Arnanut ajortumik pineqartartunut qiimmassaat
“NUNARSUAQ tamakkerlugu arnat niviarsiaqqallu millionilippassuit ajortumik pineqartarput. Illit taakkua ilagaatsit? Illit isumannaatsumik inuuneqarnissat sooq Guutip pingaartikkaa aamma arnat nikanarsagaasut qanoq iliuuseqarfigissagai paasiniaruk.”
Allaaserisaq jw.org-imiittoq “Arnat isumannaatsuutinneqarnerat – Biibilimi qanoq allassimasoqartoq” taama aallartippoq. Allaaserisap naggataatungaani linki toorukku PDF-itut aariarlugu anillatsissinnaavat, sisamanillu quppernilinngortillugu peqitersinnaavat. Qatanngut arnaq Stacymik atilik USA-miittoq ima oqarpoq: “Naqitaaqqat arlallit anillatseriarlugit qatanngut arnaq alla ilagalugu arnanut qimarnguimmut qanittumiittumut tunniukkiartorpagut.”
Sulisup aperai naqitaaqqanik amerlanerusunik qimarnguimmi najugaqartunut tunniunneqartussanik pisinnaanerluni. Taamaattumik naqitaaqqat suli 40-t visitkortillu nittartakkatsinnut innersuussisut 30-t tunniunneqarput. Kingusinnerusukkut tassani ningiuusup qatanngutit arnat qinnuigai Biibilimik misissueqateqarneq qanoq ingerlanneqartarnersoq najugaqartunut takuteqqullugu.
Stacy qatanngutillu arnat marluk qimarnguik alla pulaaramikku assingusumik misigisaqarput. Naqitaaqqat tallimat tiguneqarput, amerlanerusunillu piumapput. Sulisut ilaat oqarpoq: “Naqitaaraq arnanut tamaaniittunut iluaqutaassaaq. Pisariaqartipparput.” Kingusinnerusukkut qatanngutit pulaarmata tassani najugallit arlallit Biibilimik misissueqateqarneq qanoq ingerlanneqartarnersoq takujumavaat. Arnallu ilaat marluk oqarput ataatsimiinnermut tulliuttumut ilaarusullutik.
Stacy oqarpoq: “Allaaserisap qiimmassaataasup tamatuma qanoq iluaqutaatigisarnera takullugu nuannaarutigeqaarput. Torragivara anillatseriarlugu peqiterneqarsinnaammat – kusanarlunilu atuaruminarpoq! Arnat tigusisut nuannaarutiginninnerat takullugu killitsinnarpoq. Neriuutigaarpullu Jehova pillugu ilinniartinnerusinnaallugit. Jehovap ikiuineratigut angusassarpassuatta takunissaannut qilanaarpugut.”