ពាក្យផ្ដើម
សៀវភៅបទគម្ពីរសម្រាប់ជីវិតជាគ្រិស្តសាសនិក នឹងធ្វើឲ្យអ្នកស្រួលរកឃើញខគម្ពីរ រួមទាំងកំណត់ហេតុដែលអាចជួយអ្នកឲ្យដោះស្រាយបញ្ហាផ្សេងៗ។ សៀវភៅនេះក៏នឹងជួយអ្នកក្នុងការស្វែងរកព័ត៌មានពីគម្ពីរយ៉ាងត្រឹមត្រូវ ដើម្បីលើកទឹកចិត្តនិងជួយអ្នកឯទៀតឲ្យធ្វើការសម្រេចចិត្តដែលលើកកិត្តិយសព្រះយេហូវ៉ា។ អ្នកអាចជ្រើសរើសប្រធានបទដែលអ្នកចាប់អារម្មណ៍។ ក្នុងប្រធានបទនីមួយៗ មានសំណួរល្អៗនិងពាក្យសង្ខេបខ្លីៗពីកំណត់ហេតុគម្ពីរ (សូមមើលប្រអប់ «របៀបរកព័ត៌មានក្នុងសៀវភៅនេះ»)។ ភ្លាមៗ អ្នកនឹងរកឃើញបទគម្ពីរ ដែលប្រាប់ពីយោបល់ ការណែនាំ និងការសម្រាលទុក្ខដែលអ្នកត្រូវការ។ មិនត្រឹមតែប៉ុណ្ណោះ អ្នកនឹងរកឃើញគោលការណ៍ល្អៗពីគម្ពីរដែលអ្នកអាចប្រើ ដើម្បីជួយពង្រឹងកម្លាំងចិត្តអ្នកឯទៀត។
ពិតមែនថាសៀវភៅនេះ មិនមានបទគម្ពីរទាំងអស់សម្រាប់ប្រធានបទណាមួយទេ តែសៀវភៅនេះជាជំនួយដ៏ប្រសើរមួយដើម្បីជួយអ្នកក្នុងការស្រាវជ្រាវ។ (សុភ. ២:១-៦) សូមប្រើបទគម្ពីរយោង និងឯកសារយោងដែលមានភ្ជាប់នៅក្នុងគម្ពីរបរិសុទ្ធសេចក្ដីបកប្រែពិភពលោកថ្មី ប្រយោជន៍ឲ្យការសិក្សាផ្ទាល់ខ្លួនរបស់អ្នកកាន់តែស៊ីជម្រៅ។ បន្ថែមទៀត សូមប្រើជំនួយស្រាវជ្រាវសម្រាប់សាក្សីព្រះយេហូវ៉ា ឬលិបិក្រមសៀវភៅផ្សេងៗរបស់សាក្សីព្រះយេហូវ៉ា ជាភាសាអង់គ្លេស ដើម្បីអ្នកអាចសិក្សាបានពេញលេញជាងអំពីអត្ថន័យបទគម្ពីរ។ អ្នកក៏អាចនិយាយជាមួយបងប្អូនឯទៀតអំពីអ្វីដែលអង្គការបានចេញថ្មីៗនេះ ដើម្បីប្រាកដថាការយល់ដឹងរបស់អ្នកអំពីសេចក្ដីពិតក្នុងគម្ពីរ គឺជាព័ត៌មានថ្មីបំផុត។
យើងសង្ឃឹមថា សៀវភៅបទគម្ពីរសម្រាប់ជីវិតជាគ្រិស្តសាសនិក អាចជួយអ្នកឲ្យរកឃើញប្រាជ្ញា ចំណេះ និងការយល់ដឹងថែមទៀតពីគម្ពីរបរិសុទ្ធ។ កាលដែលអ្នកប្រើសៀវភៅនេះ អ្នកនឹងជឿជាក់កាន់តែខ្លាំងថា«បណ្ដាំរបស់ព្រះគឺមានជីវិតរស់នៅ ហើយមានឫទ្ធានុភាព»។—ហេ. ៤:១២