Naammagin­nittuugit

SOOQ PINGAARUTEQARTOQ

Jessica Koehler, psykologiusoq, allappoq inuit naammagin­nittuusut isumalluar­nerusarlutillu sinngaq­qajaanngin­nerusartut.a Tamanna pissutigalugu naammagin­nittuusut nuannaar­nerusarput uippakajaan­nginnerusarlutillu. Inuit pigisakik­kaluarlutik pisiarineqarsin­naanngitsunik, soorlu ilaquttaminnik ikinngutimin­nilluunniit peqateqarnermik, pingaar­nerpaatitsisartut nuannaar­nerpaasarput.

SUSINNAASUTIT

Allanut naleqqiun­naveersaartarit. Uagutsinnit pigissaar­nerusunut naleqqiut­tarutta naammagin­nittuujun­naarlutalu sinngalersin­naavugut. Aammami imaassinnaavoq ilaat pisuujorpasiinnartut, tassami pigisarpas­suallit ilaat akiitsorpas­suaqartarput. Nicole Senegalimi najugalik ima oqarpoq: “Pilluassaguma pigisarpas­suaqartariaqan­ngilanga, allat uannit pigisaqar­nerugaluarpataluunniit. Naammagin­nittuuneq nuannaar­nissannut iluaqutigisarpara.”

Una misiliguk: Ussassaarutini imaluunniit internetikkut attaveqaatini ilorrisimaar­nartumik inooriaaseqartunik nittarsaas­sisunik isiginnaarpal­laarnaveersaarit.

Qujamasuttuugit. Inuit qujamasuttuusut nalerisimaar­nerusarput pigisaqar­nerusariaqar­tutullu misigineq ajorlutik. Roberton, Haitimeersoq, ima oqarpoq: “Allat uannut ilaquttannullu ajunngitsuliaat eqqarsaatigil­luartarpakka. Taava oqarfigisarpakka iliuuserisimasaat qujamasuutigalugit. Aamma ernera arfineq-pingasunik ukiulik ilinniar­tittarpara tunineqaraangami qujasassasoq.”

Una misiliguk: Qujamasuutinnut allattaaveqarit. Ullormut qujamasuutitit allattakkit. Assersuutigalugu tassaasin­naapput peqqissuunerit, ilaquttatit, ikinngutaal­luartut imaluunniit misigisimasat, soorlu seqernup tarrikkiar­tornera kusanangaartoq.

Tamatta ilaannikkut naammagin­nittuuniarnerput sapernar­tittarparput. Naammagin­nittuunerli iluaqutaavoq! Naammagin­nittuuniarluta aalajangeraangatta nuannaar­neruler­tarpugut, nuannaarnerlu aningaasanik pisiarineqarsin­naanngilaq.