluarsaattakkit atornikunilluunniit pisillutit.

Pigisat aserfallatsaaliortaraanni sivisunerusumik pigineqarsinnaasarput, aamma aseroraangata iluarsaattaraanni ilaannikkut sipaarnarnerusarpoq. Aamma atornikunik pisisaraanni sipaarnartarpoq.

Nammineq nerisassannik aalisarlutillu piniartarit.

Nammineq nerisassannik aalisarlutilluunniit piniartarsinnaavit? Imaluunniit naatitsisarsinnaavit? Taamaalillutit aningaasartuutikinnerussaatit, aamma imaassinnaavoq tunisassannik pajugutigisinnaasannilluunniit nerisassaateqalissasutit.

“Eqiasuitsup pilersaarusiai iluanaarutissarsisitsisarput.”– Ussatit 21:5.

“Pisiarisartakkatta akii nakkutigisarpagut korterpullu qanoq atortiginerlugu eqqumaffigisarlugu.” – Miles, Tuluit Nunaat.

“Pisiniannginnitsinni pisiassat pisariaqartitagut allattoqqaartarpagut.” – Jeremy, USA.

“Ilaquttatsinnut missingersuutigut akulikitsumik naleqqussartarpagut pisoqariataarnissaanullu aningaasanik sillimmateqartarluta.” – Yael, Israeli.

“Biiligut angerlarsimaffitsinnilu pigisagut ajoquteqaraangata iluarsaattarpagut meeqqagullu taamaaliornissaannut ilinniartittarlugit. Aamma nuliaralu nutaaliaanerpaanik pisinaveersaartarpugut.” – Jeffrey, USA.

“Nammineq naatitsisarnikkut kukkukuujuteqarnikkullu aningaasartuutikka ikilisarsimavakka. Allaat inoqatikka naatitaatinnik pajuttarsinnaasimavakka.” – Hono, Myanmari.